Liivuru Oopacerya a Matharihelo 17:1-27
17 Vaavaa Tavite aakhaleiye mu empa awe,* owo aaloca wa mulipa a miririmu Natani ariki: “Miyaano kinakhala mu empa ya seetru eniiha arka awaataana a Yehova akhalaka mmuxakalani wa ekuwo.”
2 Natani aamwaakhula Tavite ariki: “Mweereno soothene murima anyu onachunaaya, woona wi Muluku eeparipari ori ni nyuwo.”
3 Mu ohiyu ene yoole, Natani aahaakhela masu ala oorweela wa Muluku:
4 “Hawe nave wamuleele mulapeli aka Tavite oriki: ‘Yehova ooloca ariki: “Tahi weyaano oni oteke empa wi kikhalekemo.
5 Miyaano nkintonko okhala mu empa ovinyerya nihiku nenlo kaamviihalaaka Isarayeli o Yikuputu ophiyerya olelo nyenya kinnatitelela okhala mmuxakalani kiyaaka mmuxakalani, okhala mu tapernaakulu kiyaaka mu tapernaakulu mukina.*
6 Variyari va elukuluku yoothene keecaaka ni Isarayeli oothene, nkintonko oloca nsu nimoharu wa alipa oothoriha a Isarayeli yaawo kaathanlilaaka wi yaakukhuleke achu aka, kiriki: “Ntakhara heeni muhinakipakelaanyu empa ya seetru?’”’
7 “Vano, omuleele mulapeli aka Tavite oriki: ‘Yehova a anakhoco ooloca ariki: “Miyaano kohookuxawo mmapuro a olyihawo mihuwo, weiwo waacharaawewo mihuwo, wi okhale muhooleli a nloko naka Isarayeli.
8 Kinamukhala ni weyo ori woothewene oneeraawe oyewo nave kinamwaatoloxa* amwiicani aa vamiithoni vaa. Nave kinarwa kipaka nsina ntakhara weyo nsina nenlo nnalikana ni achu oovuwa a veelaponi ya vathi.
9 Kinahaala othanla nipuro ntakhara achu aka Isarayeli nave kinamwaatikitharya weiwo. Awo enarwa ekhala weiwo nave haavo oni awuukhuleke; nave amutakhali herwa yaahooxa* ntoko yeerelaaya khalai,
10 ovinyerya nihiku nenlo kaathanlilaaka athoriha ntakhara nloko naka Isarayeli. Nave kinahaala waatoloxa amwiicani aa. Ohiya yeeyoru, kinnooleela kiriki: ‘Yehova onarwa ateka empa* ntakhara weyo.’
11 “‘“Vaavaa eneeraaya ephiye makuchuwelo a mahiku aa nave weyo okhwe,* kinahaala weeriha wi okhumelele muyareriwo aa,* mmoha a namwane aa nave kinamutikitherya olamulelo awe okhale woolipa.
12 Ti yoowo oni ateke empa ntakhara miyo, nave kinamutikitherya munyukhu awe okhala wookhala.
13 Kinamukhala tiithi awe, nave owo onarwa akhala mwanaka. Nkirwa kiviihavo wa yoowo osivela waka woororomeleya, hiiha ntoko kaaviihalaakavo wa yoole aalamulenle weyaano ohaakumve.
14 Kinammutikitherya yoowo mu empa aka, ni mu olamulelo aka okhala wookhala, nave munyukhu awe onamukhala okhala wookhala.”’”
15 Natani aamuleela Tavite masu yaala oothene ni yawoona yeela yoothene.
16 Mwawiihiiha, mwene Tavite aavolowa nave akiraathi vamiithoni va Yehova aloca ariki: “Miyaano kaani, khwoo Yehova Muluku? Nave emusi aka tiheeni mukeerinhaanyu wi kiphiye vaava?
17 Khwoo Muluku, woona wi yeela yaari echu yavakhaani wa nyuwo, munnaloca tho sa empa ya Mulapeli anyu wi enahaala otitelela okhala ophiyerya elukuluku ya muhoolo, nave nyuwo mookoona ntoko wi kamuchu yoowo onaphwanela ovuwihiwa,* khwoo Yehova Muluku.
18 Echu taani ekina miyaano, kapuro anyu Tavite kineeraaka kooleeleeni vooloca sa ncicimiho nenlo munakivahaanyu, woona wi moomusuwela phaama kapuro anyu?
19 Khwoo Yehova, wa nthowa na kapuro anyu nave mwawiiwanana ni yookhwela anyu moopaka ichu seiha soothene itokweene moorweela wa wuupulula otokweene anyu.*
20 Khwoo Yehova, haavo mukina onlikana ni nyuwo, nave haavo muluku mukina voohikhala nyuwo; ichu soothene maaru ahu iiwalaaya anneerela onamoona sa yeeyo.
21 Nloko taani na veelaponi ya vathi nnalikana ni nloko nanyu Isarayeli? Muluku eeparipari aawoopola ntoko achu awe. Moopaka nsina ntakhara nyuwo moorweela wa weera ichu itokotoko ni sootikhiniha, mwiikaraka maloko vamiithoni va achu anyu, yaawo nwooponlaanyu o Yikuputu.
22 Moheeriha wi nloko nanyu Isarayeli, ekhale achu anyu ilukuluku soothene; nave nyuwo Yehova, mookhala Muluku aya.
23 Vano, khwoo Yehova, yoororomeliha mpankaanyu vooloca sa mulapeli anyu ni empa awe, mooniherye okhala yoororomeleya ilukuluku soothene nave mweereno ntoko muroromelinhaanyu.
24 Nsina nanyu niikhaleleru* nave nivuwihiwe okhala wookhala, wi achu eloce eriki: ‘Yehova a anakhoco, Muluku a Isarayeli, ti Muluku a Isarayeli,’ nave empa ya mulapeli anyu Tavite etikitheryiwe moolipa vamiithoni vanyu.
25 Woona wi nyuwo, Muluku aka, mohuupulula wa mulapeli anyu yookhwela anyu ya omutekela empa.* Ti nthowa nene mulapeli anyu onaroromeleiye anapaka nivekelo nenla wa nyuwo.
26 Nave vano, khwoo Yehova, nyuwo mwa Muluku eeparipari, nave nyuwo moororomeliha ichu seiha saphaama vooloca sa mulapeli anyu.
27 Mwawiihiiha, yoohakalaliheeni oreeliha echoko ya mulapeli anyu, nave eyo etitelele okhala wookhala vamiithoni vanyu, woona wi nyuwo Yehova mooreeliha nave eyo enahaala oreelihiwa okhala wookhala.”
Inoota
^ Naari: “empa ya omwene.”
^ Naari akhweya: anataphulela “nipuro nenlo musakala weemesiwaayavo okerihiwaka nipuro nikina ni nipuro na okhalavo eyaaka nipuro nikina.”
^ Mu Ehepiri, “waakwasavo.”
^ Mu Ehepiri, “waakukhumula.”
^ Naari: “omwene woohiyeriwa.”
^ Mu Ehepiri, “okhale ni makholo aa.”
^ Mu Ehepiri, “mmiso.”
^ Naari: “kamuchu oocicimiheya.”
^ Naari: “mwawiiwanana ni murima anyu.”
^ Naari: “nooniherye okhala noororomeleya.”
^ Naari: “omwene woohiyeriwa.”
