Liivuru Anaawiili a Matharihelo 6:1-42
6 Voocharela, Solomoni aahi: “Yehova aahiloca wi aahaala okhala mmeekuni ooriipa.
2 Vano miyo kohootekelaani empa yootikhiniha wi mukhalekemo, wi mukhaleke mwemmo okhala wookhala.”
3 Voocharela, mwene aarukunuwa nave apacerya oreeliha muloko woothene wa Isarayeli oniiha muloko woothene weemenle.
4 Owo aahiloca: “Acicimihiwe Yehova Muluku a Isarayeli, yoowo moorweela wa eyano awe aaroromelinhe apapa aka Tavite nave moorweela wa matata awe aakhwanihenrye ariki:
5 ‘Ovinyerya nihiku kaakuminhaakawo achu aka elapo yo Yikuputu, nkithanlile epooma variyari va maloko oothene a Isarayeli wi kitekewo empa wi nsina naka ntitelele okhala weiwo, nave nkimuthanlile muchu wi akhale muhooleli a nloko naka Isarayeli.
6 Nto koomuthanla Yerusalemu wi nsina naka ntitelele okhala weiwo, nave koomuthanla Tavite wi akhale muhooleli a nloko naka Isarayeli.’
7 Nave yaari yookhwela ya murima ya apapa aka Tavite, oteka empa ntakhara nsina na Yehova, Muluku a Isarayeli.
8 Nyenya, Yehova aahiloca wa apapa aka Tavite: ‘Nchuno naa na vamurimani ori oteka empa ntakhara nsina naka, ti yaphaama wi wookhalano nchuno nenla mmurimani mwaa.
9 Nto weyaano honi oteke empa; mwanaa a mwaamulopwana yoowo oneeraawe omuyare,* toni ateke empa ntakhara nsina naka.’
10 Yehova ohaakhwaniherya yoororomeliha yeeyo aapankeiye, woona wi kohaaraceela apapa aka Tavite nave kookiraathi va munyukhu wa Isarayeli, hiihaa ntoko Yehova aaroromelinheiye. Kooteka tho empa ntakhara nsina na Yehova Muluku a Isarayeli,
11 nave koomukuhamo Arka onaphwanyeyamo nlakano nenlo Yehova aapankeiye ni nloko na Isarayeli.”
12 Voocharela, owo aaheemela vakhiviru va altare a Yehova ohoolo wa muloko woothene wa Isarayeli, nave aaviiha matata awe.
13 (Solomoni aahipaka epalku ya muchove nave akuha veeri va n’yate. Orakama waya waari wa ikoovatu* thanu, oruku aya ikoovatu thanu, ni oya osulu ikoovatu raru; owo aaheemela vaavaa.) Nave owo aakokhora ohoolo wa muloko woothene wa Isarayeli, aviiherya matata awe osulu.
14 Owo aahiloca ariki: “Nyuwo Yehova Muluku a Isarayeli, haavo Muluku onalikana ni nyuwaano wirimu naari veelaponi ya vathi, onakhapelela nlakano ni wooniherya osivela woororomeleya wa alapeli anyu, yaawo aneeca moororomeleya mu iphiro sanyu ni murima aya woothene.
15 Nyuwaano mohaakhwaniherya yoororomeliha mwaapankaanyu wa mulapeli anyu Tavite, apapa aka. Mwaapanke yoororomeliha ni eyano anyu nave olelo mohaakhwaniherya ni matata anyu.
16 Nave vano, nyuwo Yehova, Muluku a Isarayeli, mukhwaaniherye yoororomeliha yeeyo mwaapankaanyu wa mulapeli anyu Tavite, apapa aka, vaavaa mwaaloncaanyu muriki: ‘Harwaa athowa muchu a wooraceela oni akiraathi va munyukhuni va Isarayeli vamiithoni vaka, wakhala wi anamwane aa annapwacha iphiro saka, anneecela malamulo aka, hiihaa ntoko weyaano wenncaawe vamiithoni vaka.’
17 Vano, Nyuwo Yehova Muluku a Isarayeli, yaakhwanele yoororomeliha yeeyo mwaapankaanyu wa mulapeli anyu Tavite.
18 “Nto apwanne Muluku chiryene onahaala okhalaka ni achu veelaponi ya vathi? Erimu, aa, erimu ya irimu hamunaakhwanawo; hanka vooloca sa empa ela ehiya oyeva!
19 Vano, mpwache nivekelo ni yooveka ya omoreliwa ikharari ya mulapeli anyu, Khwoo Yehova Muluku aka, nave nwiriyane okhuwela ntakhara nikhaviheryo ni nivekelo nenlo mulapeli anyu onapakeiye vamiithoni vanyu.
20 Miitho anyu elipeleleke othana ni ohiyu empa yeela, nipuro nenlo mwaaloncaanyu wi mwahaala okuhawo nsina nanyu, nave nwiriyane nivekelo nenlo mulapeli anyu onapakeiye awehaka nipuro nenla.
21 Nwiriyane mavekelo a vathi vamurima a mulapeli anyu ni mavekelo a vathi vamurima a achu anyu Isarayeli vaavaa awo anavekelaaya ewehaka nipuro nenla, nave nwiriyane orweela weiwo mmankaanyuwo, wirimu; aa, nwiriyane nave mulevelele.
22 Wakhala muchu oomuchekela mukhweiye nave atitelelihiwa olipela,* anakhala mwawiiwanana ni olipelela* yoola, nave aphiya mu altare anyu mu empa yeela, aniiha ari oomakeya ni olipela* yoola,
23 mwaawiriyane orweela wirimu alapeli anyu nave mweerevo echu ni waathoriha, mmukookiheryaka yoole eenre yoonanara wa yeeyo opankeiye nave moorweela wa omweera eekhaikhai yoole ohirino nthowa* ni omuchuwela wa nthowa na wookololowa wawe murima.
24 “Nave wakhala wi achu anyu Isarayeli aavoothiwa ni mwiicani wa nthowa na otitelela woochekelaani, nave ekooka wi ecicimihe nsina nanyu ni ovekela evekaka ikharari vamiithoni vanyu mu empa yeela,
25 mwiiwe orweela wirimu nave mulevelele yoocheka ya achu anyu Isarayeli nave mwaakookiherye mu elapo yeeyo mwaavanhaanyu awo ni makholo aya.
26 “Vaavaa irimu ineeraaya iwaleye nave ehirupe epwila wa nthowa na otitelela woochekelaani, nave awo enavekela ewehaka nipuro nenla ni ocicimiha nsina nanyu ni ocharuwa wa soocheka saya wa nthowa na waahusiha wanyu okhala awiiyeviha,*
27 nwiriyane orweela wirimu nave mulevelele yoocheka ya alapeli anyu, achu anyu Isarayeli, mwaahusihe yaawo mphiro waphaama yoowo anaphwanelaaya weecakamo; nave muruuhe epwila mu elapo anyu yeeyo mwaavanhaanyu achu anyu ntoko yoohiyeryiwa.
28 “Wakhala wi mweelaponi wookhalamo etala, naari epahu, oviha, okuukure, epahu ya nasope, naari misope soopahula, naari wakhala wi amwiicani aarica ipooma sa elapo* yeela, naari wakhala wi yoheereya epahu ekina naari ereca,
29 nivekelo vyakala, yooveka vyakala ntakhara omoreliwa ikharari yeeyo muchu oneereiye apake naari achu anyu oothene Isarayeli eneeraaya epake (woona wi muchu ti muchu oosuwela makacamiho awe ni yawiicela awe) vaavaa awo eneeraaya ewelihe mata ewehaka empa yeela,
30 mwiiwe ovinyerya wirimu, nipuro munakhalaanyuwo, nave mwaalevelele; mmuchuwele mmoha ti mmoha mwawiiwanana ni iphiro sawe soothene woona wi nyuwo moosuwela murima awe (nyeenyuru musuwenle mweeparipari murima wa muchu).
31 Mwawiihiiha, awo ewoovekeeni, moorweela wa weeca mu iphiro sanyu mahiku oothene eneeraaya ekhaleke mu elapo yeeyo mwaavanhaanyu makholo ahu.
32 “Nave vooloca sa namarwa yoowo ohinapaka makupa a achu anyu Isarayeli ni yoowo oni arwe mu elapo yoorakamela wa nthowa na nsina* nanyu ntokweene ni ntata nanyu nakuru ni moono anyu wawookowa, nave arwa anavekela awehaka empa yeela,
33 nwiriyane orweela wirimu, nipuro nanyu munakhalaanyuwo, nave mweere soothene seiho namarwa oneereiye oovekeeni, wi achu oothene a veelaponi ya vathi esuwele nsina nanyu ni owoovaani, hiihaa ntoko achu anyu Isarayeli aneeraaya, nave esuwele wi nsina nanyu nniichaniwa mu empa yeela kitenkaaka.
34 “Wakhala wi achu anyu aaya okhoconi wi ewane ni amwiicani aya evira mu mphiro yoowo mwaarummaanyu nave enavekela ewehaka epooma yeela muthanlilaanyu ni empa yeela kitenkaaka ntakhara nsina nanyu,
35 mwiiwe orweela wirimu nivekelo naya ni yooveka aya ntakhara omoreliwa ikharari nave muweerele yeekhaikhai.
36 “Wakhala wi awo ahoochekelaani (woona wi haavo muchu ohinacheka), nave nyuwaano munyeenyeya ni yaawo nave mwaanyanyala wa amwiicani, ephariwa ekerihiwaka mu elapo yoorakamela naari yookhuveela,
37 nave awo yiisuupuwelela mu elapo yeeyo akerihiwaayawo ntoko akapuro, yookookelaani yooovekakaani waamorela ikharari mu elapo yeeyo awo aryaaya akapuro, eriki: ‘Noocheka nave noopaka yoonanara ni yeeyo eri yootakhala,’
38 nave awo yookookelaani ni murima aya woothene ni okumi* aya woothene mu elapo yeeyo aryaaya akapuro weiwo akerihiwaayawo wookapuroni, enavekela ewehaka elapo aya mwaavanhaanyu makholo aya ni epooma yeeyo muthanlilaanyu ni empa yeeyo kitenkaaka ntakhara nsina nanyu,
39 mwiiwe orweela wirimu nipuro nenlo munakhalaanyuwo, nivekelo naya ni yooveka aya ya omoreliwa ikharari, nave muweerele ekhaikhai, mwaalevelele achu anyu yaawo oochekenleeni.
40 “Vano, Khwoo Muluku aka, miitho anyu ehuleye nave maaru anyu ewiriyane nivekelo nni nipakiwe mu* nipuro nenla.
41 Nave Yehova Muluku nwele mu nipuro nanyu nawiichuuwa, nyuwo ni Arka anyu akuru. Yehova Muluku, alipa amukucho anyu eware ovuluxa, nave yaale ari oororomeleya wa nyuwo ehakalale wa nthowa na oreera wanyu murima.
42 Yehova Muluku muhimukhooce* oothanliwa anyu. Muupuwele osivela wanyu woororomeleya wa Tavite mulapeli anyu.”
Inoota
^ Mu Ehepiri, “mwanaa yowo ani akhume muyuununi mwaa.”
^ Ekoovatu emoha yaakhwana 44,4 sentimeetru. Mmoone apentise 2.14.
^ Naari: “nave owo amuulumela yoowo.” Ela tiwi, olipela yoowo waakumiherya wuulumela wa olakiwa ni waatheru naari hokhwaaniheryiwe.
^ Mu Ehepiri, “wuulumela.”
^ Mu Ehepiri, “wuulumela.”
^ Mu Ehepiri, “awookololowa murima.”
^ Naari: “waatannyerya makacamiho.”
^ Mu Ehepiri, “mu elapo ya milako.”
^ Naari: “meecelo anyu.”
^ Moone Masu Atharihiwe.
^ Naari: “vooloca sa.”
^ Mu Ehepiri, “muhirukunuxele ethoi ya.”
