NTAKHARA HEENI TI YOOCHUNEYA: Yoohuserya ya Muchu mukhateiye ya Masu a Muluku ennanikhaviherya osuwela “oruku, orekama, weemela, wiisha waya” wa eparipari. (Éfe 3:18) Nave tho ennanikhaviherya otitelela okhala awookololowa ni ohikhalano murala mu elapo yeela, ni otitelela ‘opharela masu ookumi.’ (Éfe 2:15, 16) Mu yoohuserya ya muchu mukhateiye, nnanwerya othanla mwaha yoowo ori woochuneyaxa wa hiyaano. Nyenya, nni niwerye hai okumihavo mphurelo wawaaca mu omuhuserya wahu Piipiliya?

MUKHALELO WA WEERANO:

• Muhele eneneeryo yoorepa eyo nave murepe masu mu Piipiliya anyu oomuhuserya, moohipwacha aari Piipiliya a mukhankoonya naari oopakiwa.

• Variyari va ohuserya wanyu, mwiipakeleke makoho ala: ‘Taani? Eheeni? Liini? Woowi? Ntakhara heeni? Mwawiihai?’

• Mutholathole wi mwiiwexexe yeeyo mwaalakhannyaanyu. Mpharihele ikaruma sa otholathola muryaanyuno wi mutholathole masu naari yoorepa ya Mpiipiliyani.

• Muupuwelele yeeyo mwaalakhannyaanyu nave moone mukhalelo enaphariheleyaaya wa nyuwaano.

• Mphariheleke yeeyo muhusenryaanyu nihiku ti nihiku mu okumi anyu.—Luka 6:47, 48

MOONE EXILEMA MMUHUSERYEKE PIIPILIYA MWAWIIXEELA, NAVE MWAAKHULE MAKOHO ANACHARELA:

• Tiheeni achu akina aloncaaya vooloca sa yoohuserya ya muchu mukhateiye?

• Ntakhara heeni ti woochuneya ovekela muchu ahaakumve opacerya yoohuserya ya muchu mukhateiye?

• Tiheeni eni enikhaviherye wiiwexexa makupa a Piipiliya?

• Ineneeryo sa mukhalelo taani nnaphwanelaahu ohela mu Piipiliya ahu oomuhuserya?

• Ntakhara heeni ti woochuneyaxa wuupuwelela vaavaa nnahuseryaahu?

• Tiheeni nnaphwanelaahu weera ni yeeyo nnahuseryaahu?