Ahepri 4:1-16
4 Vano, woona wi nlelo yoohalawo yoororomeliha ya ovolowa mu wiichuwa wawe, nikhaleno ephoole* wi ahikhale mmoha a nyuwo oni ooniwe okhala oohiphwanelela ovolowa.
2 Woona wi michaka saphaama soolaleeryiwa wa hiyo, hiiha ntoko yaawo; nyenya masu yaawo yiiwalaaya hiyaaphurenle echu, ntakhara hiyaari awiiwanana mu nroromelo ni yaale yaawiriyanne.
3 Tiwi, hiyo nnooniherya nroromelo noovolowa mu wiichuwa, hiiha ntoko yoowo aalonceiye: “Mwawiihiiha kaalipela mu esara aka: ‘Awo hevolowa mu wiichuwa waka,’” naamwi miteko sawe saamanle ovinyerya woopatuxiwa wa elapo.
4 Woona wi nikupa nimoha na soorepa owo aaloca sa nihiku naneethanu napiili: “Mu nihiku naneethanu napiili, Muluku aahiichuwa mwa miteko sawe soothene,”
5 nave owo aaloca tho: “Awo hevolowa mu wiichuwa waka.”
6 Mwawiihiiha, annahala akina eni evolowe mwemmo. Nto yaale yaalaleeryiwe michaka saphaama woopaceryani, havolonwemo nthowa na ohiiwelela.
7 Owo tho aalakelela nihiku moorweela wa oloca khalai vene mu Salmu a Tavite: “Olelo”; hiiha ntoko elociwaaya oculi: “Olelo wakhala wi moowiriyana nsu nawe, muhuumihe mirima sanyu.”
8 Waakhanle wi Yosuwa ohaakeriha awo o nipuro nawiichuuwa, Muluku haahaala oloca sa nihiku nikina.
9 Mwawiihiiha, oohala sapata awiichuuwa ntakhara achu a Muluku.
10 Tiwi, muchu ovolonwe mu wiichuuwa wa Muluku ohiichuwa tho mwa miteko sawe, hiiha ntoko Muluku iichuuwaleiye mwa miteko sawe.
11 Mwawiihiiha, hankooni niilipixerye ovolowa mu wiichuwa yoowo, wi ahikhale ani uuwe mmeerelo mamohamoha a ohiiwelela.
12 Tiwi, masu a Muluku tookumi ni oowerya, taweethaxa opwaha nlema nneetha* wu ni wu, annavolowa ophiyerya okawanya okumi* ni munepa,* mmasikhani ni mpuwa mwa makhuva, nave toowerya waalikhela muupuwelo ni sawaanyiherya sa murima.
13 Nave hiyaavo yoopatuxiwa eri yoovitheya vamiithoni vawe, nyenya ichu soothesene iri sawooneya* ni sookhunuliwa vamiithoni va yoole nneeraahu nimwaakhule.
14 Mwawiihiiha, woona wi nookhalano mulipa a mukucho mutokweene yoowo ovolonwe wirimu, Yesu Mwaana a Muluku, ntitelele olokoha vanlakani vene nroromelo nahu vooloca sa yoowo.
15 Vawi hinaano mulipa a mukucho mutokweene ohinawerya wiiwexexa sooceecheya sahu, nyenya nookhalano yoowo eehiwe mmikhalelo soothene ntoko hiyo, nto ahirino yoocheka.
16 Vano, ni nroromelo* hankooni naacamele munyukhu wa mahala matokweene, wi niwerye waakhela ikharari ni ophwanya mahala matokweene wi enikhaviherye mu elukuluku yoophwanelela.
Inoota
^ Mu Ekriki, “nooveke.”
^ Naari: “nrino orele.”
^ Moone Masu Atharihiwe.
^ Moone Masu Atharihiwe.
^ Mu Ekriki, “seepwitikiri ene.”
^ Naari: “nlocaka moohoovelela.”
