2 Akorintu 7:1-16
7 Mwawiihiiha oosiveliwa, woona wi nookhalano soororomeliha seiha, hankooni niiseelihe wa sooriipiheya soothene sa mwiili ni sa munepa, naakhwanihaka weelihiwa mu omoova Muluku.
2 Munivahe nipuro mmurimani mwanyu. Haavo nimweerenlaahu yoonanara, haavo nimpahulenlaahu, haavo ninwokenlaahu.
3 Nkinaloca ela wi koothoriheeni. Woona wi kooloca wi nyuwo muri mmurimani mwahu, wi nikhwe vamoha nave wi nikhale akumi vamoha.
4 Kinnaloca moohoovelela ni nyuwo. Kinniirumiha ni nyuwo. Kiri oohakararyeya mwawaakhwanela; koosareya ohakalala* mu wuukhuwa wahu woothene.
5 Mweeparipari, vaavaa naaphin’yaahu o Maketoniya, hinaawiichuwale, naatitelela okacamihiwa mmikhalelo soothene, ela tiwi, waakhalavo owanawana vaate, ni woova mpuwa.
6 Nyenya Muluku, yoowo onaahakararya ooceecheya, aanihakararya moorweela wa ophiya wa Titu;
7 nave ohiya pahiru ni ophiya wawe nyenya tho ni ohakararya yoowo aakhenleiye wa nthowa na nyuwo; tiwi owo ookileela sa ochuna wanyu okoona, othanana wanyu wawiiseela ni wuukhuwa wanyu* weeparipari ntakhara miyo; mwawiihiiha kaahakalala vancipale.
8 Tiwi, moohipwacha waakhanle wi kohoothananihaani ni ekaarata aka, nkaano ekeerelani. Naamwi kaarino ekeerelani woopaceryani (kinoona wi ekaarata yohoothananihaani, naamwi pahiru yaari elukuluku tonto),
9 vano kinnahakalala, ohiya wa nthowa na othananihiwa wanyu, nyenya nthowa nawi othananihiwa wanyu wohookerihaani woocharuwani. Tiwi, nyuwo mwaathananihiwa mwawiiwanana ni yookhwela ya Muluku, nave mwa yeeyo himuhooxen’ye wa nthowa nahu.
10 Ntakhara othanana mwawiiwanana ni yookhwela ya Muluku onnaruuha ocharuwa onakeriha woovuluxiwani, nave haavo onakhalano ekeerelani; nyenya othanana wa elapo onaruuha okhwa.
11 Moone sookhumelela sa wiilipixerya wanyu ikumihenryaaya wa nthowa na othanana wanyu mwawiiwanana ni yookhwela ya Muluku: Oreheryiwa wanyu, otikhiniheya, omoova Muluku, okhalano nchuno neeparipari na ocharuwa, mvai, wookolola yeeyo eri yooheseya! Mmikhalelo soothene nyuwo mohiisooneiha okhala aweela murima* mmwaha yoola.
12 Naamwi koorepenleeni nyuwo, nkeenreno yeela wa nthowa na yoole eenreno yoohesa, naari wa nthowa na yoole ochekeliwe, nyenya wi nchuno nanyu na oniiwelela nikhale nawooneya variyari vanyu ni vamiithoni va Muluku.
13 Ti nthowa nene nryaahu oohakararyeya.
Nyenya mwawaaceererya ni ohakararyiwa wahu, ninnahakalala vancipale wa nthowa na ohakalala wa Titu, woona wi oothene nyuwo mookurumuxa murima awe.*
14 Waakhanle wi kohiirumiha wa yoowo vooloca sa nyuwo, nkuulihen’ye muru; nyenya hiiha ntoko ichu soothene naaloncaahu wa nyuwo saaryaaya seeparipari, ichu soothene tho nloncaahu mwawiirumiha wa Titu, sohooneya okhala seeparipari.
15 Nave tho, niphwanya nawe vooloca sa nyuwo ninnaaceereryeya vaavaa onuupuweleiye sa wiiwelela wa oothene nyuwo ni mukhalelo mwaamwaakhenlaanyu ni woova ni othukumela.
16 Kinnahakalala vawoona wi mu soothene kinnoororomelaani.*
Inoota
^ Naari: “ohakalala waka onnatekhuma.”
^ Mu Ekriki, “mvai anyu.”
^ Naari: “oohikhalano nthowa.”
^ Mu Ekriki, “munepa awe.”
^ Naari akhweya: “kinanwerya olipihiwa wa nthowa na nyuwo.”
