Aroma 4:1-25
4 Mwawiihiiha, nni nloce eheeni vooloca sa nikholo nahu Aparahamu?
2 Ntoko yootakiherya, waakhanle wi Aparahamu oheeriwa awookololowa moorweela wa miteko, owo aahaala okhalano mathowa awiirumiha, ohiya vamiithoni va Muluku.
3 Vano tiheeni soorepa inalocaaya? “Aparahamu aamuroromela Yehova, nave owo aaheeriwa okhala awookololowa.”
4 Vano muchu yoowo onalapa, yoolivela awe heri ntoko mahala matokweene nyenya ntoko echu enamphwanela.*
5 Moohiyana, muchu ohinalapa, nto akhalano nroromelo mwa Yoole onamweera eekhaikhai oonanara murima, owo onamweeriwa awookololowa wanthowa na nroromelo nawe.
6 Moolikana, Tavite aaloca tho sa ohakalala wa muchu yoowo Muluku onamweereiye awookololowa moohipwacha miteko sawe:
7 “Oohakalala taale aleveleliwe soonanara saya, nave ixipihiwa* soocheka saya;
8 oohakalala muchu yoowo Yehova oneereiye ahimweere oocheka.”
9 Apwanne ohakalala yoola ti wa achu oothikiliwa pahiru naari tho ti wa achu oohithikiliwa? Woona wi ninnaloca nriki: “Nroromelo na Aparahamu naaheeriwa okhala nawookololowa.”
10 Mmikhalelo taani nroromelo na Aparahamu naaheeriwa okhala nawookololowa? Vaavaa aathikiliweiye naari ahaathikiliweiye? Owo nlelo haathikiliwe nto aari oohithikiliwa.
11 Owo aahaakhela eneneeryo, ela tiwi, othikiliwa, ntoko yoororomeliha yawookololowa enarweela wa nroromelo aareiyeno ahaakumve othikiliwa, wi akhale tiithi a oothene yaale arino nroromelo naari ehithikiliwe, wi yaawo tho yeeriwe awookololowa;
12 nave wi akhale tiithi a muyareriwo woothikiliwa, ohiya pahiru wa yaale anathikiliwa, nyenya tho wa oothene yaale anachariha makhalelo a nroromelo na nikholo nahu Aparahamu, nenlo aareiyeno ahaakumve othikiliwa.
13 Woona wi hiwaari moorweela wa nlamulo, Aparahamu naari muyareriwo* awe yaaryaayano yoororomeliha wi owo aahaala waakhela* elapo, nto waari nthowa na wookololowa waarweela mu nroromelo.
14 Waakhanle wi yaale anaroromela nlamulo ari mikelampa, nroromelo nnakhala natheru nave yoororomeliha yooxipihiwa.
15 Mweeparipari Nlamulo ninnatannya esara ya Muluku, nto vaavaa ohirivo nlamulo hiwaavo tho yoocheka.
16 Mwa yeeyo, yoororomeliha enarwa moorweela wa nroromelo, wi ekhale mwawiiwanana ni mahala matokweene. Muyareriwo* woothene wa Aparahamu waakhele yoororomeliha, ohiya pahiru wa yaale aniiwelela Nlamulo nyenya tho wa yaale arino nroromelo nooniheryiwe ni Aparahamu, yoowo ori tiithi a oothene ahu.
17 (Ntoko erempwaaya: “Kooweera tiithi a maloko mancipale.”) Ela yeeren’ye vamiithoni va Muluku, yoowo aamuroromeleiye, yoowo onaavaha ekumi alipa ookhwa nave onaloca ichu sihikhanle ntoko wi sookhala.*
18 Aparahamu aayeleela ewehereryo ya okhalano anamwane. Moorweela wa ewehereryo, owo aaroromela wi aahaala okhala tiithi a maloko mancipale mwawiiwanana ni yeeyo Muluku aalonceiye ariki: “Muyareriwo* aa onamukhala hiiha.”
19 Naamwi nroromelo nawe nahaaceechen’ye, aanuupuwela sa mwiili awe, ntoko wi waari wookhwa ene (woona wi aarino echu ya iyaakha nsana), nave tho aasuwela wi Sara aahuuluvala nave haahaala okhalano mwaana.
20 Nto wanthowa na yoororomeliha ya Muluku, owo haakhwile minikwa naari oyeleela nroromelo. Moohiyana nroromelo nawe naamweeriha okhala oowerya, nave aamvaha Muluku ncicimiho.
21 Owo aalekecheya wi yeele Muluku aaroromelinheiye, Owo tho aanwerya weerano.
22 Mwawiihiiha, moorweela wa nroromelo nawe “owo aaheeriwa okhala awookololowa.”
23 Nyenya, masu “owo aaheeriwa,” hiyaarepeliwe pahiru wanthowa nawe,
24 awo tho nrepeliwe yeehu. Hiyo tho nnahaala weeriwa awookololowa woona wi ninnamweemererya Yoowo omviihale Yesu Apwiya ahu mwa alipa ookhwa.
25 Owo aaveleeliwa wanthowa na soohesa sahu nave aaviihiwa wi neeriwe okhala awookololowa.
Inoota
^ Naari: “nlivelo na muteko ophanreiye.”
^ Naari: “ikhuneeliwa.”
^ Mu Ekriki, “mmiso.”
^ Naari: “aahaala okhala mukelampa wa elapo.”
^ Mu Ekriki, “mmiso.”
^ Naari akhweya: “oniichaneiye ichu ihikhanle wi ikhale.”
^ Mu Ekriki, “mmiso.”
