1 Akorintu 15:1-58
15 Vano anna, kinachuna owuupuseryaani sa michaka saphaama seiho koolaleenryaakaani, seiho tho mweemerenryaanyu nave mwiithipela mwa seiyo.
2 Moorweela wa seiho nyuwo tho, munnavulusiwa wakhala wi mohaakeelela michaka saphaama seiho koolaleenryaakaani, yaahikhala wi mukhanle alipa oororomela siiyo ene.
3 Mwa ichu soopacerya koolenlaakani saari seiho tho kaakhenlaaka, wi Kristu ookhwa wa soocheka sahu mwawiiwanana ni Soorempwa;
4 wi yene aavithiwa nave aviihiwa mu nihiku naneeraru mwawiiwanana ni Soorempwa;
5 nave wi aahooneya wa Kefa,* voocharela wa Khumi Napiili.
6 Ohoolo waya owo aahooneya wa anna opwaha masana mathanu mu elukuluku emoha yeeyo, ancipale a yaawo nlelo ari ni hiyo, naamwi akina erumpe mookhwani.
7 Voocharela aahooneya wa Tiyaku nave wa arummwa oothene.
8 Vookuchula wa oothene, aahooneya tho wa miyo ntoko mwaana ooyariwa ahaakhwaninhe miyeeri.
9 Mwa arummwa miyo nkiri oochuneya, nave nkiri oophwanelela wiichaniwa murummwa, woona wi kohiikara muloko wa Muluku.
10 Nyenya moorweela wa mahala matokweene a Muluku kiri yeeyo kiryaaka. Nave mahala awe matokweene wa miyo hiyaari a siiyo, nto moohiyana, koolapa vancipale waapwaha oothene yaawo; nyenya nkaari miyo, nto mahala matokweene a Muluku ari ni miyo.
11 Mwawiihiiha, moohipwacha kaari miyo naari awo, ola mukhalelo nnalaleeryaahu, nave ola mukhalelo nyuwo mweemerenryaanyu.
12 Vano, waakhanle wi ninnalaleerya wi Kristu ooviihiwa mwa alipa ookhwa, onaweryeya hai wi akina a nyuwo enaloca wi hiwaavo oviihiwa wa alipa ookhwa?
13 Chiri waarimwi ohirivo oviihiwa wa alipa ookhwa, Kristu haviihiwe tho mookhwani.
14 Nto yaarimwi Kristu ahiviihiwe mookhwani, chiryene olaleerya wahu ti wa siiyo, nave nroromelo nanyu tho ti na siiyo.
15 Ohiya yeeyo, ninnakhala tho anamoona atheru a Muluku, ntakhara ninnamweerela onamoona Muluku nlocaka wi owo omviiha Kristu, yoowo owo ohimviihaleiye, waakhanle wi chiryene alipa ookhwa heviihiwa mookhwani.
16 Tiwi, waakhanle wi alipa ookhwa heviihiwa, Kristu haviihiwe tho mookhwani.
17 Nave wakhala wi Kristu haviihiwe mookhwani, nroromelo nanyu ti natheru; nyuwo nlelo munnatitelela mu soocheka sanyu.
18 Nave tho yaale arumpe mookhwani mwawiiwanana ni Kristu, aarimeela.
19 Waakhanle wi mu okumi yoola pahiru nnamuwehererya Kristu, nri oohasuwa* waapwaha achu oothene.
20 Nto vano Kristu ooviihiwa mwa alipa ookhwa, ntoko yawiima yoopacerya* wa yaale arumpe mookhwani.
21 Woona wi okhwa oruule mwa muchu mmoha, ovinya mookhwani wa alipa ookhwa onarwa tho moorweela wa muchu mmoha.
22 Tiwi hiihaa ntoko mwa Atamu oothene anakhwaaya, hiiha tho mwa Kristu oothene enarwa yaakhela okumi.
23 Nyenya muchu ti muchu mu elukuluku awe: Kristu ntoko sawiima soopacerya,* voocharela yaale ari a Kristu variyari va orwa wawe.
24 Voocharela, makuchuwelo, vaavaa oneereiye aveleenle Omwene wa Muluku awe ni Tiithi, amanle omalihavo olamulelo woothene, owerya woothene ni ikuru.
25 Tiwi owo onnaphwanela olamulela ntoko mwene ophiyerya Muluku aakunhe amwiicani oothene vathi va inaani sawe.
26 Nave mwiicani ookuchula oni amalihiwe ti okhwa.
27 Vawi Muluku “oomvahererya ichu soothene vathi va inaani sawe.” Nto vaavaa owo onaloceiye wi ‘ichu soothene omvahererya,’ eyo henooniherya wi onamphitaanyerya Yoole omvaherenrye ichu soothene.
28 Nyenya vaavaa oneereiye avahereryiwe ichu soothene, voocharela, Mwaana onarwa amwiiwelela Yoole omvaherenrye ichu soothene, wi Muluku akhale soothene wa oothene.
29 Yaarimwi alipa ookhwa ehiviihiwaka mookhwani, tiheeni eneeraaya epake yaawo anapatisiwa ni yoolakelela ya okhala alipa ookhwa? Waakhanle wi chiryene alipa ookhwa heviihiwa mookhwani, vano ntakhara heeni awo anapatisiwaaya ni yoolakelela yeela?
30 Ntakhara heeni hiyaano tho nnakhalaahu va yawoopiha ewora* yoothene?
31 Kinnahoolela okhwa nihiku nnihiku. Anna, ela eparipari hiiha ntoko wiithamala kiryaakano ntakhara nyuwo, mwa Kristu Yesu Apwiya ahu.
32 Waakhanle wi koowana ni asinama awoopiha a o Efesu, ntoko alopwana akina,* kinaphuranvo? Wakhala wi alipa ookhwa heni eviihiwe, “nilye, niwurye, woona wi omeelo nnamukhwa.”
33 Muhiwokiwe. Onthamwene woonanara onnapahula meecelo aphaama.
34 Mwaakamuwe moophwanelela mweeraka yeeyo eri yawookololowa nave muhipakeke yoocheka, tiwi akina haano masuwelelo a Muluku. Kinaloca yeela wi kiwuuliheeni muru.
35 Nto mukina oni: “Alipa ookhwa eni eviihiwe hai? Aa, eni eviihiwe ni mwiili wa mukhalelo taani?”
36 Khamiruku we! Yeeyo onaalaawe henakhala ni okumi ehipacenrye okhwa.
37 Nave yeeyo onaalaawe, tahi mwiili onahaala winnuwa, nto pahiru enuku, moohipwacha yaari enuku ya tiriku naari mmiso mukina;
38 nto Muluku onnavaha enuku mwiili mmoha mwawiiwanana ni okhwela wawe, nave onnavaha enuku ti enuku mwiili aya ene.
39 Hiwaavo mwiili woolikana ni mukina, nto wookhalavo mwiili wa achu, wookhalavo tho mwiili wa imope, mwiili wa ipalame, ni mwiili wa ihopa.
40 Nave sookhalavo miili sa wirimu ni miili sa veelaponi; nto ncicimiho na miili sa wirimu nikina, nave ncicimiho na miili sa veelaponi ti soohiyana.
41 Ncicimiho na nsuwa nikina, ncicimiho na mweeri nikina, nave ncicimiho na itheneeri nikina; mweeparipari ncicimiho na etheneeri emoha ti noohiyana ni ncicimiho na etheneeri ekina.
42 Emohamoha tho enneereya ni oviihiwa wa alipa ookhwa. Onaaliwa mwiili onuuca nave onaviihiwa mwiili ohinuuca.
43 Onaaliwa moonyemuwa nave onaviihiwa mwa ncicimiho. Onaaliwa mu oceecheya nave onaviihiwa mu ikuru.
44 Onaaliwa mwiili woomuchu nave onaviihiwa mwiili woomunepani. Wakhala wi wookhalavo mwiili woomuchu, wookhalavo tho mwiili woomunepani.
45 Mwawiihiiha yoorempwa: “Mulopwana oopacerya Atamu, aakhala muchu mukumi.” Atamu ookuchula aakhala munepa yoowo onavaha okumi.
46 Nyenya onarwa woopacerya tahi woomunepani. Yoowo onarwa voopacerya ti woomwiilini, nave voocharela woomunepani.
47 Mulopwana oopacerya orwiile vacheyani nave opakiwe ni nchupi; mulopwana anaawiili orwiile wirimu.
48 Moolikana ni yoole opakiwe ni nchupi emohamoha tho ni yaale apakiwe ni nchupi; nave moolikana ni yoole a wirimu, emohamoha ni yaale tho a wirimu.
49 Nave hiiha ntoko niwanraahu eruku ya yoole opakiwe ni nchupi, nnarwa tho niwara eruku ya yoole a wirimu.
50 Nyenya kinnooleelaani ela anna: Mwiili nnikhami hasinawerya waakhela Omwene wa Muluku, naari mwiili onuuca waakhela okumi ohinuuca.
51 Wiriyanani! Kinnooleelaani yoovitheya yaweela: Tahi wi oothene nnarwa nrupa mookhwani, nyenya oothene nnarwa ntatuxiwa,
52 mu elukuluku emoha, mu owaphila wa niitho, variyari va oruma wookuchula wa nipenka. Tiwi nipenka nnamwiiweya, nave alipa ookhwa enarwa eviihiwa ni mwiili woohuuca, nave hiyo nnarwa ntatuxiwa.
53 Vawi, yoola onuuca onnaphwanela owara ohuuca, nave yoola onakhwa onnaphwanela owara ohikhwa.
54 Nto, vaavaa mwiili ola onuuca oneeraaya owarihiwe ohuuca, nave ola onakhwa oneeraaya owarihiwe ohikhwa, voocharela anahaala waakhwanela masu arempwe: “Okhwa woomiryiwa okhala wookhala.”
55 “Okhwa we, ori woowi ovootha waa? Okhwa we, ori woowi mpuulaa?”*
56 Mpuula onaruuha* okhwa ti ocheka, nave ikuru sa yoocheka ti Nlamulo.*
57 Mathamalelo eye wa Muluku, woona wi onnanivaha ovootha moorweela wa Apwiya ahu Yesu Kristu!
58 Mwawiihiiha, asinnaka oosiveliwa, khalani awiithipela, oohicikinyeya, mpharakaxa muteko wa Apwiya mahiku oothene, musuwelaka wi muteko anyu wakuru mwa Apwiya tahi wa siiyo.
Inoota
^ Awiichaniwa tho Petru.
^ Naari: “ninnaphwanela okhupanyeriwa.”
^ Naari: “mulepulo.”
^ Naari: “mulepulo.”
^ Naari: “elukuluku.”
^ Naari akhweya: “mmoonelo woomuchu.”
^ Naari: “ekopo aa ya muthipo.”
^ Naari: “Ekopo ya muthipo enaruuha.”
^ Naari: “nave Nlamulo ninnavaha ikuru yoocheka.”
