Akolose 2:1-23
2 Vawi kinnachuna wi musuwele owana waka otokweene kiryaakano va nthowa na nyuwo nave wa nthowa na yaale o Lawotikeya ni wa nthowa na oothene yaawo ahikisuwenle miyo.*
2 Yoolakelela aka eri wi murima aya okhale woohakararyeya, wi ekhale vamoha mwawiiwanana mu osivela, ekhaleno muhakhu woothene onakhumelela mu waakhwanela weeparipari wa wiiwexexa waya, wi ekhaleno masuwelelo awaakhwanela a yoovitheya yaweela ya Muluku, ela tiwi, Kristu.
3 Mwa yoowo, onnaphwanyeya ovithiwe phaameene muhakhu woothene wa miruku ni wa masuwelelo.
4 Kinaloca yeela wi ahikhale oni oohuweliheeni nyuwo ni masu oolekecha.
5 Naamwi kirakamenle mwa mwiili, kiri ni nyuwo mwa munepa, kihakalalaka woona oreheryeya wanyu waphaama ni othipeleya wa nroromelo nanyu mwa Kristu.
6 Mwawiihiiha, hiiha ntoko mmweemerenryaanyu Kristu Yesu Apwiya, mweeceke mwawiiwanana ni yaawo,
7 oothipeleya ni oolipiheya mwa yaawo nave ootikitheryeya mu nroromelo, hiiha ntoko muhusihiwaanyu, musareyaka ni mathamalelo.
8 Mukhaleno ephoole wi ahikhale oni oopakeeni akapuro* moorweela wa filosofiya* ni owoka watheru, seiho sinathipeleya mu sookhovelela sa achu, mwawiiwanana ni ichu soopacerya sa veelaponi nave ohiya mwa Kristu;
9 ntakhara ti mwa yoowo waakhwanela woothene wa mikhalelo soomuluku sinakhalaaya mwa mwiili.
10 Mwawiihiiha, nyuwo moophwanya waakhwanela woothene moorweela wa yoowo, yoowo ori muru wa olamulelo woothene ni owerya.
11 Moorweela wa waataana wanyu ni yoowo, nyuwaano tho moothikiliwa ni othikiliwa yoowo ohineeriwano ni matata moorweela wa orula makhalelo oocheka a mwiili, ela tiwi, moorweela wa othikiliwa yoowo ori wa Kristu.
12 Vawi nyuwo moovithiwa vamoha ni yoowo mu opatiso awe, nave moorweela wa waataana wanyu ni yoowo nyuwo mooviihiwa tho vamoha moorweela wa nroromelo nanyu mu miteko sakuru sa Muluku, yoowo omviihale mwa alipa ookhwa.
13 Opwaha yeeyo, naamwi nyuwo mwaakhwile wa nthowa na soohesa sanyu ni mukhalelo anyu woohithikiliwa wa mwiili anyu, Muluku ohoovahaani okumi vamoha ni yoowo. Owo onlevelela mooreera murima soohesa sahu soothene
14 nave oosipiha* etukumentu yaarempwe ni mata, yeeyo yaarimomo malamulo nave yaari yoovuhana ni hiyo. Owo ooviihavo moorweela wa okhomela va mwiri woohooxiwavo.*
15 Owo ohaarula soowara mamwene ni asitokweene nave ohaatheteya vanlakani vene wi aavoothiwa, aakusaka ntoko alipa oophariwa moorweela wa mwiri woohoosiwavo.*
16 Mwawiihiiha, muheemererye wi muchu oothoriheeni vooloca sa yeeyo munalyaanyu ni owurya naari vooloca sa wuupuwelela nihiku na efesta naari na mweeri muvyaani naari na sapata.
17 Ichu seiho iri muuruusi wa ichu sinoorwa, nyenya eparipari ene ti ya Kristu.
18 Ahikhalevo muchu yoowo oniiseera okhala awiiyeviha naari awaalapa ankeelo oni oohiiheeni nchuwelo; achu yaawo annatitelela* mu ichu seiho yoonnaaya. Mweeparipari, muupuwelo aya woomuchu onnaweeriha okhala awiirumiha nihirivo nthowa nawookololowa,
19 nave awo haniilucelela ni muru, yoowo onalyiha mwiili woothene nave oniiwananiha vamoha moorweela wa maxikha aya ni soolucelelana, nave onannuwiha ni mannuwelo anarwa wa Muluku.
20 Waakhanle wi nyuwo mookhwa vamoha ni Kristu vooloca sa ichu soopacerya sa veelaponi, ntakhara heeni nlelo munatitelelaanyu okhala ntoko wi munnapaka makupa a elapo, moorweela wa wiiwelela malamulo:
21 “Muhiphare, muhilawihe, naari muhitannye,”
22 ilociwaka ichu soothene seiho inarimeela nave inamala, mwawiiwanana ni malamulo ni mahusiheryo a achu?
23 Naamwi ichu seiha sooneyaka okhala sa miruku, iniisooneiha mmukhalelo wa olapeliwa ni wiiseera okhala sawiiyeviha, ni ohoosa mwiili, iho hisaano mphurelo mu owaniha ni soochuna sa mwiili.
Inoota
^ Mu Ekriki, “ahintokoru woona ethoi aka mwa mwiili.”
^ Naari: “ookuseeni ntoko muhakhu wookhoconi.”
^ Naari: “miruku sa alipa oohuserya.”
^ Naari: “oomaliha.”
^ Moone Masu Atharihiwe.
^ Naari akhweya: “yoowo.”
^ Naari: “annahela meco; annavolowa.” Masu anaphariheliwa mu sookhovelela sa amalapo sa malavi (wiineliwa).
