1 Petru 2:1-25
2 Mwawiihiiha, muhiye soonanara soothene, owoka, wiisootherya, nrima ni wootha woothene.
2 Ntoko makwiya anaamuyariwaru, munnuwihe nchuno noolipa wa eleiti* yoohiriipiheya ya masu, wi moorweela wa yeeyo munnuwe wi mvuluxiwe,
3 woona wi mookhalano sawooniherya* wi Apwiya taphaama.
4 Vaavaa munarwaanyu wa yoowo, nluku nikumi nenlo nikhoociwe ni achu, nyenya nthanliwe nave nri nasisapo wa Muluku,
5 yeenyu ene, ntoko maluku makumi, munnatekiwa ntoko empa yoomunepani wi mukhale alipa a mukucho aweela, wi muvaheke mikucho soomunepani, saweemereryiwa wa Muluku moorweela wa Yesu Kristu.
6 Tiwi, ennalociwa mu Soorempwa: “Nkoonani! Kinnatikitherya o Siyoni nluku noothanliwa, nluku noochuneya noopacerya na mathipelo a empa, nave yoole oni aroromele nenlo harwaru athanana.”*
7 Mwawiihiiha, ori ntakhara nyuwo owo oreiye asisapo, woona wi nyuwo muri alipa oororomela; nto wa yaale ahinaroromela, “nluku nenlo naakhoociwe ni alipa ooteka, ti nenlo naakhanle nluku noochuneya noopharelano empa”*
8 ni “nluku nookwaculiha ni mwala woothoowiha.” Awo annakwaculiwa woona wi haniiwelela masu. Awo aathanleliwa yoolakelela yeela.
9 Nto nyuwo muri “nloko noothanliwa, omwene wa alipa a mukucho, nloko naweela, achu oothanliwa avameekhaaya, wi mulokohe mikhalelo* soocicimiheya” sa Yoole owiichanneeni mweepiiphini ookerihaani mu omwaleela wawe wootikhiniha.
10 Woona wi khalai nyuwo himwaari nloko, nyenya vano muri nloko na Muluku; khalai nyuwo himwaamoreliwe ikharari, nto vano moomoreliwa ikharari.
11 Oosiveliwa, ntoko aleco ni anamarwa, kinnoocenyeryaani wi mutitelele othanya soochunachuna sa mwiili, seiho sinawaniha ekhoco ni nyuwo.*
12 Mutitelele okhalano meecelo aphaama variyari va achu a maloko, wi vaavaa awo anawootheryaayaani okhala achu oonanara murima, yaawo aneene ekhale anamoona a miteko sanyu saphaama, nave ntoko yookhumelela, emucicimihe Muluku mu nihiku na weecelela* wawe.
13 Mwiiweleleke olamulelo woothene woorehereryiwa ti achu, moohipwacha aari mwene ntoko mutokweene,
14 naari alamuleli, ntoko oorummwa ni yoowo wi yaalake aweera soonanara ni waacicimiha yaale aneera saphaama.
15 Tiwi, eri yookhwela ya Muluku wi moorweela wa weerano yeeyo eri yaphaama, nyuwo nwerye omaaliha* oloca woololo wa achu oohikhalano miruku.
16 Mukhale ntoko achu ootaphuwa, mpharihelaka otaphuwa wanyu ohiya ntoko yookhuneelano* wi mweereno yeeyo eri yoonanara, nyenya wi mukhale akapuro a Muluku.
17 Mwaacicimiheke achu a mukhalelo woothene, mukhaleno osivela ntakhara anna a* elapo yoothene, mmooveke Muluku, mmucicimiheke mwene.
18 Anamuteko yaacicimiheke asipwiya aya ni woova woothene onaaphwanelela, ohiya pahiru wa yaawo ari aphaama ni ooleva, nyenya tho wa yaawo ari oovila waahakalaliha.
19 Muluku onnasiveliwa ni muchu yoowo oniilipixerya okhalano yawuupuxerya-ya-murima yaphaama vamiithoni va Muluku, avilelakano makacamiho* ni ohooxeya naamwi ahirino nthowa.
20 Tiwi, mphurelo taani orivovo wakhala wi munnamaniwa wa nthowa na ocheka nave munavilelano yeeyo? Nyenya wakhala wi munnavilela soohooxa wa nthowa na weera yeeyo eri yaphaama, eyo ennamuhakalaliha Muluku.
21 Mweeparipari, mwiichaneliwe yeela, woona wi Kristu mwaneene tho oohooxeya wa nthowa nanyu, oohiyeryakaani yootakiherya wi muchariheke moororomeleya inaani sawe.
22 Owo haapanke yoocheka, naari mano hiwaaphwanyen’ye wootha mwaano mwawe.
23 Vaavaa aaruwaniweiye,* owo haakhula mooruwana.* Vaavaa owo aahooxiweiye, owo hoopopiha, nyenya aanaveleela soothene wa Yoole onathoriha mwawookololowa.
24 Yoowo ene aakuxa soocheka sahu mmwiilini mwawe, va mwiri, wi hiyaano nikhwe* wa soocheka nave nikhale akumi ntakhara wookololowa. Nave “moorweela wa makhwaca awe nyuwo moopenuxiwa.”
25 Tiwi, nyuwo mwaari ipucepuche soohuwela, nto vano mookookela wa mukukhula ni ooweherya a ikumi sanyu.
Inoota
^ Naari: “mukaka.”
^ Naari: “moohuserya.”
^ Mu Ekriki, “uuliheya muru.”
^ Mu Ekriki, “muru wa vamuthokoni.”
^ Ela tiwi, mikhalelo ni saweera soocicimiheya sa Yoowo.
^ Naari: “ni okumi anyu.”
^ Naari: “ovareryela.”
^ Mu Ekriki, “wiipha.”
^ Naari: “yawiikuphelela.”
^ Mu Ekriki, “onna wa.”
^ Naari: “sawiicela.”
^ Naari: “aanyemuliweiye.”
^ Naari: “moonyemula.”
^ Naari: “nitaphuliwe.”
