Liivuru Oopacerya a Matharihelo 10:1-14
-
Okhwa wa Sawuli ni anamwan6e awe (1-14)
10 Afilisti yaawana ni Isarayeli. Alopwana ancipale a Isarayeli yaahaachawa Afilisti, nave ancipale yaahiiphiwa o mwaako Xilipowa.
2 Afilisti yaamwiikara Sawuli ni anaawe, nave Afilisti yaamwiipha Yonata, Apinatape ni Malkisuwa, anamwane a Sawuli.
3 Mukhico waatepa nave Sawuli aaweryiwa; alipa oovonya munra yaamphwanya Sawuli nave owo aaphoreihiwa ni alipa oovonya munra.
4 Sawuli aaloca wa mukhaviheryi awe aateexa eyaakiho ariki: “Ohulule nlema nave okiiphe, wi achu ala oohithikiliwa ehikikhalihe mwamunyemu.”* Nyenya mukhaviheryi awe aateexa eyaakiho haachunne weerano, woona wi aatepa woova. Mwawiihiiha, Sawuli aakuxa nlema nave iirihelavo.
5 Vaavaa mukhaviheryi awe aateexa eyaakiho oonneiye wi Sawuli aahikhwa, owo tho aahiirihela va nlema nave akhwa.
6 Mwawiihiiha, Sawuli ni anaawe araru yaahikhwa nave oothene aveechokoni vawe yaahikhwa vamoha.
7 Vaavaa Aisarayeli oothene yaakhala ompopa yoonnaaya wi anakhoco yaahichawa nave wi Sawuli ni anamwane awe yaahiiphiwa, yaahiya ipooma saya nave echawa. Voocharela, Afilisti yaarwa nave enakhalamo.
8 Mu nihiku noocharela, vaavaa Afilisti yaakelaaya okuxa ichu sa achu yiiphiwe, yaamphwanya Sawuli ni anaawe ekhwile o mwaako Xilipowa.
9 Mwawiihiiha, yaamurula Sawuli, ekwasa muru awe nave ekuxa ichu sawe sakhoco. Yaahaarumiha anamichaka mu elapo yoothene ya Afilisti nave muchaka waamwaramwaxeya wa amiluku aya ni wa achu.
10 Voocharela, awo yaahela ichu sawe mu empa ya muluku aya nave yaahithomeya muru awe mu empa ya Takoni.
11 Vaavaa achu oothene o Xapesi, o Kiliyati, yiiwalaaya ichu soothene Afilisti yaamweerenlaaya Sawuli,
12 anakhoco oothene yaakuxa muruchu wa Sawuli ni miruchu sa anaawe nave ekeriha o Xapesi. Awo yaavitha makhuva ene vathi va mwiri mutokweene o Xapesi nave yaahiinanela olya mmahiku mathanu nameeli.
13 Mwawiihiiha, Sawuli aahikhwa wa nthowa na ohikhala oororomeleya wa Yehova, moorweela wa ohiiwelela masu a Yehova; nave tho wa nthowa na omukoha muthiyana yoowo aakoherya minepa sa achu ookhwa,
14 ohiyana omukoha Yehova. Mwawiihiiha, owo aamwiipha nave omwene awe aamunnya Tavite, mwaana a Yese.
Inoota
^ Naari: “moonanara.”
