Estra 1:1-11
1 Mu eyaakha yoopacerya ya Mwene Siru o Persiya, wi yaakhwanele masu a Yehova aalonceiye moorweela wa Yeremiya, Yehova aamweeriha* mwene Siru o Persiya olokoha muchaka mu omwene awe, yoowo tho aarempeiye, ariki:
2 “Mwene Siru o Persiya oni: ‘Yehova, Muluku awirimu, ookivaha omwene woothene wa veelaponi yavathi, nave ookithanla wi kiteke empa awe o Yerusalemu, yeeyo eri o Yuta.
3 Oothene yoole onapaka makupa a nloko nawe ori variyari vanyu, Muluku awe akhale ni yoowo, nave awele o Yerusalemu, o Yuta, wi uuluule oteka empa ya Yehova Muluku a Isarayeli, Muluku eeparipari, yeeyo yaari o Yerusalemu.*
4 Oothene yoole onakhala ntoko namarwa, moohipwacha nipuro onakhaleiyewo, akhaviheryiweke ni amwaacamani awe moorweela wa ovahiwa eparata, ooru, sookhalano, ni muhuwo, vamoha ni soovaha soolakelela ntakhara empa ya Muluku eeparipari, yeeyo yaari o Yerusalemu.’”
5 Voocharela ahooleli a ichoko sa Yuta ni Penxami, alipa a mukucho, Alevi; vamoha ni yaale yaatannyen’ye murima ni Muluku eeparipari, yaahiirehererya wi yateke empa ya Yehova, yeeyo yaari o Yerusalemu.
6 Achu oothene yaacamannaayano yaahaakhaviherya yaavahaka ikaruma sa eparata, ooru, sookhalano, mihuwo ni ichu sasisapo, ohiya soovaha ihe saweemulakelela.
7 Mwene Siru aalamulela tho wi iruuhiwe ikaruma sa empa ya Yehova seiho mwene Napukotonosori aakunxeiye o Yerusalemu nave ahela mu empa ya muluku awe.
8 Mwene Siru o Persiya aamuthanla Mitretati mulipa ookhapelela muhakhu, wi aalakhanyerye ichu soothene nave aamunnyererya Sespasar muhooleli o Yuta.
9 Vano ichu saalakhanyeryiwe saari iha: Ipasiya makhumi mararu sa ooru, ipasiya ncikhwi sa eparata, ni ikaruma ikina makhumi meeli nathanu naxexe,
10 itixela ikhaani sa ooru makhumi mararu, itixela ikhaani sa eparata masana masese ni itixela khumi, ni ikaruma ikina sawaakhwana ncikhwi.*
11 Ikaruma soothene sa ooru ni sa eparata saari macikhwi mathanu ni masana maxexe.* Sespasar aakuxa ichu soothene vaavaa achu yaakhumaaya wookapuroni o Papulu eyaaka o Yerusalemu.
Inoota
^ Mu Ehepiri, “aatannya munepa wa.”
^ Naari akhweya: “yoowo ori o Yerusalemu.”
^ 1.000.
^ 5.400.
