Liivuru Oopacerya a Matharihelo 19:1-19
19 Ohoolo waya, Nahasi mwene a Amoni aakhwa, nave mwanawe aakhala mwene mu nipuro nawe.
2 Mwa yeeyo, Tavite aaloca ariki: “Kinamooniherya osivela woororomeleya wa Hanuni, mwaana a Nahasi, woona wi apapa awe yaahooniherya osivela woororomeleya wa miyo.” Mwawiihiiha, Tavite aahaarumiha anamichaka awe wi yaamuhakararye wa nthowa na waayeleela apapa awe. Nyenya, vaavaa anamuteko a Tavite yaaphin’yaaya mu elapo ya Amoni wi yamuhakararye Hanuni,
3 ahooleli a Amoni yaaloca wa Hanuni eriki: “Apwanne munuupuwela wi Tavite aaruminhe anamuteko awe wi yoohakararyeeni wa nthowa na waacicimiha apapa anyu? Apwanne anamuteko a Tavite hiyaarweela ovarerya ni ohocela elapo wi yootoloxeeni?”
4 Mwawiihiiha, Hanuni aahaaphara anamuteko a Tavite, aacema ipweto saya nave akwasa soowara saya veeri, ovinyerya muyuununi oya vathi nave aalamulela wi eroweke.
5 Vaavaa Tavite aaleeliweiye echu yeeren’ye ni anamuteko awe, mwawaakuveya owo aahaarumiha alopwana akina wi yakumane ni yaawo woona wi yaatepa wuulihiwa muru; nave mwene aaloca ni yaawo ariki: “Mukhale o Yeriko ophiyerya ipweto sanyu imenle, nave voocharela, mukooke.”
6 Mu elukuluku aya, Amoni yaatannya esara ya Tavite. Mwawiihiiha, Hanuni ni Amoni yaarumiha italentu* ncikhwi* sa eparata wi eliveleno ikaaro sakhoco ni alipa ooweeciha akavalo o Mesopotamiya,* o Arami-maka ni o Sopa.
7 Awo yaathuma ikaaro sakhoco macikhwi masana mararu nameeli* vamoha tho ni mwene Maka ni anakhoco awe. Awo yaarwa nave ethukumana o Metepa. Amoni yaakhuma mu ipooma saya nave ethukumana ntakhara ekhoco.
8 Vaavaa Tavite iiwaleiye sa yeela, owo aamurumiha Yowapi ni anakhoco oothene, ophitaanyerya anakhoco awe oowerya.
9 Nave Amoni yaavinya ethatanne ntakhara ekhoco vamulako wa epooma, eniiha mamwene yaawo yaarwiile yaari mukhataaya mmakupa a emaca.
10 Vaavaa Yowapi oonneiye wi anakhoco yaanamurweela ohoolo ni oculi, owo aahaathanla anakhoco oophwanelela a Isarayeli nave aathataanya ntakhara ekhoco wi ewane ni Asiriya.
11 Owo aahaakuha alopwana oohalela ehooleliwaka* ni munnawe Apisai, wi aathataanye ntakhara ekhoco wi ewane ni Amoni.
12 Voocharela, Yowapi aaloca ariki: “Wakhala wi Asiriya annakiwerya, murwe mukaakihe; nyenya wakhala wi Amoni annooweryaani, kinanwaakihaani.
13 Nnaphwanela okhala oowerya ni oolipa murima ntakhara achu ahu ni ipooma sa Muluku ahu, nave Yehova onahaala weera yeeyo eri yaphaama vamiithoni vawe.”
14 Voocharela, Yowapi ni alopwana awe yaaya owana ni Asiriya, nave Asiriya yaachawa vamiithoni vawe.
15 Vaavaa Amoni yonnaaya wi Asiriya yaachawa, awo tho yaamuchawa Apisai munnawe Yowapi nave evolowa mpooma. Mwawiihiiha, Yowapi aakookela o Yerusalemu.
16 Vaava Asiriya yoonnaaya wi yaavoothiwa ni Isarayeli, yaahaarumiha anamichaka wi yaawope Asiriya yaawo yaari makupa a Muhice Eufrate,* yaahooleliwa ni Sofaki muhooleli a anakhoco a Hatateseri.
17 Iiwaleiye sa yeeyo, mwawaakuveya Tavite aahaathukumanya Aisarayeli oothene emulapuwa Yortano wi yakumane ni yaawo nave yaathataana ntakhara ekhoco. Tavite aahaathikirerya wi awane ni Asiriya, nave Asiriya yaawana ni yoowo.
18 Nyenya, Asiriya yaamuchawa Isarayeli; nave Tavite aawiipha alipa aweeciha ikaaro sakhoco macikhwi mathanu nameeli* ni anakhoco yeeca ni meco macikhwi makhumi maxexe;* aamwiipha tho Sofaki muhooleli a anakhoco.
19 Vaavaa anamuteko a Hatateseri yoonnaaya wi yaavoothiwa ni Isarayeli, mwawaakuveya awo yaapaka murecele ni Tavite nave awo yaakhala achu awe; nave Asiriya hiyaakhwenle tho waakhaviherya Amoni wanaawiili.
Inoota
^ Etalentu emoha yaakhwana ikiilu 34.2 Mmoone Apentisi 2.14
^ 1000.
^ Mu Ehepiri, “Arami-naharaimi.”
^ 32.000.
^ Mu Ehepiri, “eri mmatani mwa.”
^ Mu Ehepiri, “ekhopela ekina ya muhice.”
^ 7.000.
^ 40.000.
