Niphwanya mavyakelo a wiiwexexa muupuwelo, moonelo, omoriwa ikharari ni soothowa sa akina. Achu akina annasuwela vaavaa nnooniheryaahu niphwanya wa yaawo. Wakhala wi ninnachuna chiryene waakhaviherya akina, echu enahaala onikhaviherya ori wooniherya niphwanya wa yaawo. Vaavaa nnooniheryaahu niphwanya mmuteko woolaleerya, ninnatakiherya osivela ni opwacha wa Yehova, nave ela enahaala oweeriha achu omwaacamela yoowo.—Fil 2:4.

Wooniherya niphwanya tahi pahiru meerelo yaawo nnapharihelaahu wi nihusihe. Ninnooniherya niphwanya wa akina moorweela wa waawiriyana moopwacha ni mooreera murima. Ninnooniherya niphwanya moorweela wa meerelo ahu, mukhalelo nnalocaahu ni sawooniherya sa ethoi ahu. Ninnooniherya niphwanya moorweela wa wooniherya opwacha weeparipari wa muchu. Ninnathokororya soochuna sawe, soororomela ni mikhalelo sawe. Ninnavahererya miruku soophara muteko ni okhaviherya nyenya hannamukhinyererya muchu opaka matorokelo. Vaavaa akina aneemereryaaya wi naakhaviherye, ninnaaceererya ohakalala wahu mmuteko woolaleerya.

MOONE EXILEMA MPHWANYE OHAKALALA MU WAAPAKA OOHUSERYA—MUREHERERYE MAVYAKELO ANYU—WOONIHERYA NIPHWANYA , NAVE VOOCHARELA MWAAKHULE MAKOHO ANACHARELA:

• Ti mwawiihai Nita oonihenryeiye niphwanya vaavaa Flora aalekenleiye ophiya?

• Ti mwawiihai Nita oonihenryeiye niphwanya vaavaa Flora aalonceiye wi haari ooreheryeya wi ahuserye?

• Ti mwawiihai Nita oonihenryeiye niphwanya vaavaa Flora aalonceiye wi haareherenrye phaama ichu sawe?