Akalatiya 1:1-24
1 Miyo Paulo, murummwa, ohiya moorweela wa achu naari ni muchu mukina nyenya moorweela wa Yesu Kristu ni wa Muluku Atiithi, yaawo amviihale mwa alipa ookhwa,
2 vamoha ni anna oothene ari ni miyo, wa miloko so Kalatiya:
3 Mahala matokweene ni murecele wa Muluku, Atiithi ahu vamoha ni a Apwiya Yesu Kristu ekhale ni nyuwaano.
4 Owo aahiiveleela ntakhara soocheka sahu wi anivuluxe mu elapo yeela yootakhala,* mwawiiwanana ni yookhwela ya Muluku ahu ni Atiithi;
5 wa yoowo avahiwe ncicimiho okhala wookhala. Aamen.
6 Kiri oohaleeliheya, wi mwawaakuveya munnamuhiya* yoowo aawiichanneeni mwa mahala matokweene a Kristu, vano munachara michaka seiho ihiri michaka saphaama.
7 Tahi wi sookhalavo michaka saphaama sikina; nto aakhalavo akina yaawo anawaakanyeryaani, nave anachuna okhoromaniha michaka saphaama vooloca sa Kristu.
8 Nto naamwi mmoha a hiyo naari munkeelo a wirimu oolaleenryeeni michaka saphaama ihiri michaka saphaama seiho noolaleenryaahuni, yoowo uulumeliwe.
9 Ntoko nimanlaahu oloca, kinnaloca wanawiili: Yoowo oni oolaleeryeeni ntoko michaka saphaama ihiri seiho mweemerenryaanyu, yoowo uulumeliwe.
10 Apwanne chiryene kineererya waalekecha achu naari Muluku? Naari apwanne kineererya waahakalaliha achu? Waakhanle wi nlelo kinaahakalaliha achu, nki kikhale kapuro a Kristu.
11 Anna, kinachuna wi musuwele wi michaka saphaama kinoolaleeryaakani, hinnarweela wa achu;
12 woona wi nkaakhenle wa muchu, naari haavo okihusinhe, nyenya suupululeliwe wa miyo moorweela wa Yesu Kristu.
13 Mweeparipari nyuwo mohiiwa elociwaka sa mukhalelo aka wakhalai wa Eyuuta, wi kaaniikara moowali* muloko wa Muluku nave kaanamwarya yoowo;
14 nave wi kaanaya vahoolo mu Eyuuta waapwaha ancipale a nloko naka yaawo yaarino iyaakha imohamoha ni miyo, woona wi kaari amvaixa mu ochariha mihapo sa asitiithi aka.
15 Nto, vaavaa Muluku yoowo okithanlile kiri mmirimani mwa amaayi, nave okiichanne moorweela wa mahala awe matokweene, oonneiye okhala yaphaama
16 omuupulula Mwanawe wa miyo, wi kilaleerye wa maloko michaka saphaama vooloca sa yoowo, nkaakuvenle omukoha muchu mukina;*
17 naari nkaakelewo o Yerusalemu wa yaale yaari arummwa miyo kihaakumve, nto kaakele o Arapiya nave voocharela kikookela o Tamasku.
18 Ivinre iyaakha raru, kaawela kiyaaka o Yerusalemu wi kamuxekurye Kefa* nave kaakhala ni yoowo mahiku khumi nathanu.
19 Nto, nkaamoonneru mmoha a arummwa akina, voohikhala Tiyaku munna a Apwiya.
20 Vano vooloca sa ichu kinoorepelaakaani, kinnoororomelihaani vamiithoni va Muluku, wi nkinamootha.
21 Ohoolo waya, kaaya makupa o Siriya ni Silisiya.
22 Nto nkaasuweliwe ni miloko so Yuteya seiho saari mwawiiwanana ni Kristu.
23 Awo pahiru yaamwiiwa elociwaka: “Mulopwana yoole khalai aaniikara, vano onalaleerya michaka saphaama vooloca sa nroromelo nenlo khalai aamwaryeiye.”
24 Mwawiihiiha, awo yaapacerya omucicimiha Muluku wa nthowa na miyo.
Inoota
^ Naari: “mukhalelo yoola wa ichu wootakhala; elukuluku yeela yoonanara.” Moone masu atharihiwe.
^ Naari: “munnaviihiwamo mwa.”
^ Mu Ekriki, “kaanatepano wiikara.”
^ Mu Ekriki, “nkaakuvenle omukoha muchu a mwiili nnikhaami.”
^ Awiichaniwa tho Petru.
