Liivuru Anaawiili a Matharihelo 8:1-18
8 Omakuchuwelo wa iyaakha makhumi meeli, elukuluku Solomoni aatenkeiye empa ya Yehova ni empa awe ene,*
2 Solomoni aahuuluula oteka ipooma seiho Iramu aamvanheiye Solomoni nave aakuhamo Aisarayeli* wi ekhaleke mwemmo.
3 Ohiya yeeyoru, Solomoni aahiya o Hamati-sopa nave akuxa epooma.
4 Voocharela, aahilipiha* epooma yo Tatimori, otakhwani, ni ipooma soothene sookhapelelamo seiho owo aatenkeiye o Hamati.
5 Solomoni aahimuteka tho Peti-horoni Oomoko ni Peti-horoni Oohico. Saari ipooma soolipihiwa ni ixiri, masele, ni iwalelo.
6 Aahimuteka tho Palati vamoha ni ipooma soothene sookhapelelamo sa Solomoni, ipooma sa alipa ooweeciha akavalo ni soothene seiho Solomoni aachunneiye oteka o Yerusalemu, o Lipanu ni mu ilapo soothene aachuneiye olamulela.
7 Vooloca sa oothene yaahalenle a Aheti, a Amori, a Aperisi, a Ahevi ni a Ayepusi, yaawo yahaapaka makupa a Isarayeli,
8 muyareriwo wa maloko yaala yaahanle mweelaponi nave Aisarayeli yahaawiiphalaaya, yaaphariwa ni Solomoni wi elapeke miteko sawimphareliwa, nave annatitelela olapa ophiyerya olelo.
9 Nyenya Solomoni haamukunse muchu mmoharu mano Aisarayeli okhala kapuro a muteko awe, woona wi awo yaari anakhoco awe, ahooleli a asitokweene awe, ahooleli aalipa aweeciha ikaaro sawe sa ekhoco ni ooweeciha akavalo.
10 Yaakhalavo asitokweene a ahooleli a muteko wa Mwene Solomoni, awaakhwana masana meeli ni makhumi mathanu. Awo yaari ahooleli a anamuteko.
11 Solomoni aamukusa mwaariye, mwaana a mwaamuthiyana a Farawo, o Epooma ya Tavite, amukeriha mu empa yeeyo aamutekenleiye, tiwi aaloca: “Naamwi ola ari mwaaraka, hanaphwanela okhala mu empa ya Tavite Mwene a Isarayeli, woona wi, mapuro yaawo Arka a Yehova aakhaleiyevo taweela.”
12 Voocharela, Solomoni aaveleela wa Yehova mikucho soopahiwa va altare a Yehova yoowo aamutenkeiye ohoolo wa nipithela.
13 Owo aanachariha nihiku ti nihiku meerelo a opaka sooveleela mwawiiwanana ni nlamulo na Mose ntakhara Sapata, miyeeri mivyaani, ni ifesta raru sa vayaakhani: Efesta ya Ipaau Soohiheliwa Yooruruvaliha, Efesta ya Isumana ni Efesta ya Misakala.*
14 Ohiya yeeyoru, mwawiiwanana ni sooleeliherya sa Tavite, apapa awe, Solomoni aahithanla makhuuru aalipa a mukucho, wi aphareke miteko saya; aahaathanla tho Alevi wi ekhanle mmapuro aya a muteko, wi emucicimiheke Muluku ni orumeela vamiithoni va alipa amukucho mwawiiwanana ni miteko sa nihiku nnihiku; nave aahaathanla alipeleli a milako mmakhuuru aya nave aakuha mmilako soohiyanahiyana; woona wi nla naari nlamulo na Tavite, muchu a Muluku eeparipari.
15 Nave awo hiyaahin’yeru ochariha nlamulo mwene aavanheiye alipa a mukucho ni Alevi vooloca sa mwaha vyakala, naari vooloca sa mapuro ookhapelelamo.
16 Mwawiihiiha, muteko woothene wa Solomoni waareheryeya phaama, ovinyerya nihiku yaatikitheryiwaaya mathipelo a empa ya Yehova ophiyerya okwaaxiwa waya. Hiihaa, empa ya Yehova yaamalihiwa.
17 Mwawiihiiha, Solomoni aahiya o Siyoni-xeper ni o Eloti, oxerexere wa ephareya, elapo yo Etomi.
18 Iramu aahimurumihela apophoro ni alipa ooweeciha a mavyakelo moorweela wa anamuteko awe. Awo yaahicimula ni anamuteko a Solomoni eyaaka o Ofiri, eruuhawo italentu sa ooru masana masese ni makhumi mathanu* nave emukerihela Mwene Solomoni.
Inoota
^ Naari: “empa awe yoomwene.”
^ Mu Ehepiri, “anamwane a Isarayeli.”
^ Naari: “aahuuluula oteka.”
^ Naari: “Tapernakulu.”
^ 450.
