Liivuru Anaawiili a Matharihelo 18:1-34
18 Yehosafati aakhalano muhakhu muncipale ni ncicimiho nawaaca, nto owo aapaka onthamwene ni Akape moorweela wa omweemererya mmoha a emusi awe othelana ni mmoha a emusi ya Apake.
2 Mwawiihiiha, ivinrevo iyaakha owo aaya omuxekurya Akape o Samariya nave Akape aavaha mikucho sincipale sa ipucepuche ni imope ntakhara yoowo vamoha ni yaawo aareiyeno. Nave owo aamwaakeelela* Yehosafati wi echaanane vamoha wi yawanihe o Ramoti-kiliyati.
3 Akape mwene o Isarayeli, aamukoha Yehosafati mwene o Yuta: “Apwanne munahaala oyawo ni miyaano o Ramoti-kiliyati?” Owo aamwaakhula: “Kinahaala okhala ni nyuwo, achu aka anahaala okhala ni achu anyu nave anamookhaviheryani okhoconi.”
4 Nto Yehosafati aahi wa mwene o Isarayeli: “Khwoo, voopacerya mulike osuwela taavi ari masu a Yehova.”
5 Mwawiihiiha, mwene o Isarayeli aahaathukumanya alipa a miririmu, alopwana masana masese, nave aahaakoha ariki: “Apwanne ninnaphwanela oya okhoconi wi nawane ni Ramoti-kiliyati, naari hooye?” Awo yaamwaakhula: “Haweni; nave Muluku eeparipari onamwaaveleela mmatani mwa mwene.”
6 Yehosafati aaloca ariki: “Apwanne haawowo wenno mulipa a miririmu a Yehova? Hankooni tho nimukohe Muluku moorweela mwa yoowo.”
7 Mwawiihiiha, mwene o Isarayeli aahi wa Yehosafati ariki: “Ookhalawo mulopwana mukina moorweela wa yoowo nnahaalaahu omukoha Yehova, nyenya kinnamwiica, woona wi hantonko oloca mwa miririmu ichu saphaama vooloca sa miyo, nyenya ilukuluku soothene ichu soonanara. Ti Mikaiya, mwaana a Imila.” Mwa yeeyo, Yehosafati aahi: “Mwene himunaphwanela oloca echu ntoko yeeyo!”
8 Mwawiihiiha, mwene o Isarayeli aamwiichana muhooleli a vaate va mwene nave aloca ariki: “Waakuve, omuruuhe Mikaiya mwaana a Imila.”
9 Mwene o Isarayeli ni mwene Yehosafati o Yuta yaarimukiraathi mmoha ti mmoha vamunyukhuni vawe, ewanre soowara sa omwene; awo yaakiranthe vanipuro nawiipichavo nenlo naakhala ohoolo wa mulako wo Samariya, nave alipa a miririmu oothene yaari weiwo elocaka mwa miririmu vamiithoni vaya.
10 Voocharela, Setekiya mwaana a Kenana, aahiipakela manyaka a muthipo nave aloca ariki: “Yehova ooloca ariki: ‘Ni manyaka yaala munahaala waatoloxa* Asiriya ophiyerya mwaamalinhe.’”
11 Alipa a miririmu oothene akina yaaloca mwa miririmu echu emohamoha, eriki: “Nwele o Ramoti-kiliyati nave nyuwo munahaala okhumelela phaama; Yehova onamwaaveleela mmatani mwa amwene.
12 Mwawiihiiha namichaka yoowo aakele omwiichana Mikaiya aamuleela ariki: “Osuwele wi masu oothene a alipa a miririmu taphaama wa amwene. Vano, masu aa tho elikaneke ni awaya, nave oloce echu yaphaama.”
13 Nto Mikaiya aahaakhula ariki: “Hiiha ntoko Yehova oreiye mukumi, soothene Muluku aka oneereiye aloce ti yeeyo kinahaalaaka oloca.”
14 Voocharela owo aahiperekha wa amwene, nave mwene aamukoha: “Mikaiya, ninnaphwanela oya okhoconi wi nawane ni Ramoti-kiliyati naari hooye?” Mwawaakuveya owo aahaakhula: “Haweni, nave nyuwo munahaala okhumelela phaama; awo anahaala oveleeliwa mmatani mwanyu.”
15 Mwene aamukoha ariki: “Ikwaha kavi kinaphwanelaaka woolipeliha wi ohikileele echu voohikhala yeeyo eri yeeparipari mu nsina na Yehova?”
16 Mwawiihiiha owo aahaakhula: “Kinnawoona Aisarayeli emwalamwalenle mmiyaakoni ntoko ipucepuche sihirino mukukhula. Yehova ooloca: ‘Awo haano muhooleli. Mmoha ti mmoha akookeleke mmawannyawe.’”
17 Mwene o Isarayeli aaloca ni Yehosafati ariki: “Miyaano nkoolenleeni wi: ‘Owo hi aloce mwa miririmu ichu saphaama vooloca sa miyo, voohikhala pahiru ichu soonanara’?”
18 Voocharela, Mikaiya aaloca: “Mwawiihiiha, nwiriyane masu a Yehova: Koomoona Yehova akiranthe vamunyukhuni vawe nave anakhoco awe oothene a wirimu yeemenle omoono awe woolopwana ni omoono awe woothiyana.
19 Yehova aaloca: ‘Taani oni anwoke mwene Akape o Isarayeli, wi owo awele nave akhwe o Ramoti-kiliyati?’ Mmoha aaloca echu emoha, eniiha mukina alocaka echu ekina.
20 Voocharela, munepa* mmoha waarwa, weemela ohoolo wa Yehova nave oloca oriki: “Miyaano kinahaala onwoka.’ Yehova aahimukoha ii: ‘Oni weereno hai yeeyo?’
21 Owo aahaakhula: ‘Kinamuyawo nave kakhale munepa woowoka mwaano mwa alipa a miririmu awe oothene.’ Mwa yeeyo, owo aahi: ‘Weyaano onahaala onwoka, nave echu ekina, onahaala okhumelela phaama. Hawe nave weereno yeeyo.’
22 Nave vano, Yehova oohelamo munepa woowoka mwaano mwa alipa a miririmu anyu yaala, nto Yehova ooloca wi enamoophacuwelaani epahu.”
23 Mwawiihiiha, Setekiya, mwaana a Kenana, aamwaacamela nave aamvaha nipuraata Mikaiya, nave aloca ariki: “Onachuna oloca wi munepa wa Yehova wookihiya* wi oloce ni weyo?”
24 Mikaiya aamwaakhula: “Weyaano onarwa ororomela yeela mu nihiku oneeraawe ovolowe mu ekwartu yawiipitheyaxa wi wiipithe.”
25 Voocharela, mwene o Isarayeli aaloca: “Mmukuse Mikaiya nave mumveleele wa Amoni, muhooleli a epooma, ni wa Yowasi, mwaana a mwene.
26 Mwaaleele muriki: ‘Mwene oriye: “Munwalele mukariposo mulopwana ola nave mumvaheke yoolya tonto ni maahi, ophiyerya kikoonke mmureceleni.”’”
27 Nto Mikaiya aaloca: “Wakhala wi nyuwaano chiryeene mookooka mmureceleni, Yehova halonce ni miyo.” Nave aahaaceererya: “Nwiriyane yeela nyuwo achu oothene!”
28 Mwa yeeyo, mwene o Isarayeli ni Yehosafati mwene o Yuta, yaawela o Ramoti-kiliyati.
29 Mwene o Isarayeli aaloca wa Yehosafati: “Miyaano kinahaala orula soowara saka sa omwene wi kihisuwanyeye nave kivolowe mmukhico nto weyaano oware soowara saa soomwene.” Mwawiihiiha, mwene a Isarayeli aarula soowara sawe sa omwene nave awo yaavolowa mmukhico.
30 Mwene a Asiriya aavaha nlamulo nla wa ahooleli a ikaaro sawe sakhoco: “Ahikhale muneeraanyu nwaneno, naari mukhaani naari mutokweene, pahiru mwene o Isarayeli.”
31 Mwa yeeyo, vaavaa ahooleli a ikaaro sakhoco yaamoonnaaya Yehosafati, yaaloca eriki: “Ole mwene o Isarayeli.” Nave awo yaamukelela wi ewaneno. Mwawiihiiha, Yehosafati aapacerya okhuwela avekaka nikhaviheryo, nave Yehova aamukhaviherya; mwawaakuveya Muluku aahaaperuxa yaawo wa yoowo.
32 Vaavaa ahooleli a ikaaro sakhoco yoonnaaya wi haari mwene o Isarayeli, mwawaakuveya yaamaala omwiikara.
33 Nto ahaanyiheryaka* mukhoco mmoha aavonya munra awe amuhomano mwene o Isarayeli vachu waakumanavo soowara sawe. Mwawiihiiha, mwene aaloca wa mulipa aweeciha ekaaro awe yakhoco: “Orukunuxe ekaaro nave okikerihe okhwipi wa mukhico,* woona wi kootepa ophoreihiwa.”
34 Mu nihiku nenle mukhico waatepa, nave awo yaamweemexa mwene o Isarayeli mukaaroni mwawe, ohoolo wa Asiriya, ophiyerya oxekuwa; nave owo aakhwa nsuwa nimorelakamo.
Inoota
^ Naari: “nave aamulekecha Yehosafati.”
^ Naari: “munamwaakakhano.”
^ Naari: “munkeelo.”
^ Mu Ehepiri, “ephiro taani munepa wa Muluku ovinraaya mwa miyo.”
^ Naari: “ahisuwelaka.”
^ Mu Ehepiri, “nipuro nakhoco.”
