Samuwele aatitela okhala oororomeleya mu ekumi awe yoothene. Vaavaa aareiye mmiravo, owo aakhooca okhala ntoko anamwane a Eli, Hofeni ni Finehase. (1Sam 2:22-26) Samuwele aatitelela wunnuwa, nave Yehova aatitelela okhala ni yoowo. (1Sam 3:19) Vaavaa uuluvanleiye, owo nlelo aatitelela omurumeela Yehova moororomeleya, naamwi anaawe yaheerakano yeela.—1Sam 8:1-5.

Yootakiherya ya Samuwele enanihusiha eheeni? Waakhanle wi mwa mmiravo, muroromele wi Yehova onniiwexexa makacamiho anyu ni mukhalelo muniisoonaanyu. Owo onahaala wookhaviheryaani okhala oolipa. (Isa 41:10, 13) Waakhanle wi mwa tiithi nave murino mwaana ohinamurumeela Yehova, mulipiheye moorweela wa osuwela wi Samuwele haawaakhinyerenrye anaawe yaawo yaari atokweene otitelela okhala oororomeleya wa malakiheryo a Yehova. Vaavaa aahin’yeiye mwaha mmatani mwa Yehova, owo aahititelela okhala oororomeleya nave aamuhakalaliha Tiithi awe a wirimu, Yehova. Akhweya yootakiherya anyu yaphaama enahaala omuceenyerya mwaninyu omukookela Yehova.

MOONE EXILEMA MUHUSERYE ORWEELA WA YAAWO—SAMUWELE, NAVE VOOCHARELA MWAAKHULE MAKOHO ANACHARELA:

• Ti mwawiihai Samuwele oonihenryeiye olipa murima vaavaa aareiye mwaana?

• Ti mwawiihai Danny oonihenryeiye olipa murima?

• Ti mwawiihai Samuwele aatikithenryeiye yootakiherya yaphaama vaavaa uuluvanleiye?

• Ti mwawiihai asitiithi a Danny etikithenryaaya yootakiherya yaphaama?