Aefesu 6:1-24
6 Anamwane, nwiiweleleke yaawo ooyanreeni mwawiiwanana ni Apwiya, woona wi ela ti yawookololowa.
2 “Waacicimiheke apapaa ni amamaa”; nla nlamulo noopacerya ni yoororomeliha ela:
3 “Wi soothene iweecele phaama,* nave olekele mahiku mancipale veelaponi yavathi.”
4 Nyuwo alipa ooyara, muhaanyeenyeiheke anamwane anyu, nto mutitelele waaphuwa mu olaka ni mmahusiheryo* a Yehova.
5 Anamuteko, nwiiweleleke asipwiya anyu oomwiilini,* ni woova ni othukumela, nave ni murima weeparipari hiiha ntoko mwa Kristu,
6 ohiya pahiru mvareryiwaka wi mwaahakalalihe achu,* nyenya ntoko akapuro a Kristu, mweerakano yookhwela ya Muluku ni okumi anyu* woothene.
7 Mwaalapeke asipwiya anyu ni muupuwelo waphaama, ntoko wi munamulapa Yehova nave ohiya achu,
8 woona wi nyuwaano moosuwela wi saphaama soothene mmoha ti mmoha oneereiye, owo onamukookiheryiwa ni Yehova, moohipwacha aari kapuro naari muchu ootaphuwa.
9 Nave tho nyuwo asaapwiya, mutitelele waakhaliha yaawo mmukhalelo woolikana, muhiwoopopihaka, woona wi moosuwela wi Apwiya aya ni awinyu ari wirimu, nave wa yaawo hiwaawo nthalu.
10 Wookuchulani, mutitelele olipihiwa mwa Apwiya ni mu ikuru sa owerya waya.
11 Muware sawiisaakihano sawaakhwanela sa Muluku. Mmukhalelo yoola, nyuwo munanwerya okhoma* ni mavyakelo a Musaserya.
12 Woona wi nookhalano mukhico,* ohiya nnikhami ni mwiili, nto ni mamwene, asitokweene, alamuleli a elapo ela yeepiiphi, vamoha ni ikuru sa minepa sootakhala sa wiirimurimu.
13 Wa nthowa nenla, muware sawiisaakihano sawaakhwanela sa Muluku, wi nwerye okhoma mu nihiku nootakhala, nave mmanle waakhwaniherya soothene, mukhale awiithipela.
14 Mwawiihiiha, mukhale awiithipela, muwaraka esinto ya eparipari, muwanre yawiisaakihano ya vachirima ya wookololowa,
15 nave muwarinhe inaani sanyu ni oreheryeya wi mulaleerye michaka saphaama sa murecele.
16 Vamoha ni soothene iha, mpharihele yawiisaakihano etokweene ya nroromelo, yeeyo munahaalaanyu owerya oxipihano mavaka* oothene oovarela a mutakhali.
17 Nave tho, munware mmuruni mwanyu kapaseti a ovuluxa, nave mpharele mu ntata nanyu nlema na munepa, ela tiwi, masu a Muluku.
18 Ilukuluku soothene, mpakeke mavekelo a mukhalelo woothene ni mavekelo a vathi va murima, mutitelelaka ovekela mwa munepa. Nave ni yoolakelela yeela, mukhale oovinya, mpakaka mavekelo a vathi va murima moohihiyererya ntakhara aweela murima oothene.
19 Mukivekeleleke tho miyo, wi kivahiwe masu vaavaa kineeraaka kihule eyano aka, wi kiwerye oloca moolipa murima kisuwelihaka yoovitheya yaweela ya michaka saphaama,
20 wa seiho miyo kiryaaka ntoko murummwa a Omwene oomakiwa ni mithipo, nave wi miyo kiloce moolipa murima sa seiha, ntoko onaphwanelelaaya wi kiloce.
21 Vano wi musuwele tho sa mukhalelo aka ni saweera saka, Tikiku, munna oosiveliwa ni namuteko oororomeleya mwa Apwiya, onamooleelaani soothesene.
22 Kinnoorumihelaani yoowo ni yoolakelela yeela, wi musuwele sa mukhalelo ahu nave wi ahakararye mirima sanyu.
23 Anna mukhaleno murecele, osivela ni nroromelo inarweela wa Muluku, Atiithi, ni wa Apwiya Yesu Kristu.
24 Mahala matokweene ekhale ni oothene yaawo anaasivela Apwiya ahu Yesu Kristu ni osivela woohimala.
Inoota
^ Naari: “Wi weyaano okhumelele phaama.”
^ Naari: “mu ohoolela.” Mu Ekriki, “muhele mwa yaawo muupuwelo wa.”
^ Mu Ekriki, “oomuchu.”
^ Mu Ekriki, “muhilapeke wi achu ewooneeni.”
^ Moone Masu Atharihiwe, “Okumi.”
^ Naari: “ovaanya.”
^ Mu Ekriki, “mukhico mwiili ni mwiili.”
^ Naari: “inyakara.”
