Aroma 3:1-31
3 Mphurelo taani orivovo wa okhala Muyuta, naari wa othikiliwa?
2 Sookhalavo miphurelo mincipale. Woopaceryani, Ayuta ahinnyereryiwa masu aweela a Muluku.
3 Vano tiheeni eneereya? Waakhanle wi akina yaayeleela nroromelo, apwanne oyeleela waya nroromelo onahaala omaliha ororomeleya wa Muluku?
4 Chiryene hooye! Nyenya Muluku akhale eeparipari, naamwi achu oothene ekhalaka awootha, hiihaa ntoko erempwaaya: “Wi weeriwe eekhaikhai mmasu aa nave ovoothe vaavaa oneeraawe othorihiwe.”
5 Mwawiihiiha tiheeni nnahaalaahu oloca, waakhala wi ohookololowa wahu onnavuwiha wookololowa wa Muluku? Apwanne Muluku toohookololowa vaavaa onooniheryeiye esara awe? (Kinaloca ntoko muchu onaloceleiye.)
6 Mweeparipari hooye! Yaari hiihaa, Muluku aahaala othoriha hai elapo?
7 Nto, waakhanle wi moorweela wa wootha waka, eparipari ya Muluku ennavuwihiwa vancipale nave eruuhaka ncicimiho wa yoowo, vano ntakhara heeni kinathorihiwaaka ntoko mulipa oocheka?
8 Nave ntakhara heeni ohiloca, hiihaa ntoko akina analocaaya mwa wootha eriki: “Neerekeno ichu soonanara, wi nikhaleno ichu saphaama”? Othorihiwa wa achu yaala ori mwawiiwanana ni ekhaikhai.
9 Makuchuwelo taani nnaphiyeryaahu? Apwanne nri mmukhalelo waphaama? Mweeparipari hooye! Tiwi nohooniherya wi Ayuta hiihaa ntoko Akriki, oothene aakhalano nthowa na yoocheka.
10 Hiihaa ntoko erempwalaaya: “Haavo muchu ori awookololowa, naari mmoharu mano;
11 haavo mmoharu mano orino miruku; haavo mmoharu mano onamwaavya Muluku.
12 Achu oothene aahuwela, oothene awo haano mphurelo; haavo onooniherya oreera murima, naari mmoharu mano.”
13 “Mmilo aya nihiye noohuleya; awo annawoka ni nlumi naya.” “Yeeyo enakhuma vayanoni vaya eri ntoko esenya ya inowa.”
14 “Nave mwaano mwaya woosareyamo sootakhala ni soowaawa.”
15 “Inaani saya sinnachimakela oyeeha nikhami.”*
16 “Mu soothene aneeraaya, awo annatannya ipahu ni makacamiho.
17 Awo hasuwenle ephiro ya murecele.”
18 “Vamiithoni vaya, hiwaavo omoova Muluku.”
19 Tiwi noosuwela wi ichu soothesene inalociwa Mmalamulo, inaya wa yaale anachariha Malamulo. Yoolakelela aya ori waamaaliha achu wi ehootheryeke echu ni wooniherya wi elapo yoothene yookhalano nthowa vamiithoni va Muluku nave wi enaphwanela olakiwa.
20 Mwawiihiiha, haavo* oni eeriwe okhala eekhaikhai vamiithoni vawe moorweela wa miteko sa nlamulo, woona wi yeeyo enarwa mwa nlamulo, masuwelelo awaakhwanela a yoocheka.
21 Nyenya vano, ohiya moorweela wa Nlamulo, yohoonihiwa ekhaikhai ya Muluku yeeyo Malamulo ni Alipa a Miririmu aneerelaaya onamoona,
22 aa, wookololowa wa Muluku moorweela wa nroromelo mwa Yesu Kristu, wa oothene yaale arino nroromelo. Woona wi hiwaavo ohiyana.
23 Vawi oothene aacheka nave hanaphwanya ncicimiho na Muluku,
24 nave eri ntoko yoovaha awo aneeriwaaya okhala eekhaikhai moorweela wa mahala awe matokweene, mwa ovuluxa moorweela wa woopola oliveliwe ni Kristu Yesu.
25 Muluku aamperekha Kristu ntoko mukucho wa waataaniha* moorweela wa nroromelo mu nikhami nawe. Muluku aaheerano yeela wi ooniherye wookololowa wawe, vawi mu ovilela* wawe owo aanalevelela soocheka seeriweno khalai.
26 Oheerano yeeyo wi ooniherye wookololowa wawe hiihaano, wi akhale tho awookololowa amweeraka awookololowa muchu yoowo orino nroromelo mwa Yesu.
27 Mathowa taani arivovo a wiirumiha? Aaviihiwavo. Moorweela wa nlamulo taani? Mwa miteko? Hooye! Moorweela wa nlamulo na nroromelo.
28 Tiwi noosuwela wi muchu oneeriwa eekhaikhai moorweela wa nroromelo, ihirivo miteko inavekeya mu nlamulo.
29 Naari apwanne owo Muluku a Ayuta pahiru? Tahi Muluku tho aachu a maloko? Aa, owo tho ta achu a maloko.
30 Woona wi Muluku ori mmoharu, owo onahaala oweera okhala eekhaikhai othikiliwa moorweela wa nroromelo, nave oohithikiliwa moorweela wa nroromelo naya.
31 Vano ela enooniherya wi noohiya nlamulo moorweela wa nroromelo nahu? Chiryene hooye! Moohiyana ninnacicimiherya nlamulo.
Inoota
^ Naari: “wiipha.”
^ Mu Ekriki, “haavo muchu.”
^ Naari: “oleveleliwa soocheka.”
^ Naari: “otumerya.”
