Ahepri 3:1-19
3 Mwawiihiiha anna aweela, nyuwo munapaka makupa mu wiichaneliwa* wirimu, mmuthokororye yoole nimusuwenlaahu* ntoko murummwa, ni mulipa a mukucho mutokweene, Yesu.
2 Owo aari oororomeleya wa yoowo aamuthanlile, hiiha ntoko Mose aareiye oororomeleya mu ichu soothene sa empa ya Yoole.
3 Tiwi, owo* onooniwa oophwanela waakhela ncicimiho ntokweene ompwaha Mose, woona wi yoole onateka empa ookhalano ncicimiho ntokweene opwaha empa ene.
4 Mweeparipari, empa eri yoothene enatekiwa ni muchu, nto otenke ichu soothene ti Muluku.
5 Mose aari oororomeleya ntoko mukhaviheryi a empa yoothene ya Yoole. Muteko awe waari weerela onamoona wa ichu seiho saahaala olociwa muhoolo.
6 Nto Kristu aari oororomeleya ntoko mwaana a empa ya Muluku. Hiyo na empa awe, naahihiyaru oloca moohoovelela ni ewehereryo yeeyo nniirumihaahuno ophiyerya wookuchulani.
7 Mwawiihiiha, hiiha ntoko munepa onalocaaya: “Olelo wakhala wi munnawiriyana nsu nawe,
8 muhuumihe mirima sanyu ntoko elukuluku yeele mwaaronxaanyu esara aka, si nihiku nenle mwaakeenhaanyu mutakhwani,
9 weiwo makholo anyu yaakeenhaayawo, ekimwaaryeela naamwi yoonne miteko saka mu iyaakha makhumi masese.
10 Ti nthowa nene kaananariwaakano muyareriwo yoola nave kiloca: ‘Ikwaha soothene awo annarimeela mmurimani mwaya, nave awo hanasuwela iphiro saka.’
11 Mwawiihiiha kaalipela mu esara aka: ‘Awo hevolowa mu wiichuwa waka.’”
12 Mwiikasoopeke anna, wi muhunnuwihe mwa nyuwo murima woonanara ni woohikhalano nroromelo, mmukhoocaka Muluku mukumi;
13 Nto mutitelele olipihana mukina ni mukhwaawe nihiku ti nihiku, nlelo eri elukuluku ya wiichaniwa “Olelo,” wi ahikhale mwa nyuwo oni akhale ooturuwa moorweela wa owokiwa ni owerya wa yoocheka.
14 Ntakhara hiyo nnamwaakhela* yeeyo Kristu aakhenleiye pahiru wakhala wi nohiipharelela ophiyerya wookuchulani ororomela yoowo naaryaahuno woopaceryani.
15 Ntoko enalociwaaya wi: “Olelo wakhala wi munnawiriyana nsu nawe, muhuumihe mirima sanyu ntoko elukuluku yeele mwaaronxaanyu esara aka.”
16 Vano taani yiiwale nave etannya esara ya Muluku? Apwanne hiyaari oothene yaale yaakhumme o Yikuputu ehooleliwaka ti Mose?
17 Opwaha yeeyo, Muluku aananariwe naani mu iyaakha makhumi masese? Apwanne tahi ni yaale yaachenke miruchu saya imora mutakhwani?
18 Nave taani aalonceiyeno, alipelaka wi herwa evolowa mu wiichuwa wawe? Apwanne hiyaari yaale yahaamwiiwelenle?
19 Ninnoona wi hiyaawenrye ovolowa nthowa na oyeleela nroromelo.
Inoota
^ Naari: “owopeliwa.”
^ Naari: “nnamulokohaahu.”
^ Ela tiwi, Yesu.
^ Naari: “nnamukawana ni.”
