Ester 5:1-14
5 Nihiku naneeraru, Ester aawara soowara sawe soomwene, aya va esaala ya mpuwa ya empa ya mwene nave aaheemela vaavale anaweha ohoolo wa empa ya mwene. Mwene aari mu empa yoomwene, akiranthe va munyukhu awe woomwene, awehaka omulako.
2 Vaavaa mwene aamoonneiye mwaariye,* Ester, eemenle vasaala, Ester aaphwanya mahala vamiithoni vawe, nave mwene aamuthoonya Ester ni ekopo awe yoomwene ya ooru yeeyo yaari mmatani mwawe. Voocharela, Ester aamwaacamela nave atannya oponta wa ekopo ya omwene.
3 Mwene aamukoha: “Tiheeni yeeren’ye, mwaara a mwene, Ester? Onachunani? Naamwi ovenke ovahiwa eriyari ya omwene aka, kinamoovaha!”
4 Ester aahaakhula: “Mwasiveliwa mwene, kinaveka wi nyuwo mwene ni Hamani murwe olelo o efesta yeeyo kireherenryaaka ntakhara nyuwo.”
5 Mwawiihiiha, mwene aahi wa alopwana awe: “Mmuleele Hamani wi arwe mwawaakuveya, hiiha ntoko Ester ovenkeiye.” Voocharela, mwene ni Hamani yaaya o efesta yaarehereriwe ni Ester.
6 Vaavaa yaawuryaaya eviinyu, mwene aamukoha Ester: “Tiheeni onachunaawe oveka? Onarwa ovahiwa! Yoovekaa tiivi? Naamwi ovenke ovahiwa eriyari ya omwene aka, kinamoovaha!”
7 Ester aahaakhula: “Yooveka aka ni yeeyo kinachunaaka tiila:
8 Waakhanle wi koophwanya mahala vamiithoni vanyu mwene, nave waakhanle wi munamusiveliwa mwene waakhula yooveka aka ni weemererya yoochuna aka, kinaveka wi nyuwo mwene ni Hamani murwe omeelo va efesta kineeraaka kirehererye, nave omeelo kinamwaakhula nikoho nanyu mwene.”
9 Nihiku nenle, Hamani aakhuma achapaka ni ahakalanle mmurimani mwawe. Nyenya vaavaa Hamani aamonneiye Mortekayi vamulako mutokweene vaate va mwene nave oona wi owo haavinnye naari mano othukumela vamiithoni vawe, Hamani aatepa onyeenyeya ni Mortekayi.
10 Nto naamwiihiiha, Hamani aamwarya esara awe nave arowa owannyawe. Voocharela, owo aawiichaniha asinthamwene awe ni mwaariye, Seresi.
11 Hamani aapacerya wiirumiha nthowa na waaca wa muhakhu awe, waaca wa anamwane awe ni mukhalelo mwene amvaheiye otokweene ni omunnuwiha, amukuhaka vasulu va asitokweene ni anamuteko a mwene.
12 Hamani aahaaceererya: “Ohiya yeeyoru, mwaara a mwene,* Ester, aakiwompe yoomiru wi kaahoole amwene o efesta yeeyo aareherenryeiye. Nave ookiwopa tho omeelo wi kikhale vamoha ni amwene.
13 Nto hiyaavo enakihakalaliha kaamoonaka Mortekayi, Muyuta, akiranthe vamulako mutokweene vaate va mwene.”
14 Mwawiihiiha, Seresi mwaara a Hamani, ni asinthamwene awe oothene yaaloca eriki: “Mulamulele wi orehereryiwe mwiri, orakama waya miwono* makhumi mathanu.* Nave omeelo wooxiixelo mumveke mwene wi Mortekayi athomeiwevo. Hiihaa, munamuya ofestani ni mwene muhakalanle.” Moonelo yoola waamuhakalaliha Hamani, nave owo aalamulela orehereryiwa mwiri.
Inoota
^ Naari: “mwene amwaamuthiyana.”
^ Naari: “mwene amwaamuthiyana.”
^ Mu Ehepiri, “ikoovatu.” Echu ya ameetru 22.3. Mmoone Apentisi 2.14.
^ 50.
