2 Akorintu 6:1-18
6 Nlapaka vamoha ni yoowo, ninnooceenyeryaani tho wi muheemererye mahala matokweene a Muluku, ni oyeleela yoolakelelaaya ene.
2 Tiwi, owo oni: “Mu elukuluku yaweemereryeya kaahoowiriyana nave nihiku na ovuluxiwa kaahookhaviherya.” Onani! Vano elukuluku yaphaama yaweemereryiwa. Onani! Vano nihiku na ovuluxiwa.
3 Hiyo hinnavaha nthowa na okwaculiha, wi muteko ahu ohivaanyiwe;
4 nto mmikhalelo soothene ninniiseemererya ntoko anamuteko a Muluku, moorweela wa ovilela mu saweeha sincipale, mu soohooxa, mu othoiwa, mmakacamiho,
5 mu omaniwa, mu owaleliwa, mu namvutuka, mmiteko sakuru, ohikona ohiyu, mu ilukuluku sa othoiwa yoolya;
6 mu weela murima, mu masuwelelo, mu opixa murima, mu oreera murima, mwa munepa waweela, mu osivela woohiisootherya,
7 mu masu eeparipari, mu owerya wa Muluku; moorweela wa mavaka a wookololowa omoono woolopwana* ni woothiyana,*
8 moorweela wa ocicimihiwa ni onyemuliwa, moorweela wa olociwa moonanara ni olociwa mwaphaama. Ninnooniwa okhala oowoka naamwi nri eeparipari;
9 ntoko oohisuweliwa, naamwi nsuweliwe; ntoko ookhweene,* chiri nri akumi; ntoko oohoosiwa,* naamwi nihiveleeliwe wookhwani;
10 ntoko oothanana, nyenya oohakalala mahiku oothene; ntoko oohaawa, nyenya naareelihaka ancipale; ntoko oohikhalano echu, nto nikhalakano ichu soothene.
11 Hiyaano noohula eyano ahu wi nloce* ni nyuwo Akorintu, nave noohula phaama murima ahu.
12 Tahi wi nnamuhiiha owooniheryaani* niphwanya, nto nyuwo munahiiha onooniherya niphwanya.
13 Mwawiihiiha, ntoko yookookiherya, kinaloca ni nyuwo ntoko anaaka, wi muhule tho phaama murima anyu.*
14 Muhikhale mu nipisi nimoha* ni oohiroromela. Tiwi, wiiwanana taani orivovo wookololowa ni otakhala? Naari wiiwanana taani orivovo omwaleela ni epiiphi?
15 Ohiya yeeyoru, wiiwanana taani orivovo variyari va Kristu ni Peliyali?* Naari waataana* taani orivovo oororomela* ni oohiroromela?
16 Nave wiiwanana taani orivovo empa ya Muluku, ni soophwaniherya? Tiwi hiyo nri empa ya Muluku mukumi; hiiha ntoko Muluku olonceiye: “Kinamukhala ni yaawo nave kinamweeca variyari vaya, kinarwa kikhala Muluku aya, nave awo enarwa ekhala achu aka.”
17 “Yehova oni: ‘Vano, khumamvoni variyari vaya nave mwiivalaanye ni yaawo nave mmaale ophara ichu soothanyeya;’” “‘nave miyo kinarwa kiwaakhelaani.’”
18 “Yehova a Ikuru Soothene oni: ‘Miyo kinarwa kikhala Atiithi anyu, nave nyuwo munarwa mukhala anamwane aka aasilopwana ni aasithiyana.’”
Inoota
^ Akhweya ntakhara owaniha.
^ Akhweya ntakhara wiisaakiha.
^ Naari: “awooniwa ntoko oophwanelela okhwa.”
^ Naari: “oolakiwa.”
^ Naari: “nooloca mootaphuwa.”
^ Naari: “hiniyemve nipuro muryaanyu mwa hiyo.”
^ Naari: “mwaaceererye tho osivela wanyu.”
^ Naari: “muhaataane.”
^ Masu anarweela mu Ehepiri anataphulela “ohiphuriha echu.” Onaahiwa Satana.
^ Naari: “wiiwanana taani orivovo variyari va”
^ Naari: “muchu oororomeleya.”
