Liivuru Anaawiili a Matharihelo 7:1-22
7 Vano, vaavaa Solomoni aamalinheiye ovekela, waakhuma mooro wirimu weeyela soovaha soopahiwa ni mikucho, nave ncicimiho na Yehova naasareya mpa.
2 Alipa a mukucho hiyaawerya ovolowa mu empa ya Yehova woona wi ncicimiho na Yehova naasareya mpa mwa Yehova.
3 Nave achu oothene a Isarayeli yaanoona vaavaa mooro waakhuruwaaya ni ncicimiho na Yehova naaraaya va empa; awo yaathipela iyuuci saya vathi vachu waapacheliwevo nave yaakokhora emuthamalelaka Yehova, “woona wi owo taphaama; osivela wawe woororomeleya onniikhalelaru.”
4 Vano, mwene ni achu oothene yaahivaha mikucho vamiithoni va Yehova.
5 Mwene Solomoni aavaha ntoko mikucho imope macikhwi makhumi meeli nameeli* ni ipucepuche macikhwi nsana nimoha ni makhumi meeli.* Mwawiihiiha, mwene ni achu oothene yaahulela empa ya Muluku eeparipari.
6 Alipa a mukucho yaaheemela mmapuro aya a muteko, hiiha ntoko Alevi yaawo yaarino ikaruma sa macipo saacharihiwa yiipiwaka macipo ntakhara Yehova. (Mwene Tavite aahipaka ikaruma seiho wi athamaleliwekeno Yehova, “woona wi osivela wawe woororomeleya onniikhalelaru okhala wookhala,” elukuluku yeeyo Tavite iipeiye macipo a ocicimiha.*) Nave alipa a mukucho yaaniipa mapenka moovuwa ohoolo wa Alevi, eniiha Aisarayeli oothene erimweemela.
7 Voocharela, Solomoni aaheeliha nipuro na veeri na n’yate nenlo naari ohoolo wa empa ya Yehova, woona wi owo aaphwanela ovahakavo soovaha soopahiwa ni ipaanya sa mikucho sawaataana, ntakhara altare a muchove Solomoni aampankeiye, hinnunwexa wi saakhwanevo mikucho soopahiwa, soovaha sa soolya ni sa ipaanya.
8 Mu elukuluku yeeyo, Solomoni aapaka efesta mu mahiku mathanu nameeli vamoha ni Isarayeli oothene, muloko mutokweene waakhumme o Lepo-hamati* ophiyerya o muhice* wo Yikuputu.
9 Nyenya mu nihiku naneethanu nararu* awo yaapaka muthukumano wavameekhaaya, woona wi awo yaamuhulela arka mmahiku mathanu nameeli nave yaapaka efesta mmahiku mathanu nameeli.
10 Voocharela, mu nihiku na makhumi meeli nararu na mweeri waneethanu napiili, owo aahaarowiha achu mmawannyaya ehakalanle nave murima oweenle wa nthowa na oreera murima wa Yehova oonihenryeiye wa Tavite ni wa Solomoni vamoha ni achu awe Isarayeli.
11 Mwawiihiiha, Solomoni aahikwaaxa empa ya Yehova ni empa ya mwene; nave ichu soothene Solomoni uupuweleiye vooloca sa empa ya Yehova ni empa awe owo aahaakhwaniherya phaama.
12 Voocharela, Yehova aahooneya wa Solomoni ohiyu nave aloca ni yoowo ariki: “Kohiiwa nivekelo naa nave koothanla nipuro nenla wi nikhale nawaka ntoko empa ya mikucho.
13 Wakhala wi koowala erimu nave epwila ehikhalawo, waakhala wi koolamulela misope wi ilye soolya sa mweelaponi nave wakhala wi koorumiha epahu wa achu aka,
14 wakhala wi achu aka yaawo anakuxa nsina naka ahiiyeviha nave evekela yaavyaka ethoi aka, ni ohiya iphiro saya soonanara, kinahaala owiiwa ovinyerya wirimu ni waakhurumuwela soocheka saya ni openuxa elapo aya.
15 Vano miitho aka anahaala ohuleya nave maaru aka anahaala owiriyana mavekelo a nipuro nenla.
16 Koothanla ni weeliha empa yeela wi nsina naka niichaniweke vaavaa okhala wookhala, nave miitho aka ni murima aka anahaala okhala vaavaa.
17 “Nave weyo, wakhala wi onneeca moororomeleya mu iphiro saka hiihaa ntoko apapaa Tavite yeencaaya moorweela wa wiiwelela ichu soothene koolamulenlaaka ni wiiwelela malakiheryo aka ni mathorihelo aka,
18 kinahaala otikitherya munyukhu wa olamulelo aa, hiiha ntoko kaapankaaka waataana ni apapaa Tavite, kiriki: ‘Harwa athowa muchu a wooraceela mu muyareriwo aa yoowo onahaala omulamulelaka Isarayeli.’
19 Nyenya wakhala wi moohuwela nave munyanyala malakiheryo aka ni malamulo aka yaawo koovanhaakaani nave mpwaha munaalapela amuluku akina ni waakokhorela yaawo,
20 kinahaala omwaakha Isarayeli elapo kimvanhaaka, nave empa yeela keelinhaaka ntakhara nsina naka, kinahaala orihela okhwipi nave kinahaala weeriha wi enanyemuliwa ni orohiwa ni achu oothene.
21 Nave Empa yeela, enahaala okhala milepe. Muchu ori oothene onahaala owehaka mootikhiniheya ni oloca ariki: ‘Ntakhara heeni Yehova eenreiyeno hiiha ni elapo yeela vamoha ni empa ela?’
22 Voocharela, awo anahaala oloca eriki: ‘Ti nthowa nawi awo aamunyanyala Yehova Muluku a makholo aya, yoowo aaruuhale mu elapo yo Yikuputu nave awo ewaakeelela amiluku akina enaakokhorela ni waalapa yaawo. Ti nthowa nene owo aarumihenleiye epahu yeela yoothene.’”
Inoota
^ 22.000.
^ 120.000.
^ Akhweya anaahiwa Alevi.
^ Naari: “mulako wo Hamati.”
^ Moone Masu Atharihiwe.
^ Nihiku nocharela na efesta, naari mu nihiku naneekhumi nathanu.
