2 Timotiyu 4:1-22
4 Miyo kinnoolamulela vamiithoni va Muluku ni va Kristu Yesu, yoowo onahaala waathoriha akumi ni alipa ookhwa, moorweela wa wiisooneiha wawe ni Omwene awe:
2 Olaleerye masu, weereno yeela mwawaakuveya mu ilukuluku saphaama ni mu ilukuluku soovila; osamele, ovaanye, olopole, ni opixa murima woothene vamoha ni mavyakelo a ohusiha.
3 Vawi enamphiya elukuluku eneeraaya ehivilelekeno mahusiheryo aphaama,* nyenya vooneeniwa owaruni* ekaamwiithukumanyerya ahusiha mwawiiwanana ni minkhela saya.
4 Awo enarwa ehiya wiiwa eparipari nave enawiriyana miyaha satheru.
5 Vano weyo, okhapelela mavyakelo aa awuupuwela mu ichu soothene, ovilele soohooxa, ophare muteko wa mulipa oolaleerya,* weereno mwawaakhwanela muteko aa.
6 Tiwi miyo kinnayeehiwa ntoko yoovaha ya yoowurya, nave elukuluku ya ovuluxiwa waka yohaacamela.
7 Koowana ekhoco yaphaama, kookwaaxa ochimaka, kookhala mwawiiwanana ni nroromelo.
8 Ovinyerya hiihaano oya ohoolo kinnawehererya omwaakhela korowa awookololowa, yoowo Apwiya, muthoriha awookololowa, aneeraaya ekivahe nihiku na ochuweliwa; ohiya pahiru yoomi, nyenya tho oothene yaale anasivela* wiisooneiha wawe.
9 Opake soothene onaweryaawe wi okixekurye mwawaakuveya.
10 Tiwi Tema ookihiya woona wi aanasivela mukhalelo wa ichu wa mutano,* nave owo oopwaha ayaaka o Tesalonika, Kereisenti ayaaka o Kalatiya, Titu ayaaka o Talmasiya.
11 Pahiru Luka tori ni miyo. Waarwaaka omuruuhe Marku ntakhara owo tookhweleya wa miyo mmuteko.
12 Nyenya koomuruma Tikiku oya o Efesu.
13 Waarwaaka, omuruuhe kaapha aka kaamuhin’yaaka o Trowate ni Karpu, nave tho ni iroolu, xaxaxa seihe sa ixapala.
14 Alexantre mulipa oohana muchove ookihooxa vatokotoko. Yehova onammukookiherya mwawiiwanana ni saweera sawe.
15 Weyaano tho onaphwanela okhalano ephoole ni yoowo, woona wi owo onnatepa ovaanya michaka sahu.
16 Mu wiisaakiha waka haavo aari ni miyo, nyenya oothene yaakihiya. Muluku ahaathorihe yaawo.
17 Nyenya Apwiya yaari mmakupa aka nave yaanakilipiha, wi moorweela wa miyo waakhwanele phaama muteko woolaleerya nave wi maloko oothene ewerye owiriyana; nave kaavuluxiwa mwaano mwa mwaco.
18 Apwiya anahaala okivuluxa wa soonanara soothene nave anamukivuluxa wa Omwene aya wa wirimu. Wa yoowo avahiwe ncicimiho okhala wookhala. Aamen.
19 Oveleele mooni aka wa Priska ni Akila vamoha ni echoko ya Onesiforu.
20 Erastu ohanle o Korintu, nyenya kimuhin’ye Trofimu o Miletu arikimwiiceliwa.
21 Opake soothene onaweryaawe wi ophiye wenno ehaakumve elukuluku ya nakhutu.*
Eupulu onnoovonyerya mooni awe, vamoha tho ni Putenti, Linu, Klautiya, ni anna oothene.
22 Apwiya ereelihe wiivaha waa waphaama. Mahala aya matokweene ekhale ni weyo.
Inoota
^ Naari: “ookumi; amphurelo.”
^ Naari: “echunaka oleeliwa yeeyo anachunaaya owiriyana.”
^ Naari: “otitelele olaleerya michaka saphaama.”
^ Naari: “aninlela woona.”
^ Naari: “elukuluku yeela.” Moone Masu Atharihiwe.
^ Naari: “oriirya.”
