Liivuru Oopacerya a Matharihelo 5:1-26
5 Ala anamwane a Rupeni, mwaana oopacerya oyariwa a Isarayeli. Owo aari oopacerya oyariwa, nyenya woona wi aahikona ni mpwana a apapa awe, ophwanelela wawe wa oopacerya oyariwa yaavahiwe anamwane a Yosefe mwaana a Isarayeli. Mwawiihiiha, mu elista ya muyareriwo wa imusi saya, owo haarepeliwe ntoko oopacerya oyariwa.
2 Naamwi Yuta aari oowerya waapwaha asinnawe, mwa yoowo aakhumelenle yoole aakhanle muhooleli, ophwanelela ntoko oopacerya oyariwa waari wa Yosefe.
3 Anamwane a Rupeni, mwaana oopacerya oyariwa a Isarayeli, yaari: Hanoki, Palu, Esironi ni Karmi.
4 Anamwane a Yoweli yaari Semaya mwanawe; Koki mwanawe; Simei mwanawe;
5 Mika mwanawe; Reyaya mwanawe; Pali mwanawe;
6 ni Pera mwanawe, yoowo aakuxiwe akerihiwaka wookapuroni ni Tilikati-pilinaser, mwene o Asiriya. Pera aari muhooleli a nloko na Rupeni.
7 Asinnawe, mwawiiwanana ni elista yaarepeliwemo muyareriwo aya, ahooleli aya yaari Xayeli, Sakariya,
8 ni Pela mwaana a Asasi, mwaana a Sema, mwaana a Yoweli, yoowo aakhala o Aroweli ophiyerya o Nepo ni Palimiyoni.
9 O makupa onakhumawo nsuwa, owo aakhala mmuceche yoowo wunnuwe ophiyerya otakhwani onakhala makupa a muhice Eufrate, woona wi mihuwo saya saatepa waaca mu elapo yo Kiliyati.
10 Mmahiku a Sawuli, awo yaawana ni Ahakariti nave yaavootha. Mwawiihiiha, awo yaanakhala mmixakalani mwaya mmiceche soothene onakhumawo nsuwa o Kiliyati.
11 Muyareriwo wa Kati waakhala waacamana ni yaawo mu elapo yo Pasa mmuceche waaya ophiyerya o Saleka.
12 O Pasa, Yoweli aari muhooleli, Safamu aari anaawiili, nave aakhalawo Xanai ni Safati.
13 Asinnaya, yaawo yaari a imusi sa makholo aya, aari Mikayeli, Mexulami, Sepa, Yorai, Xakani, Siya ni Eperi, waapwexiiherya oothene, athanu napiili.
14 Ala yaari anamwane a Apiyeli, mwaana a Huri, mwaana a Xarowa, mwaana a Kiliyati, mwaana a Mikayeli, mwaana a Xesisai, mwaana a Xatu, mwaana a Pusi.
15 Ayi, mwaana a Apitiyeli, mwaana a Kuni, aari muhooleli a emusi ya makholo aya.
16 Awo yaakhala o Kiliyati, o Pasa, ni mmiceche saya soorukurerya, ni mmakupa oothene waaphwanyeyamo munyepu o Saroni, ophiyerya weiwo waakotenlaayawo.
17 Oothene yaawo waarepeliwa muyareriwo aya mmahiku a mwene Yatamo o Yuta ni mmahiku a mwene Yeropowamu* o Isarayeli.
18 Mahimo a Rupeni, a Akati, ni eriyari ya nihimo na Manase yaari macikhwi makhumi maxexe naxexe ni masana mathanu nameeli ni makhumi mathanu nammoha* anakhoco oowerya yaawo yaateesa sawiisaakihano ni malema nave yaari oorehereryeya erinono minra.* Awo yaahivyakihiwa ntakhara ekhoco.
19 Awo yaawana ni Ahakariti, Ayeturi, Anafisi, ni Anotape.
20 Woona wi yaahimveka Muluku nikhaviheryo ntakhara ekhoco yeela nave emuroromela yoowo, owo aahiiwa yooveka aya nave aahaakhaviherya mu ekhoco. Mwawiihiiha Ahakariti ni oothene yaari ni yaawo yaaveleeliwa mmatani mwaya.
21 Awo yaahikusa mihuwo saya, ikamelu macikhwi makhumi mathanu,* ipucepuche macikhwi masana meeli ni makhumi mathanu* ni apuuru macikhwi meeli* vamoha ni achu* ncikhwi nsana nimoha.*
22 Ancipale yaahiiphiwa, woona wi yaari ekhoco ya Muluku eeparipari. Voocharela awo yaanakhala mmiceche sa achu yaale, ophiyerya elukuluku yaakerihiwaaya wookapuroni.
23 Muyareriwo wa eriyari ya nihimo na Manase waakhala ovinyerya o elapo yo Pasani ophiyerya o Pele-herimoni, o Sineri ni omwaako Hermoni. Awo yaatepa waaca.
24 Ala yaari ahooleli a imusi sa makholo aya: Eferi, Isi, Eliyeli, Asiriyeli, Yeremiya, Hotaviya ni Atiyeli. Ala yaari anakhoco oowerya, alopwana oovuwa ni ahooleli a imusi sa makholo aya.
25 Nyenya awo hiyaari oororomeleya wa Muluku a makholo aya nave yaacapaheya ni amiluku a achu a elapo yeele, yaawo Muluku aawiiphaleiye vamiithoni vaya.
26 Mwawiihiiha, Muluku a Isarayeli aamweeriha* Mwene a Asiriya (ela tiwi, Tilikati-pilinaseri, mwene o Asiriya) wi aakuxe aakerihaka wookapuroni mahimo a Rupeni a Akati, ni eriyari ya nihimo na Manase nave aakeriha o Hala, o Hapori, o Hara, ni o muhice Kosani, weiwo anakhalaayawo ophiyerya olelo.
Inoota
^ Ela tiwi, Yoropowamu anawiili.
^ 44.760
^ Mu Ehepiri, “nave yaananyikala munra.”
^ 50.000.
^ 250.000.
^ 2.000.
^ Naari: “naari ikumi sa achu.”
^ 100.000.
^ Mu Ehapiri, “aatannya munepa wa.”
