Liivuru Anaawiili a Matharihelo 16:1-14
16 Pasa, mwene o Isarayeli, aarwa owana ni Yuta mu eyaakha ya makhumi mararu nathanu nammoha mu olamulelo wa Asa nave apacerya omulipiha Rama, wi ahimuhiye muchu okhuma naari ovolowa mmuceche wa Asa mwene o Yuta.
2 Mwa yeeyo, Asa aaviihamo eparata ni ooru mu nipuro nookhapelelamo muhakhu wa empa ya Yehova ni wa empa* ya mwene nave arumiha wa Penihatati, mwene a Asiriya, yoowo aakhala o Tamasku vamoha ni michaka iha:
3 “Wookhalavo waataana* variyari va miyo ni weyo, ni variyari va apapaa ni apapa aka. Kinnoorumihela eparata ni ooru. Omalihe waataana* opankaawe ni Pasa, mwene o Isarayeli, wi apwahemo mmuceche aka.
4 Penihatati aanwiriyana mwene Asa nave aahaarumiha ahooleli a anakhoco awe wi yawane ni ipooma sa Isarayeli, nave awo yaahiphela o Ixoni, o Taani, o Apel-maimi ni mapuro oothene ookhapelelamo a ipooma sa Nafitali.
5 Vaavaa Pasa aasuwenleiye sa yeeyo, aamaala omulipiha* Rama nave aahiya muteko awe.
6 Mwawiihiiha, mwene Asa aathukumanya nloko noothene na Yuta, nave awo yaakuxa maluku ni ithaapwa so Rama, seiho mwene Pasa aatekeiyeno, nave ni seiho owo aamulipiha* Kepa ni Mispa.
7 Mu elukuluku yeele, Hanani, mulipa awoona, aaya wa Asa mwene o Yuta, nave aloca ni yoowo ariki: “Woona wi nyuwaano mmuroromenle* mwene o Asiriya nave himmuroromenle* Yehova Muluku anyu, anakhoco a mwene o Asiriya aakophola mmatani mwanyu.
8 Hiyaari a Etiyopi ni Aliipiya anakhoco ancipale, vamoha ni ikaaro sincipale sakhoco ni alipa ooweeciha akavalo? Nto woona wi mwaamuroromenle Yehova, owo aahaaveleela mmatani mwanyu.
9 Tiwi, miitho a Yehova annavarerya phaama veelaponi yoothene yavathi wi ooniherye ikuru sawe wa yaale arino murima wawookololowa wa yoowo. Nto nyuwaano moheerano ichu moololo mmwaha yoola; ovinyerya hiihaano oya muhoolo amwiicani eni enanwana ni nyuwo.”
10 Mwawiihiiha, Asa aanyeenyeya ni mulipa awoona* nave anwalela mukariposo,* woona wi aanyeenyeya ni yoowo wa nthowa na yeeyo. Nave ovinyerya elukuluku yeele, Asa aapacerya waahooxa achu akina.
11 Yaweereya ya Asa ovinyerya omapacereryo ophiyerya wookuchulani, erempwe mu liivuru a mamwene o Yuta ni o Isarayeli.
12 Mu eyaakha ya makhumi mararu nathanu naxexe ya olamulelo awe, Asa yaamurweela ereca ya mu inaani nave aatepa wiiceliwa; naamwi vaavaa iiceliweiye, haamwaamvye Yehova nto aawaamvye alipa ooloola.
13 Voocharela, Asa aahiichuuwa ni makholo awe; owo aakhwile mu eyaakha ya makhumi maxexe nammoha ya olamulelo awe.
14 Mwawiihiiha, awo yaamvitha mu nihiye ntokweene owo aathimpeiye ntakhara yene mwaneene mu epooma ya Tavite. Yaamukuha vantetheni nenlo naasareihiwe ni makhurwa a palsamu ni makhurwa avameekhaaya yaapakiwe yaakanyeryiwaka ni sawunkhela soohiyanahiyana. Ohiya yeeyoru, waahiiseeliwa mooro muncipale wi acicimihiwe.*
Inoota
^ Naari: “empa yoomwene.”
^ Naari: “nlakano.”
^ Naari: “nlakano.”
^ Naari: “omuteka wanaawiili.”
^ Naari: “aamuteka wanaawiili.”
^ Mu Ehepiri, “mwiikhavihenrye wa.”
^ Mu Ehepiri, “himwiikhavihenrye wa.”
^ Moone Masu Atharihiwe.
^ Mu Ehepiri, “empa ya ikhukulu.”
^ Mwawooneya tahi wi waari osukiwa wa Asa, nyenya saasukiwa sawunkhela soohiyanahiyana.
