Liivuru Oopacerya a Matharihelo 23:1-32
23 Vaavaa Tavite uuluvanleiye nave aareiye omakuchuwelo wa okumi awe,* owo aamweera mwanawe Solomoni okhala mwene a Isarayeli.
2 Voocharela, owo aahaathukumanya asitokweene oothene a Isarayeli, alipa a mukucho ni Alevi.
3 Alevi oothene yaawo yaarino iyaakha makhumi mararu oya ohoolo yaahaalakhanyeriwa nave waaca waya yaari macikhwi makhumi mararu ni athanu nararu.*
4 Wa yaala, macikhwi makhumi meeli naxexe* yaarumeela ntoko oowehererya muteko wa empa ya Yehova, nave macikhwi mathanu nammoha* yaari ahooleli ni athoriha;
5 Yaakhalavo alipeleli a milako macikhwi maxexe,* vamoha ni macikhwi maxexe* yaawo yaamucicimiha Yehova ni ikaruma sa macipo seiho Tavite aalonceiye ariki: “Koopaka seiho wi acicimihiwekeno Muluku.”
6 Voocharela, Tavite aahaarehererya* mmakhuuru, mwawiiwanana ni anamwane a Levi: Xersoni, Kowati ni Merari.
7 Wa nihimo na Xersoni yaari Latani ni Simei.
8 Anamwane a Latani yaari Xayeli muhooleli, Setami ni Yoweli, araru.
9 Anamwane a Simei yaari Selemoti, Hasiyeli ni Harani, araru. Ala yaari ahooleli a imusi sa makholo a Latani.
10 Anamwane a Simei yaari Xati, Sina, Yewusi ni Periya. Yaala axexe yaari anamwane a Simei.
11 Xati aari muhooleli, nave Sisa aari anaawiili. Nyenya, woona wi Yewusi ni Periya hiyaarino anamwane ancipale awo yaahaalakhanyeriwa ntoko emusi emoha ya makholo yaavareryela murici mmohamoha.
12 Anamwane a Kowati yaari Amirami, Isari, Heporoni ni Usiyeli, axexe.
13 Anamwane a Amirami yaari Aroni ni Mose. Nyenya, Aroni ni anamwane awe yaahivalaanyiwa okhala wookhala, wi yeeliheke nipuro Naweelaxa, ovaha mikucho vamiithoni va Yehova; omulapela ni waareeliha achu mu nsina nawe ilukuluku soothene.
14 Muchu a Muluku eeparipari, anamwane awe yaarepeliwe mu nihimo na Alevi.
15 Anamwane a Mose yaari Xersoni ni Eliyeseri.
16 Wa anamwane a Xersoni, Sepuweli aari muhooleli.
17 Wa muyareriwo* wa Eliyeseri, Rehapiya taari muhooleli. Eliyeseri haarinono anamwane akina, nyenya anamwane a Rehapiya yaatepa waaca.
18 Wa anamwane a Isari, Selemoti taari muhooleli.
19 Anamwane a Heporoni yaari Xeriya muhooleli, Amariya anawiili, Xasiyeli aneeraru, ni Xakamiyemi aneexexe.
20 Anamwane a Usiyeli yaari Mika muhooleli ni Isiya anaawiili.
21 Anamwane a Merari yaari Mali ni Musi. Anamwane a Mali yaari Eliyasare ni Kisi.
22 Eliyasare aakhwa ahirino anamwane aasilopwana, nyenya aarino pahiru aasithiyana. Mwa yeeyo, anamwane a Kisi, yaawo yaari ahima aya,* yaahaakuxa ekhala asaaraya.
23 Anamwane a Musi yaari Mali, Eteri ni Yeremoti, araru.
24 Ala yaari anamwane a Levi mwawiiwanana ni imusi sa makholo aya, ahooleli a imusi sa makholo aya. Awo yaarepeliwa, okontaariwa ni orempwa masina aya, nave yaanaphara muteko mu empa ya Yehova ovinyerya iyaakha makhumi meeli oya ohoolo.
25 Woona wi Tavite aaloca ariki: “Yehova Muluku a Isarayeli ohaavaha achu awe wiichuwa, nave owo onahaala okhala o Yerusalemu okhala wookhala.
26 Nave tho Alevi hemuteexaka tapernaakulu naari ikaruma inaphariheliwa mmalapelo.”
27 Mwawiiwanana ni sooleeliherya sookuchula sa Tavite, Alevi yaawo yaarino iyaakha makhumi meeli oya ohoolo yaahikontaariwa.
28 Muteko aya waari waakhaviherya anamwane a Aroni mmuteko wa empa ya Yehova ni othokororya mayate, mapuro a olyamo, weeliha ichu soothene saweela ni muteko woothene waachuneya mu empa ya Muluku eeparipari.
29 Awo yaanakhaviherya ekhapelelaka ipaau sootheteiwa, ephepa ya soovaha sa soolya, ipaau ihirino yooruruvaliha, ipoolu sa woosiwa, ephepa yaweetheiwa yaakanyeriwe ni makhurwa, vamoha ni waaca wa ohokola woothene ni miphimo.
30 Awo yaanavinya woosiiselo ori woothene wi emuthamale ni omucicimiha Yehova nave yaaneerano emohamoha osekuwa.
31 Awo yaanakhaviherya wiiliwiili vaavaa mikucho soopahiwa saavahiwaaya wa Yehova mmahiku a Sapata, mu miyeeri mivyaani ni variyari va ilukuluku sa ifesta, mwawiiwanana ni waaca ni sooleeliherya saavekeya wa yaawo, nave yaaneerano yeeyo moohihiyererya vamiithoni va Yehova.
32 Awo tho yaanathokororya murici aya vooloca sa muxakala wa muthukumano, nipuro naweela, ni vooloca sa asinnaya anamwane a Aroni ntakhara muteko wa empa ya Yehova.
Inoota
^ Mu Ehepiri, “uuluvanleiye nave mahiku awe yaaca.”
^ 38.000.
^ 24.000.
^ 6.000.
^ 4.000.
^ 4.000.
^ Naari: “aahaakawanya.”
^ Mu Ehepiri, “anamwane a”
^ Mu Ehepiri, “asinnaya”
