Liivuru Oopacerya a Matharihelo 14:1-17
14 Iramu, mwene o Tiru, aahaarumiha anamichaka wa Tavite, vamoha ni ithaapwa sa seetru, alipa ooteka,* ni makarpinteru wi yamutekele empa* Tavite.
2 Nave Tavite aahisuwela wi Yehova aahimutikitherya owo ntoko mwene a Isarayeli, woona wi olamulelo awe waahivuwa wa nthowa na achu awe Isarayeli.
3 Tavite aahaathela athiyana ancipale o Yerusalemu, nave owo aahikhala tiithi a anamwane ancipale aasilopwana ni aasithiyana.
4 Masina a anamwane awe yaayariwe o Yerusalemu taala: Samowa, Sopapi, Natani, Solomoni,
5 Ipar, Elisuwa, Elipeleti,
6 Noka, Nefeki, Xafiya,
7 Elisama, Peliyata, ni Elifeleti.
8 Vaavaa Afilisti yaasuwenlaaya wi Tavite oothanliwa okhala mwene a Isarayeli oothene, Afilisti oothene yaaya omwaavya Tavite. Nto, vaavaa Tavite iiwaleiye sa yeeyo, owo aahiyawo wi awaneno.
9 Voocharela, Afilisti yaahirwa nave epacerya ohiphela mpopa wo Refaimi.
10 Tavite aamukoha Muluku ariki: “Apwanne kiyewo wi kawane ni Afilisti? Munahaala waaveleela mmatani mwaka?” Mwa yeeyo, Yehova aamwaakhula ariki: “Hawe, nave chiryene kinahaala waaveleela mmatani mwaa.”
11 Mwa yeeyo, Tavite aaya o Pal-perasimi, nave awiipha vaavale. Voocharela, Tavite aaloca ariki: “Muluku eeparipari oowana ni amwiicani aka moorweela wa mata aka, ntoko ocuuwa wa maahi aciiwale.” Ti nthowa nene awo yaachunwaaya nipuro nenle Pal-perasimi.*
12 Afilisti yaahaahiya amuluku aya vaavale, nave yaaheeyeliwa ni mooro vaavaa Tavite aalamulenleiye.
13 Ohoolo waya, Afilisti yaahiphela wanaawiili mpopa yoole.
14 Tavite aamukoha Muluku ekwaha yanaawiili, nyenya Muluku eeparipari aamwaakhula ariki: “Ohaathikirerye ohoolo. Moohiyana, oye oculi wa yaawo nave owaneno ohoolo wa miri sawunkhela.
15 Nave vaavaa oneeraawe wiiwe oruma wa mukhico osulu wa miri sawunkhela, owaneno woona wi Muluku eeparipari onahaala oya ohoolo waa wi awiiphe anakhoco a Afilisti.”
16 Mwawiihiiha, Tavite aaheerano hiihaa ntoko Muluku eeparipari aamulamulenleiye, nave awo yaawiipha anakhoco a Afilisti ovinyerya o Kipiyoni ophiyerya o Keseri.
17 Ovuwa wa Tavite waamwaramwaseya ilapo soothene, nave Yehova aaheeriha wi achu a maloko oothene enamoova Tavite.
