Liivuru Oopacerya a Matharihelo 13:1-14
13 Tavite aahaakoha ahooleli a nikhuuru ncikhwi ni a nikhuuru nsana vamoha ni asitokweene oothene.
2 Voocharela, Tavite aaloca ni muloko woothene wa Isarayeli ariki: “Wakhala wi mohoona wi ti yaphaama nave Yehova Muluku ahu eemererya, naarumihe anamichaka wa asinnihu oohalela mmakupa oothene a Isarayeli, ni alipa a mukucho vamoha ni Alevi, mu ipooma saya* wi erwe ekhale vamoha ni hiyo.
3 Nave nimuruuhe arka a Muluku ahu.” Tiwi, awo hiyaamukhapelenle mmahiku a Sawuli.
4 Muloko woothene waaheemererya weerano yeeyo, woona wi eyo yaahaahakalaliha achu oothene.
5 Mwawiihiiha, Tavite aahimuthukumanya Isarayeli oothene, ovinyerya o muhice wo* Yikuputu ophiyerya o Lepo-hamati,* wi emuruuhewo o Kiriyati-xeyarimi arka a Muluku eeparipari.
6 Tavite ni Isarayeli oothene, yaaya o Pala, ela tiwi, o Kiriyati-xeyarimi makupa o Yuta wi emuruuhe arka a Muluku eeparipari, Yehova, yoowo okiranthi vasulu* va Akerupi, weiwo nniichaniwaayawo nsina nawe.
7 Mwawiihiiha, awo yaamukuxa arka a Muluku eeparipari emuhela mu ekarowaxe evyaani nave emukeriha vaate va Apinatape; Usa ni Aiyo ti yeeciha ekarowaxe.
8 Tavite ni Isarayeli oothene yaapaka efesta vamiithoni va Muluku eeparipari ni ikuru saya soothene, yiipaka macipo, ewiipaka apankwe, achakare, ikoma, mapeca ni ikaruma ikina sa macipo.
9 Nto, vaavaa yaaphin’yaaya o nipuro na wiipichavo o Kitoni, Usa aahookola ntata nave amphareela arka, woona wi imope saahanle vakhaani ommoriha.
10 Mwa yeeyo, Yehova aananariwa ni Usa, nave owo aamwiipha wa nthowa na wookola ntata nawe wi amphareele arka, nave Usa aakhwa vaavale vamiithoni va Muluku.
11 Nyenya Tavite aatikhiniheya* woona wi esara ya Yehova yaanyahuwela wa Usa. Nave nipuro nenle nniichaniwa Peresi-usa* ophiyerya olelo.
12 Tavite aatepa omoova Muluku eeparipari mu nihiku nenle nave aloca ariki: “Kini kiwerye hai omukuxa arka a Muluku eeparipari wi kimukerihe mu epooma aka?”
13 Tavite haamukunse arka amukerihaka aakhaleiyewo, mu epooma ya Tavite, nyenya aalamulela wi owo akuxiwe akerihiwaka vaate va Opeti-etomi, Muketite.
14 Arka a Muluku eeparipari aari ni aveechokoni a Opeti-etomi. Arka aakhala vaate vawe miyeeri miraru nave Yehova aanaareeliha aveechokoni a Opeti-etomi ni soothene aareiyeno.
Inoota
^ Mu Ehepiri, “ipooma saya ni mapuro oolyihamo mihuwo.”
^ Naari: “ovinyerya o Sihori.”
^ Naari: “mulako wa Hamati.”
^ Naari akhweya: “variyari va.”
^ Naari: “aananariwa.”
^ Enataphulela “ochooweliwa wa Usa.”
