Liivuru Oopacerya a Matharihelo 18:1-17
-
Ovootha wa Tavite (1-13)
18 Evinrevo elukuluku ohoolo waya, Tavite aahaavootha Afilisti eceecheya nave akuxa epooma yo Kati ni miceche saya soorukurerya mmatani mwa Afilisti.
2 Voocharela, owo aamvootha Mowape, nave Amowape yaakhala anamuteko a Tavite enamuliva muxokho.
3 Tavite aamvootha mwene Hatateseri o Sopa waacamela o Hamati vaavaa Hatateseri aayeiye otikitherya olamulelo awe o makupa a muhice Ewufrate.
4 Tavite aaphara ikaaro sakhoco ncikhwi* sa Hatateseri, alipa ooweeciha akavalu macikhwi mathanu nameeli* ni anakhoco yeeca ni meco macikhwi makhumi meeli.* Voocharela, Tavite aakwasa misiphe sa akavalo oothene yeeciha ikaaro sakhoco, aahiya nsana.*
5 Vaavaa Asiriya o Tamasko yaaruulaaya wi emukhaviherye mwene Hatateseri o Sopa, Tavite aawiipha Asiriya macikhwi makhumi meeli nameeli.*
6 Voocharela, Tavite aahaahelawo anakhoco o Siriya o Tamasko, nave Asiriya yaakhala anamuteko a Tavite enamuliva musokho. Yehova aanamvaha Tavite ovootha* woothewene aayeiyewo.
7 Ohiya yeeyoru, Tavite aakusa iyaakiho sa ooru sa anamuteko a Hatateseri nave akeriha o Yerusalemu.
8 Tavite aakusa tho muchove wawaaca o Tipati ni o Kuni, ipooma sa Hatateseri. Ti yoowo Solomoni aapharihenleiye apakakano epasiya etokweene ya maahi yiichaniwa ephareya, nave tho aapakano apoco, ni ikaruma sa muchove.
9 Vaavaa Mwene Towu o Hamati iiwaleiye wi Tavite aahavootha anakhoco oothene Hatateseri o Sopa,
10 mwawaakuveya owo aamuruma mwanawe Hatoramu wa Mwene Tavite wi amuxelihe ni omuthamalela wa nthowa na omvootha wawe Hatateseri (woona wi Hatateseri aanawana wiiliwiili ni Towu), nave owo aaruuha ichu sa mukhalelo woothene sa ooru, eparata, ni muchove.
11 Mwene Tavite aaheeliha seiho wa Yehova, vamoha ni eparata ni ooru seiho aakunxeiye wa maloko oothene ala: Etomi, Mowape, Amoni, Afilisti ni Amaleki.
12 Apisai mwaana a Seruya aahiwiipha a Etomi macikhwi khumi nathanu nararu Ompopa wa Maakha.
13 Owo aahaahelawo anakhoco o Etomi nave achu oothene o Etomi yaahikhala anamuteko a Tavite. Yehova aanamvaha Tavite ovootha* woothewene aayeiyewo.
14 Tavite aanamulamulela Isarayeli oothene, nave aanaahoolela mweekhaikhai ni mwawookololowa achu awe oothene.
15 Yowapi mwaana a Seruya aari muhooleli a anakhoco; Yehosafati mwaana a Ahiluti aari namarepa a mwene.
16 Satoki mwaana a Ahitupi ni Ahimeleki mwaana a Apiyatare yaari alipa a mukucho, nave Savasa aari mulipa oorepa.
17 Penaiya mwaana a Yehoyata aahoolela Akereti ni Apeleti. Nave anamwane a Tavite yaari asitokweene a mwene.
