Liivuru Oopacerya a Matharihelo 21:1-30
21 Voocharela, Satana* aamvinyerya Isarayeli nave aamweeriha Tavite waarepela Aisarayeli.
2 Mwawiihiiha, Tavite aaloca wa Yowapi ni ahooleli aachu ariki: “Haweni, mwaakontaare Aisarayeli ovinyerya o Persepa ophiyerya o Tani; voocharela mukiruuhele yoolokoha ene wi kisuwele waaca waya.”
3 Nyenya, Yowapi aaloca ariki: “Yehova awaaceererye achu awe ikwaha nsana!* Pwiya aka mwene, apwanne oothene yaawo tahi alapeli anyu pwiya aka? Ntakhara heeni munachunaanyu weerano yeela pwiya aka? Ntakhara heeni mwaahaalaanyu oruuhela epahu nloko na Isarayeli?”
4 Nto, mwene aalipixerya yooloca awe wa Yowapi. Mwawiihiiha, Yowapi aapwaha nave eeceeca makupa oothene a Isarayeli, vookuchula vaya, aahikookela o Yerusalemu.
5 Yowapi aaveleela wa Tavite waaca wa yaale yaarepeliwe. Isarayeli oothene aari milyawu mmoha ni nsana nimoha* alopwana yaawo yaari ooreheryeya ni malema, nave o Yuta yaakhalawo alopwana macikhwi masana maxexe ni makhumi mathanu nameeli* alopwana yaawo yaari ooreheryeya ni malema.
6 Nto nihimo na Levi ni na Penxami hinaaphitaanyeryiwe mu orepeliwa, woona wi masu a mwene yaahimunanara Yowapi.
7 Echu yeela hiyaamusivenleru Muluku eeparipari, mwa yeeyo owo aamulaka Isarayeli.
8 Tavite aaloca wa Muluku eeparipari ariki: “Koopaka yoocheka etokweene mu weerano yeela. Vano, khwoo, mulevelele yoohesa ya mulapeli anyu, woona wi koheerano ichu moololo.”
9 Voocharela, Yehova aaloca ni Kati, mulipa awoona a Tavite ariki:
10 “Hawe nave waloce wa Tavite oriki: ‘Yehova ooloca ariki: “Kinnoovaha miyoonelo miraru. Othanlevo mmoha vooloca sa yeeyo kinaphwanelaaka oweerela.”’”
11 Mwawiihiiha, Kati aamphwanya Tavite nave aloca wa yoowo ariki: “Yehova ooloca ariki: ‘Othanle onachunaawe:
12 Iyaakha raru sa etala, naari miyeeri miraru ovoothiwaka ni amwiicani aa moorweela wa nlema naya, naari mahiku mararu a olaka onarweela wa nlema na Yehova, ela tiwi, epahu mu elapo yeela, moorweela wa munkeelo a Yehova yoowo oni aruuhe otoloxa mmiceche soothene sa Isarayeli.’ Vano, wuupuwele nave okileele wi kamuleele yoole okiruminhe wa weyo.”
13 Mwawiihiiha, Tavite aaloca wa Kati ariki: “Eyo yootepa okinniha murima, khwoo, mukihiye wi kimorele mmatani mwa Yehova, woona wi ikharari sawe itokweenexa, nyenya, muhikihiye wi kimorele mmatani mwa achu.”
14 Voocharela, Yehova aaruuha epahu o Isarayeli; mwa yeeyo achu macikhwi makhumi mathanu nameeli* yaakhwa o Isarayeli.
15 Ohiya yeeyoru, Muluku eeparipari aamuruma munkeelo wi amutoloxe Yerusalemu. Nto, vaavaa owo aachuneiye wi eereno yeeyo, Yehova aamoona nave aakhupanyerya* achu awe, aloca wa munkeelo yoowo aahaala otoloxa ariki: “Waaca vaavaa! Omaale.” Munkeelo a Yehova aari waacamela va nipuro nawiipichavo na Ornani, Muyepusi.
16 Vaavaa Tavite aaviihaleiye miitho awe, owo aamoona munkeelo ari variyari va elapo yavathi ni wirimu, apharenle nlema mmatani athoonyakano o Yerusalemu; mwawiihiiha, Tavite ni asitokweene yiikhunenle ni isakhwi, yaahiivonyerya vathi mwawaakuveya ethipenle iyuuci vathi.
17 Tavite aaloca wa Muluku eeparipari ariki: “Tahi yoomi kaalamulenle wi achu erepeliwe? Ti yoomi kichenke nave kipanke yoohesa. Nto, ipucepuche iha ti seeni seenraaya? Khwoo, Yehova Muluku aka, mukihooxe miyaano ni a echoko ya apapa aka, nto muhaaruuhele epahu achu anyu.”
18 Voocharela, munkeelo a Yehova aamuruma Kati wi amuleele Tavite oya o nipuro nawiipichavo na Ornani Muyepusi, wi amuteke altare a Yehova vaavale.
19 Mwawiihiiha, Tavite aacimula mwawiiwanana ni masu a Kati, yaawo aalonceiye mu nsina na Yehova.
20 Mu elukuluku yeeyo, Ornani aarukunuwa nave amoona munkeelo, owo ni anamwane awe axexe yaahiipitha. Ornani aamwiipicha tiriku.
21 Vaavaa Tavite aaphin’yeiye wa yoowo, Ornani aarukunuwa nave amoona Tavite, mwawaakuveya owo aavinya o nipuro nawiipichavo nave akokhora vamiithoni va Tavite athipenle eyuuci awe vachayani.
22 Tavite aaloca ni Ornani ariki: “Okitumiherye* nipuro nenla nawiipichavo, wi kimutekevo altare a Yehova. Okitumiherye ni eperesu yoophwanelela, wi epahu ela yaarweenle achu ekhurumuwe.”
23 Nto, Ornani aaloca wa Tavite ariki: “Mukuse ntoko yawinyu, nave pwiya aka mwene mweereno yeeyo eri yaphaama wa yoowo.* Kinnavahererya imope iha ntakhara soovaha soopahiwa ni ekaaro yawiipichano ntakhara ikhuuni vamoha ni tiriku ntoko yoovaha ya yoolya. Kinnoovahaani soothene seiha pwiya aka.”
24 Mwawiihiiha, mwene Tavite aaloca ni Ornani ariki: “Hooye, kinaphwanela othuma seiho ni eperesu yoophwanelela, woona wi nkinahaala okuxa mahala ene yeeyo eri yawaa wi kimvahe Yehova naari ovaha mikucho soopahiwa.”
25 Mwawiihiiha, Tavite aamunnya Ornani ohokola wa isiikulu* masana mathanu nammoha sa ooru wi athumeno nipuro.
26 Tavite aamuteka altare a Yehova vaavale nave aavahavo mikucho soopahiwa ni mikucho sawaataana. Owo aamwiichana Yehova, yoowo aamwaakhunle moorweela wa orumiha mooro orweela wirimu oyaaka va altare a soovaha soopahiwa.
27 Voocharela, Yehova aamuleela munkeelo wi akuhe nlema nawe mmurupani mwaya.
28 Vaavaa Tavite oonneiye wi Yehova aamwaakhula vanipuro nawiipichavo na Ornani, Muyepusi, Tavite aatitelela ovaha mikucho soopahiwa va nipuro nenle.
29 Mwawiihiiha, tapernaakulu a Yehova yoowo Mose aampankeiye otakhwani ni altare a soovaha soopahiwa, mu elukuluku yeele saari vanipuro noocukhuwa o Kapawoni.
30 Nyenya Tavite haawerya oya weiwo wi amukohe Muluku, woona wi aatepa woova nthowa na nlema na munkeelo a Yehova.
Inoota
^ Naari akhweya: “mwiicani.”
^ 100.
^ 1.100.0000.
^ 470.000.
^ 70.000.
^ Naari: “aathananela.”
^ Mu Ehepiri, “okivahe.” Naari: “okikuliherye.”
^ Mu Ehepiri, “yeeyo eri yaphaama vamiithoni vawe.”
^ Esiikulu emoha yaakhwana ikarama 11.4 Mmoone Apentisi 2.14.
