Liivuru Oopacerya a Matharihelo 20:1-8
-
Nfilisti awoopiha onniiphiwa (4-8)
20 Wuupaceryani wa eyaakha, elukuluku mamwene yaakhumaaya eyaaka okhoconi, Yowapi aahaahoolela anakhoco mu elapo ya Amoni nave aroxa. Owo aayawo nave arica epooma yo Rapa aniiha Tavite ahanle o Yerusalemu. Yowapi aahiphela epooma yo Rapa nave atoloxa.
2 Voocharela ,Tavite aamurula Korowa mmuruni mwa Malka nave aahoona wi aanahokola etalentu* emoha ya ooru, nave yaakhalamo maluku asisapo; owo aawarihiwa Tavite. Nave tho Tavite aakuxa ichu sincipale mu epooma yeele.
3 Owo aahaaphara achu a epooma yeele nave aanaalapiha muteko wa osema maluku ni olapa ni ikaruma sa muthipo soonoliwa vamoha ni ipaso. Tavite aaheerano yeela mu ipooma soothene sa Amoni. Vookuchula, Tavite ni anakhoco awe oothene yaakookela o Yerusalemu.
4 Emanle weereya yeela, yaakhalavo ekhoco ni Afilisti o Keseri. Mu elukuluku yeeyo Sipekai, Muhusatita aamwiipha Sipai a muyareriwo wa Arefaimi nave Afilisti yaavoothiwa.
5 Yaakhalawo tho ekhoco ni Afilisti, nave Elihanani mwaana a Xairi, amwiipha Lami munnawe Koliya Muketeti, yoowo aarino nivaka mvico* aya waalikana ni poco.
6 Yaakhalawo ekhoco tho o Kati, weiwo aakhalawo mulopwana a mannuwelo awe ootikhiniha, yoowo aarino ikatha thanu nammoha ntata ti ntata nave tho mmeconi hiihaa. Opwexiherya soothene aarino ikatha makhumi meeli ni ikatha xexe. Nave owo aari a muyareriwo wa Arefaimi.
7 Owo aanaavaha mapokha Aisarayeli. Mwa yeeyo, Yonata mwaana a Simeya, munnawe Tavite, aamwiipha.
8 Ala yaari a muyareriwo wa Arefaimi o Kati, nave awo yaahiiphiwa ni Tavite vamoha ni anamuteko awe.
