Liivuru Anaawiili a Matharihelo 4:1-22
4 Voocharela, owo aampaka altare a muchove, a ikoovatu makhumi meeli orekama wawe, ikoovatu makhumi meeli oruku awe, ni ikoovatu khumi oya osulu.
2 Ohoolo waya, aapaka Ephareya* ya emetaale yoohaniwa. Eyo yaari yoorukurerya, ekhopela ni ekhopela yaarino ikoovatu khumi nave oya osulu yaarino ikoovatu thanu, nave waari woochuneya mukoi wa ikoovatu makhumi mararu wa ophimano wi oviriheliwe ephareya.
3 Vathi va mukoi, moorukurerya mwaya, waacekiwamo iruku saalikana ni mino, sirekamelanne ikoovatu khumi, orukurerya Ephareya yoothene. Iruku seiho saacekiwe aliinya apiili nave soothene saahaneliwe vamoha ni Ephareya.
4 Ephareya yaari vasulu va imope khumi napiili, raru saaweha omoko, raru saaweha onakhuma nsuwa, raru saaweha ohico nave raru saaweha onayawo nsuwa; Ephareya yaari veeri va axinama, nave miila saya saari veeri va Ephareya.
5 Yaakhalano mwiici wa mannuwelo a ntata;* Muceka aya waapakiwe ntoko muceka wa koopho, waalikana ni ethutu. Mu nchiya waanwerya oheliwamo ipaatu* sawaakhwana macikhwi mararu.
6 Ohiya yeeyoru, owo aahipaka ipasiya khumi nave thanu akuha omoono woolopwana wa empa nave thanu akuha omoono woothiyana. Mwemmo saanarapihiwamo ni otuluxiwa soothene saaphariheliwa ntakhara sooveleela soopahiwa. Nyenya maahi a mu Ephareya yaaphariheliwa wi anamukucho esusulekemo.
7 Voocharela, owo aahipaka mithiko sa ooru sawaakhwana khumi, mwawiiwanana ni sooleeliherya, nave akuha mu empa ya Muluku, thanu omoono woolopwana ni thanu omoono woothiyana.
8 Owo tho aahipaka meesa khumi nave akuha mu empa ya Muluku, mathanu omoono woolopwana nave mathanu omoono woothiyana; nave owo aahipaka itixela sa ooru nsana.
9 Voocharela, owo aahipaka n’yate na alipa a mukucho ni n’yate ntokweene ophitaanyerya milako sa n’yate; owo aahuruwela masele aya ni muchove.
10 Nave aahitikitherya Ephareya omoono woolopwana, makupa a weiwo onayawo nsuwa.
11 Iramu aahipaka tho ikaruma soohelamo ecuurwa, iphaya ni itixela.
Mwawiihiiha, Iramu aahikwaaxa muteko yoowo aampakenleiye Mwene Solomoni mu empa ya Muluku eeparipari:
12 Apoco apiili ni ikhara seiho saakuhiwe oponta wa apoco; areeti apiili yaahuruweliweno ikhara soopiili saari mmukhalelo wa etixela seiho saari opontani wa apoco.
13 Aahipaka tho sawiima sa romaa masana maxexe ahela wa areeti oopiili, aliinya* apiili a sawiima sa romaa wa reeti ti reeti wi sihuruwele ikhara soopiili mmukhalelo wa etixela seiho saari mu apoco;
14 ikariinya khumi ni ipasiya khumi sa mu ekariinya;
15 Ephareya ni imope khumi napiili vathi vaya;
16 nave ikaruma soohelamo ecuurwa, iphaya, ikaarfu, vamoha ni ikaruma soothene. Iramu-api aampakenle Mwene Solomoni ichu seiha ni muchove waphaama, ntakhara empa ya Yehova.
17 Mwene aahanne o tistritu yo Yortano, mu nipuro na wuupamo oloko, variyari va Sukoti ni Sereta.
18 Solomoni aahipaka sawaacaxa ikaruma seiha soothene; nave ohokola wa muchove hiwaalakhanyeriwe.
19 Solomoni aahipaka soothene ntakhara empa ya Muluku eeparipari: Altare a ooru; meesa yaakuhiwavo ipaau sa sawooniherya;
20 mithiko ni onyaari aya sa ooru aphaama, wi ivareleke mu esaala ya mpuwa mwawiiwanana ni yeeyo yaachuneya;
21 ithutu, onyaari, ni ikaruma sa opanano sa ooru, ooru aphaamaxa;
22 sooxipihano mithiko, itixela, akoopho ni ipiya sa ohelamo makhala a mooro sa ooru aphaama; mulako wa empa, masele a mpuwa a mu Nipuro Naweelaxa, ni masele a mu empa ya Muluku, soothene sa ooru.
Inoota
^ Naari: “Nchiya.”
^ Echu ya asentiimetru 7,4. Mmoone apentise 2.14.
^ Epaatu emoha yaanaakhwana iliituru 22. Mmoone apentise 2.14.
^ Naari: “misera; afiila.”
