Aroma 8:1-39
-
Okumi ni otaphuwa moorweela wa munepa (1-11)
-
Munepa wa weeriwa anamwane a Muluku onneerela onamoona (12-17)
-
Soopatuxiwa sinnanleela woona otaphuliwa wa anamwane a Muluku (18-25)
-
‘Munepa onnanivekelela’ (26, 27)
-
Muluku aalakelela woosiilo ene wi yaahaala okhalavo awiichaniwa (28-30)
-
Ovootha moorweela wa osivela wa Muluku (31-39)
8 Mwawiihiiha, hiwaavo olakiwa wa yaale ari mwawiiwanana ni Kristu Yesu.
2 Woona wi nlamulo na munepa, nenlo nnavaha okumi mwawiiwanana ni Kristu Yesu nohootaphula wa nlamulo na yoocheka ni okhwa.
3 Yeeyo Nlamulo nahaawenryaaya weerano, woona wi naari nooceecheya wa nthowa na mwiili, Muluku aaheerano moorweela wa omurumiha Mwanawe oolikana ni mwiili woocheka wi aviihevo yoocheka, athorihaka yoocheka mmwiilini,
4 wi soovekeya sawookololowa sa Nlamulo saakhwanele mwa hiyo, yeehu nihineeca mwawiiwanana ni mwiili, nto mwawiiwanana ni munepa.
5 Yaale anakhala mwawiiwanana ni mwiili anatikitherya muupuwelo aya mu ichu sa mwiili; nto yaale anakhala mwawiiwanana ni munepa, anuupuwela ichu sa munepa.
6 Tiwi otikitherya muupuwelo mu ichu sa mwiili onataphulela okhwa, nto otikitherya muupuwelo mu ichu sa munepa onataphulela okumi ni murecele.
7 Ntakhara otikitherya muupuwelo mu ichu sa mwiili onataphulela wiicana ni Muluku, woona wi mwiili hori mwawiiwanana ni nlamulo na Muluku, chiryene honawerya okhala.
8 Mwawiihiiha yaale anakhala mwawiiwanana ni mwiili hanawerya omuhakalaliha Muluku.
9 Nto nyuwo, hamunakhala mwawiiwanana ni mwiili, nyenya mwa munepa, wakhala wi munepa wa Muluku chiri onakhala mwa nyuwo. Nto wakhala wi muchu haano munepa wa Kristu, muchu owo tahi awawe.
10 Wakhala wi Kristu ori mwawiiwanana ni nyuwo, mwiili ori wookhwa ene wa nthowa na yoocheka, nyenya munepa ti okumi wa nthowa na wookololowa.
11 Vano wakhala wi munepa wa yoole omviihale Yesu mwa alipa ookhwa onakhala mwa nyuwo, yoole omviihale Kristu Yesu mwa alipa ookhwa onamvaha tho okumi mwiili anyu onakhwa, moorweela wa munepa awe, yoowo onakhala mwa nyuwo.
12 Mwawiihiiha, anna, hannakhinyereryiwa okhala mwa mwiili, ela tiwi, okhala mwawiiwanana ni mwiili;
13 woona wi, wakhala wi munakhala mwawiiwanana ni mwiili, chiryene munamukhwa; nto wakhala wi mooveleela wookhwani saweera sa mwiili moorweela wa munepa, munamukhala akumi.
14 Ntakhara oothene yaale anahooleliwa ni munepa wa Muluku, chiri anamwane a Muluku.
15 Woona wi nyuwo himwaakhenle munepa wookapuro, yoowo tho onooruuhelaani woova, nto mwaakhenle munepa wa weeriwa anamwane a Muluku, nave ori moorweela wa munepa yoowo nnakhuwelaahu: “Aapa,* Tiithi!”
16 Munepa wa Muluku onneerela onamoona ni munepa ahu, wi hiyo na anamwane a Muluku.
17 Vano wakhala wi na anamwane, na mikelampa tho sa Muluku ni mikelampa akhwaawe a Kristu, nahooxeyaru ni yoowo wi ncicimihiwe tho vamoha ni yoowo.
18 Mwawiihiiha, kinoona wi ohooxeya wa elukuluku yeela, tahi echweenevo naalikanyihaka ni ncicimiho nenlo nni nuupululiwe wa hiyo.
19 Tiwi soopatuxiwa sinnanlela* woona wuupululiwa wa anamwane a Muluku.
20 Ntakhara soopatuxiwa soothene soolapihiwa voohiphura echu, tahi mookhwela waya, nto moorweela wa okhwela wa mwaneene olamulenle, iweheryaka
21 wi soopatuxiwa seiyo inarwa itaphuliwa mu okapuro wa wuuca ni okhalano otaphuwa woocicimiheya wa anamwane a Muluku.
22 Noosuwela wi soopatuxiwa soothene sinnatitelela wuupulela vamoha, ni woona wiicela ophiyerya hiihaano.
23 Ohiya pahiru seiho, nyenya tho yeehu ene nrino mulepulo,* ela tiwi munepa, aa, yeehu ninnuupulela mmurimani mwahu, niweheryaka weeriwa anamwane a Muluku. Mu elukuluku yeeyo, nnarwa ntaphuliwa wa mwiili ahu moorweela wa woopola.
24 Woona wi hiyaano noovuluxiwa mu ewehereryo yeela; nto ewehereryo enooneya tahi ewehereryo, mano onaweryeya hai muchu owehererya yeeyo onooneiye?
25 Nto wakhala wi nnaweherya yeeyo nihinoonaahu, ninnatitelela owehererya ninlelaka ni ovilela.
26 Moolikana, munepa tho onnanikhaviherya mu oceecheya wahu; nikacamiho ti nawi ikwaha ikina hannasuwela echu nnaphwanelaahu oveka mu nivekelo. Munepa onanwerya onivekelela vaavaa nnuupulelaahu, nto nihirino masu ooloca.
27 Nyenya, yoole onaalikhela mirima, oosuwela soochuna sa munepa, woona wi yoola onnaavekelela aweela murima mwawiiwanana ni yookhwela ya Muluku.
28 Noosuwela wi Muluku onneeriha wi miteko sawe soothene siiwananeke vamoha, wi siweeceleke phaama yaale anamusivela Muluku, yaawo aniichaniwa mwawiiwanana ni yookhwela awe.
29 Ntakhara yaale Muluku aasuwenleiye woopaceryani, wa yaala tho, owo aalakelela khalai wi elikaneke ni oophwanaphwana ni Mwanawe, wi yoola akhale oopacerya oyariwa mwa asinna ancipale.
30 Opwaha yeeyo, wa yaale aathanlileiye khalai, owo aawiichana tho; nave yaala aawiichanneiye, aahiweera tho okhala eekhaikhai. Wookuchulani, yaala aawenreiye okhala eekhaikhai, aahaacicimiha tho.
31 Vano nni nloce eheeni vooloca sa ichu seiha? Muluku akhala wa hiyo, taani ani aniwerye?
32 Woona wi owo haniimanne Mwanawe ene, nto omveleela ntakhara hiyo oothene, apwanne vamoha ni yoowo, hanivaha tho mwa mahala ichu soothene ikina?
33 Mano taani oni aasomele oothanliwa a Muluku? Ti Muluku onaweera okhala eekhaikhai.
34 Taani oni aathorihe? Kristu Yesu ti yoole okhwile, opwaha yeela, ti yoole oviihiwe mookhwani, yoowo ori omoono woolopwana wa Muluku nave tho onanivekelela hiyo.
35 Taani oni animwalanye mu osivela wa Kristu? Apwanne yoohooxa, naari wuukhuwa, naari wiikariwa, naari etala, naari othaaleliwa,* naari yawoopiha, naari nsipaaca?
36 Hiihaa ntoko erempwaaya: “Wa nthowa nanyu, nihiku noothene ninnaveleeliwa wookhwani; nnooniwa ntoko ipucepuche inaya wiiphiwa.”
37 Moohiyana, mu ichu soothene seiha, ninnavootha moorweela wa yoole onisivenle.
38 Mweeparipari, kinnaroromela wi naari okhwa, naari okumi, naari ankeelo, naari mamwene, naari ichu samutano, naari ichu sinoorwa, naari owerya,
39 naari orekama, naari wiixa, naari yoopatuxiwa ekina heweryaru onimwalanya hiyo ni osivela wa Muluku, yoowo ori mwa Kristu Yesu Apwiya ahu.
Inoota
^ Nla nsu na Ehepiri naari Aramaiku nnataphulela “Khwoo Tiithi!”
^ Naari: “sinnachunaxa.”
^ Naari: “sawiima soopacerya.”
^ Mu Ekriki, “epwitikiri.”
