Variyari va Setempuru, nnahaala wiilipixerya opaceryiha soohuserya sa Piipiliya mu ichoko soothene, nipharihelaka eproxura Mpuhe Okumi Okhala Wookhala! Alaleeryi ananwerya othanla orumeela ntoko mapiyoneero ookhaviherya mu iwora 30. Ti mwawiihai nneeraahu nikhaviherye mukipici yoola wa vameekhaaya?

• Mu Ekwaha Yoopacerya: Mpharihele ekaapa ya oculi ya eproxura wi mmukhaviherye muchu okhalano nchuno, nave mweererye omooniherya yoohuserya. Nwuupuwele yaale yoonihenrye nchuno, ophitaanyerya yaale mwaaxekuryaanyu. Naamwi awo yaakhonce yoohuserya ya Piipiliya khalai, awo ananwerya wooniherya nchuno sa meerelo mavyaani a ohuserya ni eproxura ahu. Iproxura hasinaphwanela ohiyiwaka empa ni empa naari orumiha ikaarata wa yaale ahinooniherya nchuno. Nikhuuru na Muteko na Muloko nnanwerya opaka marehereryo a mithukumano sa muteko woolaleerya variyari va mweeri yoola.

• Ikari Ikina: Waakhanle wi muloko anyu onnapharihela ekarinya ya soolaleeryiwa, mooniherye eproxura Mpuhe Okumi Okhala Wookhala! Mwaaleele yaale anooniherya nchuno wi vaavaa awo anaakhelaaya eproxura ananwerya tho waakhela yoohuserya ya Piipiliya mahaleene. Mmooniherye yoohuserya mwawaakuveya mu ochekula yoola, naari mpake marehereryo wi mweereno eyo voocharela. Ooweherya a muteko onanwerya waarehererya alaleeryi a mavyakelo wi eye mu ekulucu ya vamusika wi yavahe soohuserya sa Piipiliya. Nyuwaano tho munanwerya omvaha yoohuserya ya Piipiliya nthamwene anyu oomutekoni, naari muchu yoowo mumphwannyaanyu mulaleeryaka moohilakelela.

Yesu oonilamulela ‘waapaka oohuserya’ ni ‘waahusiha’ yaawo. (Mat 28:19, 20) Mukipici yoola onanwerya onikhaviherya waakhwaniherya yoolakelela yeela, nimpharihelaka Mpuhe Okumi Okhala Wookhala!