Liivuru Oopacerya a Matharihelo 12:1-40
-
Akhaviherye a olamulelo wa Tavite (1-40)
12 Ala yaari alopwana yaawo yaamphwannye Tavite o Sikalaki vaavaa ahaaweryeiye weeca wa nthowa na omoova Sawuli mwaana a Kixi; nave awo yaari akina a anakhoco oowerya yaawo yaamukhavihenrye Tavite okhoconi.
2 Awo yaari alipa oovonya munra yaapharihela nwono woolopwana ni woothiyana wi evonye nluku va exapala naari nivaka va munra. Awo yaari asinna a Sawuli, a nihimo na Penxami.
3 Muhooleli aari Asiyeri vamoha ni Yowasi, oopiili yaari anamwane a Sema o Kipeya. Aakhalavo tho Yasiyeli ni Peleti, anamwane a Asimaveti; Peraka, Xewu, o Anatoti.
4 Isimaiya Mukapawoni, aari muhooleli ni mmoha a anakhoco oowerya makhumi mararu; Yeremiya, Yasiyeli, Yohanani, Yosapati o Keterati;
5 Elusai, Yarimoti, Peyaliya, Semariya, Sefatiya o Harifita;
6 Elikana, Isiya, Asareli, Xoweseri ni Yasopiya, Akoraita;
7 Yowela, Sepatiya anamwane a Yerowamu o Xetor.
8 Akina a Akatita yaakhala mmakupa a Tavite o nipuro na nchawelo, otakhwani. Awo yaari anakhoco oowerya, anakhoco oovyakihiwa ntakhara owana, anakhoco yaarino iyaakiho itokweene ni mavaka, ithoi saya saari ntoko sa amwaco nave awo yaaneeca mwawaakuveya ntoko anaahe mmiyaakoni.
9 Eser aari muhooleli, Opatiya aari anaawiili, Eliyapi aneeraru;
10 Misimana aneexexe, Yeremiya aneethanu;
11 Atai aneethanu nammoha, Eliyeli aneethanu napiili;
12 Yohanani aneethanu nararu, Elisapati aneethanu naxexe;
13 Yeremiya aneekhumi, Makipanai aneekhumi nammoha.
14 Ooceecheya aanaawerya amwiicani nsana,* akuru aanawerya amwiicani ncikhwi nimoha.*
15 Awo yaalapuwa muhice Yortano mu mweeri woopacerya elukuluku owo waasareyaaya oviraka mukhwipi nave yaawiikara oothene yaakhala mpopani makupa onakhumawo nsuwa ni onayawo nsuwa.
16 Alopwana akina a Penxami ni a Yuta yaaya tho wa Tavite o nipuro nawe na nchawelo.
17 Voocharela, Tavite aahaathikirerya yaawo nave aloca ariki: “Mwaarwiile wa miyaano mmureceleni wi mukikhaviherye, kinanwaakhelaani ni murima woothene. Nto, mwaarweenle wi mukiveleele wa amwiicani aka naari kihenre echu yoonanara, Muluku a makholo ahu avarerye yeela nave athorihe.”
18 Voocharela, munepa wa Muluku waamvolowela Amasayi muhooleli a nikhuuru na anakhoco makhumi mararu aloca wa Tavite ariki:
“Tavite, hiyaano na awinyu nave nri ni nyuwaano, mwaana a Yese.
Murecele, murecele okhale ni nyuwaano, murecele okhale ni yaale anookhaviheryaani,Ntakhara Muluku tonookhaviheryaani.”
Mwawiihiiha, Tavite aawaakhela nave aavaha murici wa okhala ahooleli a anakhoco.
19 Alopwana akina a Manase yaakhala tho mmakupa a Tavite vaavaa owo aareiye ni Afilisti wi ewane ni Sawuli. Nyenya Tavite haakhavihenrye Afilisti woona wi alamuleli a Afilisti, emanle ovaanela, yaahimurowiha, eloca eriki: “Ola onahaala okhala mmakupa a Sawuli pwiyawe, nave eyo enamweeriha wi niiphiwe.”
20 Alopwana yiiperenkhe wa Tavite a nihiku na Manase, vaavaa owo aaphin’yeiye o Sikalaki yaari ala: Atina, Yosapati, Yatiyeli, Mikayeli, Yosapati, Elihu ni Siletai ahooleli a makhuuru a anakhoco ncikhwi a nihimo na Manase.
21 Yaala yaamukhaviherya Tavite owana nnikhuuru na alipa oohuhula woona wi oothene yaala yaari alopwana oowerya ni oolipa murima nave yaahikhala ahooleli a anakhoco.
22 Nihiku ti nihiku achu yaanarwa wi emukhaviherye Tavite, ophiyerya wi owo aakhalano muloko mutokweene wa anakhoco, ntoko anakhoco a Muluku.
23 Ala yaari ahooleli a anakhoco yaari ooreheryeya ntakhara ekhoco yaawo yaakele wa Tavite o Heporoni wi ethaamihe omwene wa Sawuli emunnyaka Tavite mwawiiwanana ni masu a Yehova.
24 Alopwana a Yuta yaawo yaari ooreheryeya owana nave yaateesa iyaakiho itokweene ni mavaka, yaari macikhwi mathanu nammoha ni masana mathanu namararu.*
25 A nihimo na Simiyone, anakhoco oowerya ni oolipa murima, yaari macikhwi mathanu nameeli ni nsana nimoha.*
26 Wa Alevi, alopwana macikhwi maxexe ni masana mathanu nammoha.*
27 Yehoyata aari muhooleli a anamwane a Aroni, nave ni yoowo yaakhalavo alopwana macikhwi mararu ni masana makhumi mathanu nameeli.*
28 Nave tho aakhalavo Satoki mmiravo oowerya ni oolipa murima, vamoha ni yoowo yaakhalavo ahooleli makhumi meeli napiili a imusi sa makholo aya.
29 A nihiku na Penxami, asinna Sawuli, yaakhalavo alopwana macikhwi mararu* nave ancipale a yaawo yaari oororomeleya ekhaviheryaka emusi ya Sawuli.
30 A nloko na Efraimu, yaakhalavo alopwana macikhwi makhumi meeli ni masana mathanu namararu,* alopwana oowerya ni oolipa murima yaawo yaari oovuwa mu imusi sa makholo aya.
31 Eriyari ya nihimo na Manase, yaakhalavo alopwana macikhwi khumi nathanu nararu* yaawo yaathanliwe eromoliwaka masina aya, wi eye wa Tavite ni omweera mwene.
32 A nihimo na Isakari, yaawo yiiwexexa ilukuluku ni osuwela yeeyo Isarayeli onaphwaneleiye weera, yaakhalavo ahooleli aya masana meeli.* Nave asinnaya oothene ti yaahoolela.
33 A nihimo na Sepuloni, yaakhalavo alopwana macikhwi makhumi mathanu* yaawo yaawerya oya okhoconi ethatanne, erinono ikaruma soothene sakhoco. Oothene yaanamukhaviherya Tavite moororomeleya.*
34 A nihimo na Nafitali yaakhalavo ahooleli ncikhwi nimoha,* vamoha ni yaawo yaakhalavo alopwana macikhwi makhumi mararu nathanu napiili* ooreheryeya erino iyaakiho itokweene ni mavaka.
35 A nihimo na Tani, yaawo yaawerya oya okhoconi ethatanne, yaari macikhwi makhumi meeli nathanu nararu ni masana mathanu nammoha.*
36 A nihimo na Aseri, yaawo yaawerya oya okhoconi ethatanne, yaari macikhwi makhumi maxexe.*
37 Makupa makina a Yortano, nihimo na Rupeni ni na Kati ni eriyari ya nihimo na Manase, yaakhalavo anakhoco macikhwi nsana nimoha ni makhumi meeli* ooreheryeya ni ikaruma sa mukhalelo woothene sakhoco.
38 Alopwana oothene yaala yaari anakhoco, yaawo yiiperenkhe o nipuro na owana ekhoco. Awo yaaya o Heporoni ni murima mmoha elakelenle omweera Tavite mwene a Isarayeli oothene, nave Aisarayeli oothene tho yaari awiiwanana echunaka* omweera Tavite mwene.
39 Nave awo yaamaliha mahiku mararu ni Tavite, elyaaka ni owurya, woona wi asinnaya yaarehererya yoolya ntakhara yaawo.
40 Nave tho achu a ilapo sa vakhiviru ni yaale ene oociiwene a nihimo na Isakari, Sepuloni, ni Nafitali yaanaruuha soolya eteexaka ni apuuru, akamelu, muula ni imope. Yaanaruuha ephepa, ipoolu, sawiima, eviinyu ni makhurwa nave tho yaaruuha imope ni ipucepuche sincipale, woona wi waakhalawo ohakalala o Isarayeli.
Inoota
^ 100.
^ 1000.
^ 6.800.
^ 7.100.
^ 4.600.
^ 3.700.
^ 3.000.
^ 20.800.
^ 18.000
^ 200.
^ 50.000.
^ Naari: “oothene yaamukhaviherya Tavite ehirino mirima miili.”
^ 1000.
^ 37.000.
^ 28.600.
^ 40.000.
^ 120.000.
^ Naari: “erino murima mmoha.”
