1 Akorintu 12:1-31
12 Vano anna, vooloca sa samahala soomunepani, nkinakhwela wi mukhale oohisuwela.
2 Nyuwo moosuwela wi vaavaa mwaaryaanyu achu a maloko,* mwaanavoloweliwa ni ohuwelihiwa ni soophwaniherya seihe soohiloca, mucharaka weiwo sookerihaayaaniwo.
3 Mwawiihiiha, musuwele wi haavo onaloca moorweela wa munepa wa Muluku ariki: “Yesu ta wuulumeliwa!” nave haavo onawerya oloca: “Yesu ti Pwiya!” voohikhala moorweela wa munepa waweela.
4 Sookhalavo samahala soohiyanahiyana, nyenya orivo munepa mmohamoha;
5 aakhalavo makhalelo oohiyanahiyana a orumeela,* nto orivo Pwiya mmohamoha;
6 nave sookhalavo miteko soohiyanahiyana, nto ti Muluku mmohamoha yoowo oneerano soothene mwa oothene.
7 Nyenya wooneya wa munepa onnavahiwa wa mmoha ti mmoha ni yoolakelela yamphurelo.
8 Woona wi wa mmoha, onnavahiwa masu a miruku* moorweela wa munepa, wa mukina masu a masuwelelo mwawiiwanana ni munepa mmohamoha;
9 wa mukina nroromelo moorweela wa munepa mmohamoha, wa mukina samahala sa openusa moorweela wa munepa mmoha yoowo;
10 nto wa mukina weerano miteko sootikhiniha, wa mukina oloca mwa miririmu, wa mukina wiiwexexa masu ooveereliwa, wa mukina oloca ilocelo soohiyana, nave wa mukina otaphulela mu ilocelo soohiyana.
11 Nto miteko soothene seiha ineereya moorweela wa munepa mmoharu yoowo, onamvaha wa mmoha ni mmoha hiiha ntoko onachunelaaya.
12 Hiihaa ntoko mwiili oryaaya mmoha nto orinono makupa mancipale, nave makupa oothene a mwiili yoowo naamwi yance, ori mwiili mmoha, hiihaa tho ti Kristu.
13 Tiwi, oothene hiyo nipatisiwe moorweela wa munepa mmoha wi nikhale mwiili mmoha, moohipwacha Ayuta naari Akriki, moohipwacha kapuro naari ootaphuwa, nave oothene ahu noowuryihiwa munepa mmoha.
14 Mweeparipari, mwiili honakhalano nikupa nimoha pahiru, nyenya mancipale.
15 Vano nnaani naloca: “Woona wi miyo nkiri ntata, nkiri makupa a mwiili,” tahi yeeyo yaahaala weeriha nlo ohipaka makupa a mwiili.
16 Nave ewaru yaloca: “Woona wi nkiri niitho, nkiri makupa a mwiili,” tahi yeeyo yaahaala weeriha eyo ohipaka makupa a mwiili.
17 Waakhanle wi mwiili woothene niitho, wiiwa waaya okhala vaavi? Waakhanle wi woothene ewaru, weemurya waaya okhala vaavi?
18 Nto vano Muluku oorehererya nikupa ti nikupa na mwiili hiiha ntoko aakhwenleiye.
19 Waakhanle wi oothene nikupa nimoha pahi, mwiili waaya okhala vaavi?
20 Mwawiihiiha, aakhalavo makupa mancipale, nto mwiili mmoha.
21 Niitho hinnawerya oloca wa ntata: “Nkinoochuna weyo,” naari muru honaweryea oloca wa inaani: “Nkinoochunaani nyuwo.”
22 Moohiyana, makupa a mwiili yaawo anakhala ntoko wi tooceecheyasa, tari oochuneya,
23 nave makupa a mwiili yaawo nnoonaahu okhala oohicicimiheya, ninnatepa ocicimiherya; hiiha, makupa yaale nnoonaahu wi hareenre, nnareerihaahusa;
24 nto makupa ahu ooreera tahi woochuneya othokororya. Nyenya Muluku oopaka mwiili mmukhalelo yoola, avahaka ncicimiho nawaaca makupa yaawo yaayeleela ncicimiho,
25 wi ohikhalevo okawanyeya mmwiilini, nto wi makupa aya ethokororyaneke moolikana mukina ni mukhwaawe.
26 Wakhala wi nikupa nimoha ninnahooseya, makupa makina oothene annahooseya ni nenlo; wakhala wi nikupa nimoha ninnacicimihiwa, makupa oothene makina annahakalala ni nenlo.
27 Vano nyuwo muri mwiili wa Kristu, nave mmoha ti mmoha a nyuwo nikupa na mwiili yoowo.
28 Nave Muluku ootikitherya makupa oohiyanahiyana mmulokoni: Voopacerya, arummwa; yanaawiili, alipa miririmu; yaneeraru, ahusiha; voocharela miteko sootikhiniha; vahoolo vaya samahala sa openusa; miteko sa okhaviherya; mavyakelo a ohoolela; ni oloca ilocelo soohiyanahiyana.
29 Apwanne oothene arummwa? Apwanne oothene alipa a miririmu? Apwanne oothene ahusiha? Apwanne oothene annapaka miteko sootikhiniha?
30 Apwanne oothene aakhalano samahala sa openusa? Apwanne oothene annaloca ilocelo soohiyanahiyana? Apwanne oothene alipa ootaphulela?
31 Nyenya mutitelele wiilipixerya ophwanya* samahala sookhweleya. Nave kinarwa kiwoonihaani ephiro etokweene.
Inoota
^ Ela tiwi, oohiroromela.
^ Naari: “sookhalavo miteko soohiyanahiyana.”
^ Naari: “michaka sa miruku.”
^ Naari: “mutitelele waavya moochunaxa.”
