Liivuru Anaawiili a Matharihelo 9:1-31
9 Mwene a mwaamuthiyana o Sepa aahiiwa vooloca sa ovuwa wa Solomoni; mwawiihiiha, owo aahiya o Yerusalemu wi amweehe Solomoni ni makoho oovila.* Owo aahihooliwa ni muloko mutokweene wa anamuteko, vamoha ni akamelu eteenxe makhurwa a palsamu ni ooru muncipale vamoha ni maluku asisapo. Owo aaphiya wa Solomoni nave aaloca soothene saari mmurimani mwawe.
2 Solomoni aahaakhula makoho awe oothene. Hinaavo nikoho naari noovilaxa wa Solomoni omutharihela yoowo.
3 Vaavaa mwene a mwaamuthiyana o Sepa oonneiye miruku sa Solomoni, empa aatenkeiye,
4 yoolya ya vameesa awe, mukhalelo yaakiraathaaya anamuteko awe, muteko wa yaale yaakuha yoolya vameesa ni soowara saya, anamuteko awe yaalawiha eviinyu ni soowara saya, ni mikucho soopahiwa owo aavaheiye mu empa ya Yehova, mwene a mwaamuthiyana haarino yooloca.*
5 Mwawiihiiha, owo aaloca wa mwene ariki: “Soothene kiiwalaaka mu elapo aka vooloca sa miteko sanyu* ni vooloca sa miruku sanyu yaari eparipari.
6 Nave pahiru keemerenrye yeeyo kiiwaaka kimanle orwa ni woona ni miitho aka. Nto mweeparipari nkaaleeliwe naari eriyari ya miruku sanyu mitokweene. Nyuwaano moopwaha vancipale wa yeeyo kiiwalaaka vooloca sa nyuwo.
7 Oohakalala aachu anyu nave oohakalala anamuteko anyu yaawo anakhala ni nyuwo ilukuluku soothene ewiriyanaka miruku sanyu!
8 Acicimihiwe Yehova Muluku anyu, yoowo ohakalanle ni nyuwo, ookuhakaani vamunyukhuni vawe ntoko mwene mu nsina na Yehova Muluku anyu. Woona wi Muluku anyu oomusivela Isarayeli nave onachuna wi owo akhale okhala wookhala, ohoothanlaani ntoko mwene wi mulamuleleke mweekhaikhai ni mwawookololowa.”
9 Voocharela owo aamvaha mwene italentu* sa ooru nsana nimoha ni makhumi meeli, makhurwa a palsamu awaaca vamoha ni maluku a asisapo. Hatonko oruuhiwa makhurwa a palsamu ntoko yaawo mwene a mwaamuthiyana o Sepa aamvanheiye Mwene Solomoni.
10 Ohiya yeeyoru, anamuteko a Iramu ni anamuteko a Solomoni yaawo yaamuruuhale ooru o Ofiri, yaaruuha tho ithaapwa sa santalu ni maluku asisapo.
11 Ni ithaapwa seiho sa santalu, mwene aapakelano ixikata ntakhara empa ya Yehova ni empa* ya mwene, nave tho aahaapakano apankwe ni ikaruma sa mikoyi ntakhara alipa a wiipa. Hisaatonko wooniwa ithaapwa soolikana ni seihe mu elapo yo Yuta.
12 Mwene Solomoni tho, aamvaha mwene a mwaamuthiyana o Sepa soothene owo aachuneiye ni aavenkeiye, aamvaha sincipale opwahana owo aaruuhaleiye ntakhara mwene. Voocharela, mwene amwaamuthiyana aacimula akookela elapo awe vamoha ni anamuteko awe.
13 Ohokola wa ooru yoowo Solomoni aamwaakheleiye eyaakha ti eyaakha aanaakhwana italentu masana mathanu nammoha ni makhumi mathanu nammoha* ni thanu nammoha,
14 ehaalakhanyeryiwe yeeyo yaaruuhiwa ni alipa a maroca, alipa ootumiha, mamwene oothene o Arape ni alamuleli a elapo, yaawo yaamuruuha ooru ni eparata ntakhara Solomoni.
15 Mwene Solomoni aapaka iyaakiho itokotoko masana meeli sa ooru oohaniwa (eyaakiho ti eyaakiho yaakhalano isiikulu* masana mathanu nammoha sa ooru oohaniwa)
16 vamoha ni iyaakiho ikhaani* masana mararu sa ooru oohaniwa (eyaakiho ti eyaakiho yaakhalano imiina* raru sa ooru). Mwawiihiiha, mwene aahikuha mu empa ya ntakhwa no Lipanu.
17 Mwene tho aahipaka munyukhu mutokweene wa marfi nave ahuruwela ni ooru aphaama.
18 Saakhalavo ixikata thanu nammoha ophiyerya vamunyukhuni ni enyikalelo ya inaani ya ooru yaapakeliwe vamunyukhuni; mpaco waakhalano makupa oohaamelamo miwono, nave makupa ti makupa oohaamelamo miwono yaakhalamo eruku ya mwaco.
19 Nave mu ixikata thanu nammoha yaakhalamo amwaco khumi napiili, makupa ti makupa a exikata thanu nammoha. Haavo mwene mukina aarino munyukhu waalikana ni yoowo.
20 Akoopho oothene a Mwene Solomoni yaari a ooru, nave ikaruma soothene sa Empa ya Ntakhwa no Lipanu saari sa ooru aphaama. Hiyaarivo echu yaapakiwe ni eparata woona wi mmahiku a Solomoni hiyaavahiwa esisapo eparata
21 Tiwi, apophoro a mwene yaanaya o Tarsi ni anamuteko a Iramu. Ekwaha emoha mpuwa mwa iyaakha raru, apophoro o Tarsi yaanarwa emucukhunle ooru, eparata, marfi, akhole ni apavawu.
22 Mwawiihiiha, Mwene Solomoni aari ooreelaxa, amirukuxa waapwaha mamwene oothene akina a veelaponi ya vathi.
23 Nave mamwene mu elapo yoothene yaanachuna oloca ni* Solomoni wi yiiwe miruku sawe, seiho Muluku eeparipari aahenleiye mmurimani mwawe.
24 Oothene yaanamuruuhela samahala: Ikaruma sa eparata, ikaruma sa ooru, soowara, ikaruma sakhoco, makhurwa a palsamu, akavalo, amuula. Ela yaaneereya eyaakha ti eyaakha.
25 Solomoni aakhalano mapuro a akavalo macikhwi masese* ntakhara akavalo* awe ni ikaaro sakhoco, vamoha ni akavalo macikhwi khumi napiili,* nave aanaakhapelela o ipooma sa ikaaro sakhoco ni o Yerusalemu, waacamela wa mwene.
26 Owo aanaalamulela mamwene oothene ovinyerya o muhice Eufrate* ophiyerya elapo ya Afilisti, ni ophiyerya o munlaano wa ekulucu yo Yikuputu.
27 Mwene aaheeriha eparata okhala yawaaca o Yerusalemu ntoko maluku; nave aaheeriha ithaapwa okhala sawaaca ntoko miri sa sikoomoro so Sefela.
28 Nave yaanaruuhiwa o Yikuputu akavalo ntakhara Solomoni ni makupa makina oothene a ilapo.
29 Vooloca sa saweereya ikina sa Solomoni, ovinyerya woopaceryani ophiyerya omakuchuwelo, apwanne hasirempwe mu soorepa sa Natani mulipa a miririmu, mu masu a miririmu a Aiya Musilonita, ni sawoona sa Itu mulipa awoona vooloca sa Yeropowamu, mwaana a Nepati?
30 Solomoni aamulamulela Isarayeli o Yerusalemu mu iyaakha makhumi maxexe.
31 Mwawiihiiha, Solomoni aahiichuuwa vamoha ni makholo awe, nave yaamvitha mu epooma ya Tavite, apapa awe; nave mwanawe Rehopowamu aakhala mwene mu nipuro nawe.
Inoota
^ Naari: “ootikhiniha.”
^ Mu Ehepiri, “hiwaarimo tho munepa mwa yoowo.”
^ Naari: “masu anyu.”
^ Etalentu emoha enaakhwana ikiilu 34.2. Mmoone apentise 2.14.
^ Naari: “empa yoomwene.”
^ 666.
^ Esikulu emoha yaakhwana ikrama 11.4. Mmoone apentise 2.14.
^ Naari: “iproke,” iyaakiho ikhaani seiho wiiliwiili saaphariheliwa ni alipa oovonya munra.
^ Miina mmoha mu Soorempwa sa Ehepri onaakhwana ikrama 570. Mmoone apentise 2.14.
^ Mu Ehepiri, “ yaanaavya ethoi ya.”
^ 4.000.
^ Naari: “alipa ooweciha akavalo.”
^ 12.000.
^ Mu Ehepiri, “Muhice.”
