Afilipi 1:1-30
1 Paulo ni Timotiyu, akapuro a Kristu Yesu, wa aweela murima oothene mwawiiwanana ni Kristu Yesu yaawo ari o Filipi, vamoha ni atokweene ni arummwa oorumeela:
2 Mahala matokweene ni murecele wa Muluku, Atiithi ahu vamoha ni a Apwiya Yesu Kristu ekhale ni nyuwaano.
3 Ilukuluku soothene kinnamuthamalela Muluku aka vaavaa kinawuupuwelaakaani
4 mmavekeloni mwaka oothene a vathi va murima ntakhara nyuwo oothene. Kinnapaka mavekelo oothene a vathi va murima moohakalala,
5 nthowa na okhaviherya wanyu* michaka saphaama ovinyerya nihiku noopacerya ophiyerya hiihaano.
6 Vawi kinnaroromela wi yoole opacenrye muteko waphaama mwa nyuwo onarwa aakhwaniherya ophiyerya nihiku na Kristu Yesu.
7 Ti woophwanelela wi kuupuweleke hiihaa vooloca sa nyuwo oothene, woona wi nyuwo muri mmurimani mwaka nave ninnuuka mahala matokweene a Muluku. Nave nyuwo mwaakikhaviherya variyari va ophariwa waka,* kaakihaka ni otikitherya michaka saphaama.
8 Tiwi Muluku namoona aka wi kookhalano munkhela ni oothene anyu, vamoha ni osivela otokweene ntoko wa Kristu Yesu.
9 Nave kinnatitelela ovekela, wi osivela wanyu otepeke wunnuwa, mukhaleno masuwelelo eeparipari, ni wiiwexexa wawaakhwanela;
10 wi musuwelekeno olakelela ichu soochuneyaxa, wi muhikhaleno nihoonya* naari waakwaculiha akina ophiyerya nihiku na Kristu;
11 nave tho wi musareye ni yawiima ya ekhaikhai, yeeyo enarwa moorweela wa Yesu Kristu wi Muluku avuwihiwe ni acicimihiwe.
12 Anna, kinachuna wi musuwele wi mukhalelo aka, chiryene, onnakhaviherya oya vahoolo wa michaka saphaama,
13 ophiyerya wi omakiwa waka ni mithipo* nthowa na Kristu, woosuweliwa phaama variyari va Alipeleli oothene a Mwene o Roma ni achu akina.
14 Vano, anna ancipale mwa Apwiya aalipiheya wa nthowa na ophariwa waka,* nave annooniherya olipa murima otokweene wi eloce masu a Muluku ehoovaka echu.
15 Eparipari, akina annalaleerya vooloca sa Kristu mwa nrima ni owanawana, nto akina analaleerya ni mathowa aphaama.
16 Ookuchula ala, analaleerya vooloca sa Kristu wa nthowa na osivela, woona wi aasuwela wi kithanliwe wi kaakihe michaka saphaama;
17 nto oopacerya analaleerya ni owanawana, ohiya ni mathowa aphaama, woona wi anachuna okiruuhela makacamiho vano kiphariwaaka.*
18 Ni yookhumelela taani? Moohipwacha mmukhalelo taani, naari moowoka naari mweeparipari, Kristu onnalaleiwa nave miyo kinnahakalala ni yeeyo. Chiryene kinarwa kititelela ohakalala,
19 woona wi koosuwela wi ela enahaala oruuhela ovuluxiwa waka moorweela wa mavekelo anyu a vathi vamurima nnikhaviheryo na munepa wa Muluku moorweela wa Yesu Kristu.
20 Ela eri mwawiiwanana ni yeeyo kinanlelaaka ni kinaweheryaaka wi nkuuliwa muru mmikhalelo soothene; nyenya nthowa na oloca waka moolipa murima, Kristu onahaala ocicimihiwa hiihaano, ntoko khalai, moorweela wa mwiili aka, naari mwa okhala waka mukumi naari mwa okhwa waka.
21 Wa miyaano, kakhala mukumi, kinakhala mwa Kristu, nto kakhwa, ti yaphaama wa miyaano.
22 Vano, wakhala wi kootitelela okhala mukumi mwa mwiili, eyo yawiima ya muteko aka; nyenya nkinasuweliha tho yeeyo kineeraaka kithanle.
23 Koohaleela, kiri veeri va ichu seiha piili, kinnachuna otaphuliwa ni okhala ni Kristu, yeeyo chiryene eri yaphaama.
24 Nyenya ti woochuneya wi miyo kititelele okhala mukumi omwiilini wa nthowa na nyuwo.
25 Mwawiihiiha, kiroromelaka yeela, koosuwela wi kinamutitelela okhala mukumi ni okhala ni nyuwo oothene wi muye vahoolo ni ohakalala mu nroromelo nanyu.
26 Hiihaa, ochapa wanyu mwa Kristu Yesu waaceereryeye tho wa nthowa naka, kiruule okhala ni nyuwaano wanaawiili.
27 Meecelo anyu ephwanelele* michaka saphaama sa Kristu wi naari kiruule owoonaani, naari kihirivo, kiiweke ni osuwela wi muri ootikitheryeya ni awiiwanana* mmurima mmoha,* ni yoolakelela emoha, mulapaka vamoha wi mvuwihe nroromelo mwa michaka saphaama,
28 muhoopopihiweru ni amwiicani anyu, mmikhalelo soothene. Wa yaawo, ela yawooniherya ya otoloxiwa; nto wa nyuwo, yawooniherya ya ovuluxiwa. Nave ela enarweela wa Muluku.
29 Tiwi, moovahiwa ekari ohiya pahiru ya wooniherya nroromelo nanyu mwa Kristu, nyenya tho ohooxeya wa nthowa na yoowo.
30 Munnawaniha ekhoco yeeyo tho mukoonnaanyu kiwanihaka, nave ntoko musuwenlaanyu wi nlelo kinanwaniha.
Inoota
^ Naari: “nthowa na opaka wanyu makupa mu ovuwiha.”
^ Naari: “omakiwa waka ni mithipo.”
^ Naari: “nthepa.”
^ Naari: “ophariwa waka.”
^ Naari: “omakiwa waka ni mithipo.”
^ Naari: “kimakiwaaka ni mithipo.”
^ Naari: “mukhale ntoko anamurala oophwanelela.”
^ Mu Ekriki, “mmunepa mmoha.”
^ Mu Ekriki, “ni okumi mmoha.”
