Piipiliya ookhalano sootakiherya sincipale sa mavekelo yaawo yaakhuliwe ni Yehova. Vaavaa alapeli a Muluku yoonaaya mukhalelo Yehova aawiriyaneiye mavekelo aya ni waakhaviherya yaawo, moohikhwa minikwa nroromelo naya naanakhala noolipa. Mwawiihiiha, ti yaphaama wa hiyaano okhala ooluluwanya mmavekelo ahu ni weererya woona naakhulo na Yehova. Nnaphwanela wuupuwela wi naakhulo nawe nnanwerya okhala noohiyana opwaha vaavaa naawehereryaahu. (2Kor 12:7-9; Éfe 3:20) Maakhulo taani Yehova onahaaleiye ovahererya wa sooveka sahu?

• Olipa omwiilini, mmuupuweloni, naari olipa mmakupa oomunepani wi nivilele ni makacamiho.—Fil 4:13

• Miruku wi nipake soolakelela saphaama.—Tiy 1:5

• Nchuno ni ikuru wi nipake echu.—Fil 2:13

• Omaaleleya vaavaa nnakhalaahu awuukhuwa.—Fil 4:6, 7

• Nikhaviheryo noomwiilini naari na mmuupuweloni nnarweela wa akina.—1Yoh 3:17, 18

• Nikhaviheryo na yaale ananivekelela.—Saw 12:5, 11

MOONE EXILEMA YEHOVA MULIPA “AWIIWA MAVEKELO,” NAVE VOOCHARELA MWAAKHULE MAKOHO ANACHARELA:

• Ti mwawiihai yaweereya ya Munna Shimizu enanlipihaaya vaavaa nihinaweryaahu opaka echu nthowa na makacamiho a mookumini?

• Ti mwawiihai nnahaalaahu ochariha yootakiherya ya Munna Shimizu?