Liivuru Anaawiili a Matharihelo 21:1-20
21 Voocharela, Yehosafati aahiichuuwa ni makholo awe nave aavithiwa vamoha ni makholo awe mu epooma ya Tavite; Yehoramu, mwanawe, aakhala mwene mu nipuro nawe.
2 Asinnawe, anamwane a Yehosafati, yaari: Asariya, Xeyeli, Sakariya, Asariya, Mikayeli ni Sefatiya; oothene yaala yaari anamwane a Yehosafati, mwene o Isarayeli.
3 Nave apapa aya yaahaavaha samahala sincipale eparata, ooru ni ichu sasisapo, vamoha ni ipooma soolipihiwa o Yuta; nto omwene amvanhe Yehoramu, woona wi owo aari mwaana oopacerya.
4 Vaavaa Yehoramu aakunxeiye omwene wa apapa awe, aalipiha olamulelo awe awiiphaka asinnawe oothene vamoha tho ni ahooleli akina o Isarayeli.
5 Yehoramu aarino iyaakha makhumi mararu napiili* vaavaa aakhanleiye mwene, nave aalamulela mu iyaakha thanu nararu o Yerusalemu.
6 Owo aaneeca mu ephiro ya mamwene o Isarayeli, hiiha ntoko a echoko ya Akape yeenraaya, woona wi mwaana amwaamuthiyana a Akape aakhala mwaariye; nave owo aaneera yeeyo yaari yoonanara vamiithoni va Yehova.
7 Nto Yehova haachunne otoloxa echoko ya Tavite, wa nthowa na waataana owo aapankeiye ni Tavite, vawi owo aaroromeliha omvaha omwaleela vamoha ni anamwane awe.
8 Mmahiku a Yehoramu, Etomi aahimmwareela Yuta, nave aatikitherya omwene awe ene.
9 Mwawiihiiha Yehoramu vamoha ni ahooleli awe yaayawo ni ikaaro sawe soothene sakhoco. Ohiyu, owo aahaahiphela ni waatoloxa achu o Etomi yaawo yaamurince yoowo vamoha ni ahooleli a ikaaro sawe sakhoco.
10 Nto omwaryeya wa Etomi ntakhara Yuta onnatitelela ophiyerya olelo. Lipina tho aammwareela owo mu elukuluku yeeyo, woona wi owo aamunyanyala Yehova, Muluku a makholo awe.
11 Yehoramu tho aapaka mapuro oocukhuwa mmiyaakoni so Yuta, wi aweerihe achu oomaka o Yerusalemu opaka ocapaheya woomunepani, nave owo aamuhuweliha Yuta.
12 Ohoolo waya, aahaakhela muchaka waarempwe ni mulipa a miririmu Eliya, yoowo wi: “Yehova, Muluku a Tavite nikholo naa, ooloca ariki: ‘Weyaano hiwence mu iphiro sa Yehosafati, apapaa, naari mu iphiro sa Asa, mwene o Yuta.
13 Nto weyaano oneeca mu iphiro sa mamwene o Isarayeli, nave woomweeriha Yuta ni achu oomaka o Yerusalemu opaka ocapaheya woomunepani ntoko ocapaheya wa echoko ya Akape; ophiyerya wi weyaano woowiipha asinnaa, a echoko ya apapaa, yaawo yaari oophwanelela woopwaha weyo.
14 Wanthowa na yeeyo, Yehova onahaala waalaka achu aa, anamwane aa, asaaraa, ophitaanyerya sookhalano saa soothene.
15 Nave weyaano onahaala okhalano ireca sincipale, ophitaanyerya ereca ya marupo yeeyo enahaala otepaka nihiku ti nihiku, ophiyerya marupo aa ekhumenle vaate.’”
16 Voocharela, Yehova aamulaka Yehoramu moorweela wa Afilisti* ni a Aarape yaawo yaakhala waacamela o Etiyopiya.
17 Awo yaamuhiphela Yuta, evolowa mpooma, nave ekuxa muhakhu woothene yaaphwannyaaya mu empa ya mwene,* ophitaanyerya anamwane awe ni asaariye; pahiru mwaana aahanle aari Yehowakasi,* mwanawe a mukhaanixa.
18 Nave emanle weereya yeela, Yehova aaheeriha wi Yehoramu ahooxeye ni ereca yoohipenuxeya mmaruponi.
19 Evinrevo elukuluku ohoolo waya, saakhwanenle iyaakha piili, marupo awe yaakhumela vaate wanthowa na ereca, nave owo aakhwa ahooxeyaka vancipale wanthowa na ereca awe. Achu awe hiyaawiisenle mooro wi emucicimihe, ntoko yeerelaaya ni makholo awe.
20 Owo aarino iyaakha makhumi mararu napiili* vaavaa aakhanleiye mwene, nave aalamulela mu iyaakha thanu nararu o Yerusalemu. Haavo aathananne vaavaa aakhwileiye. Mwa yeeyo owo aavithiwa mu epooma ya Tavite, nto ohiya mahiye a mamwene.
Inoota
^ 32.
^ Mu Ehepiri, “munepa wa Afilisti.”
^ Naari: “empa yoomwene.”
^ Awiichaniwa tho Akasiya.
^ 32.
