1 Atesalonika 3:1-13
3 Mwawiihiiha, vaavaa nahaaweryaahu ovilela nihiwoonakaani, naahoona okhala yaphaama okhala meekhihu o Atena;
2 nave naamurumiha Timotiyu wa nyuwo, munnihu ni namuteko a Muluku* mu olaleerya michaka saphaama vooloca sa Kristu, wi oolipiheeni* ni woohakararyaani mu nroromelo nanyu,
3 wi ahikhale oni acikinyeye wanthowa na soohooxa seiha. Woona wi nyuwaano moosuwela phaama ene wi hinnawerya orapela soohooxa seiha.*
4 Tiwi, vaavaa naaryaahu vamoha ni nyuwo, naanooleelaani woosiilo ene wi naahaala weeteteyano* soohooxa, nave ti yeela eneereya, hiiha ntoko munasuwelaanyu.
5 Ti nthowa nene wi vaavaa kahaaweryaaka oweherya tho, kaamuruma Timotiyu wi kisuwele sa ororomeleya wanyu, koovaka wi mulipa a weeha owo onamoohuwelihaani nave muteko ahu niphanraahu mwakuru okhale wa siiyo.
6 Nto Timotiyu onamphiyaru nave oonileela sa michaka saphaama vooloca sa ororomeleya wanyu ni osivela, nave onleela wi nyuwaano munnatitelela onuupuwela mwaphaama mahiku oothene nave munnachuna onoona, hiiha ntoko hiyaano tho nnachunaahu owoonaani.
7 Ti nthowa nene anna, wi mmakacamiho ahu* oothene ni soohooxa, naahakararyiwa wanthowa na nyuwo ni ororomeleya munooniheryaanyu.
8 Tiwi, wakhala wi munnatitelela otikitheryeya mwa Apwiya, hiyaano ninnakhala akumi.
9 Vano nni niwerye hai omuthamalela Muluku wanthowa na nyuwo nave wanthowa na ohakalala otokweene nnoonaahu vamiithoni va Muluku ahu ntakhara nyuwo?
10 Ohiyu ni othana ninnapaka mavekelo a vathi va murima moolucuwa wi noonane ethoi ni ethoi nave wi naakhwaniherye yeeyo enahalela mu nroromelo nanyu.
11 Vano Muluku mwaneene, Atiithi ahu, ni Apwiya ahu Yesu ehule ephiro wi hiyo nirwe wa nyuwo.
12 Opwaha yeela, Apwiya ewinnuwiheeni, aa, yaaceererye osivela wanyu wa mukina ni mukhwaawe ni wa achu oothene, hiiha ntoko osivela wahu onaaceereryeyaaya ntakhara nyuwo;
13 hiiha, awo anamutikitherya murima anyu, wi mukhale aweelihiwa ni oohikhalano nthowa vamiithoni va Muluku ahu ni Atiithi, variyari va orwa wa Apwiya ahu Yesu vamoha ni aweela murima awe oothene.
Inoota
^ Naari akhweya: “onlapa ni Muluku.”
^ Naari: “ootikitheryeeni.”
^ Naari: “wi hiyaano noothanleliwa ichu seiha.”
^ Naari: “okumanano; wuukhuwano.”
^ Mu Ekriki, “mu soothowa sahu.”
