Estra 10:1-44
10 Elukuluku Estra aavekeleiye ni olokoha soocheka, anlaka akokhonre ohoolo wa empa ya Muluku eeparipari, muloko mutokweene wa Aisarayeli, alopwana, athiyana ni anamwane yaathukumana voorukurerya vawe, nave achu yaaninla vancipale.
2 Voocharela, Sekaniya mwaana a Yehiyeli, a anamwane a Elami, aahi wa Estra: “Hiyaano noheera ichu moohiroromeleya wa Muluku ahu, naathelaka* athiyana a ilapo sookhopela a maloko oorukurerya. Naamwi hiiha, nlelo yookhalavo ewehereryo wa Isarayeli.
3 Vano, nipake waataana ni Muluku ahu wi naarowihe athiyana oothene ni anamwane aya, mwawiiwanana ni ohoolela wa Yehova ni wa yaale anoova* malamulo a Muluku ahu. Hankooni neereno mwawiiwanana ni Nlamulo.
4 Vinya, woona wi mwaha yoola murici aa, nave hiyaano nnahaala wookhaviherya. Olipe nave weerevo echu.”
5 Mwawiihiiha Estra aavinya nave aaheeriha wi ahooleli a alipa a mukucho, Alevi ni Aisarayeli oothene elipele wi yeereno yeeyo yaalociwe. Mwa yeeyo, awo yaalipela.
6 Estra aavinya ohoolo wa empa ya Muluku eeparipari nave aya o esaala ya* Yehowana, mwaana a Eliyasipi. Naamwi aakele weiwo, owo haalyile yoolya naari owurya maahi, ooniheryaka othanana wa nthowa na ohiroromeleya wa yaale yaakoonke wookapuroni.
7 Vanonto yaalokoha muchaka o Yuta ni o Yerusalemu wi oothene yaale yaachinke wookapuroni ethukumane o Yerusalemu;
8 mwawiiwanana ni yoolakelela ya ahooleli ni asitokweene, yoole ii ahiphiye variyari va mahiku mararu aahaala waakhiwa sookhalano sawe soothene nave aahaala wiikariwa mmuloko wa achu yaawo yaachinke wookapuroni.
9 Mwawiihiiha, mu mahiku mararu, ela tiwi, mu nihiku na makhumi meeli na mweeri waneethanu naxexe, alopwana oothene o Yuta ni o Penxami yaathukumana o Yerusalemu. Achu oothene yaakiraathi vaate va empa ya Muluku eeparipari, ethukumelaka wa nthowa na mwaha yoole ni nthowa na epwila etokotoko yaarupa.
10 Voocharela, mulipa a mukucho Estra, aaloca wa yaawo ariki: “Nyuwaano moheerano ichu moohiroromeleya, mwaathelaka athiyana a ilapo sookhopela, nave mohaaceererya nthowa wa Aisarayeli.
11 Vano mulokohe yoocheka anyu wa Yehova, Muluku a makholo anyu nave mweereno yookhwela awe. Mwiivalaanye ni achu a ilapo soorukurerya nave mwaarowihe athiyana mwaathenlaanyu a ilapo sookhopela.”
12 Muloko woothene waahaakhula ni masu oovuwa oriki: “Nnahaala weerano hiihaayene ntoko muloncaanyu.
13 Nto aakhalavo achu ancipale nave nri mu elukuluku ya epwila. Honaweryeya okhala vaate, nave mwaha owo howeryeya orehereryiwa nihiku nimoha naari mahiku meeli, woona wi naari alipa oomwaryeya vooloca sa mwaha yoowo.
14 Vano khwoo, mweemererye wi ahooleli ahu yeemelele muloko woothene; nave oothene yaale ari mu ipooma sahu yaathenle athiyana a ilapo sookhopela erwe yiiperekhe mu nihiku nlakeleliwe, vamoha ni asitokweene ni athoriha a epooma ti epooma, ophiyerya nikurumunxe esara yoovarela ya Muluku ahu nthowa na mwaha yoola.”
15 Nyenya, Yonata, mwaana a Asayeli, ni Yaseiya, mwaana a Tikiva, yaakhooca sa yeeyo, nave Mexulami ni Sepetai yaawo yaari Alevi, yaahaakhaviherya.
16 Nto oothene yaakoonke wookapuroni yaaheerano ntoko yaalakaniwaaya; mulipa a mukucho Estra, ni ahooleli a ichoko, oothene yaale yaarepeliwe masina, yaathukumana vameekhaaya mu nihiku noopacerya na mweeri waneekhumi wi otholatholiwe mwaha yoowo.
17 Mu nihiku noopacerya na mweeri woopacerya, yaakwaaxa orehererya miyaha soothene wa alopwana yaawo yaathenle athiyana a ilapo sookhopela.
18 Nave tho yaahooniwa wi anamwane akina a alipa a mukucho yaahaathela athiyana a ilapo sookhopela; wa anamwane a Yesuwa, mwaana a Yehosataki ni asinnawe: Maseya, Eliyeseri, Yaripe ni Ketaliya.
19 Nyenya awo yaaroromeliha waarowiha asaaraya, nave woona wi yakhalano nthowa, yaahaala ovaha epucepuche wa nthowa na yoocheka aya.
20 Wa anamwane a Imeri, aakhalavo Hanani ni Sepatiya;
21 nave wa anamwane a Harimu: Maseya, Eliya, Semaya, Yehiyeli ni Usiya;
22 wa anamwane a Pasuri: Eliyohenai, Maseya, Isimayeli, Nataniyeli, Yosapati ni Eliyasa.
23 Nave mwa Alevi, aakhalavo Yosapati, Semeyi, Keleya (ela tiwi, Kelita), Petahiya, Yuta ni Eliyeseri;
24 wa alipa a wiipa: Eliyasipi; wa alipeleli a milako: Salumi, Telimi, ni Uri.
25 Nave wa Aisarayeli, wa anamwane a Parosi, yaakhalavo: Ramisiya, Isiya, Mamikiya, Miyamini, Eliyasare, Malikiya ni Peneya;
26 wa anamwane a Elami: Mataniya, Sakariya, Yehiyeli, Apiti, Yeremoti ni Eliya;
27 wa anamwane a Satu: Eliyonai, Eliyasiti, Mataniya, Yeremoti, Sapati ni Asisa;
28 wa anamwane a Pepai: Yehohanani, Hananiya, Sapai ni Apilai;
29 wa anamwane a Pani: Mexulami, Maluki, Ataya, Yasupi, Seyali ni Yeremoti;
30 wa anamwane a Pahati-mowapi: Atina, Elali, Penaya, Maseya, Mataniya, Pesaleli, Penuwi ni Manase;
31 wa anamwane a Harimu: Eliyeseri, Isiya, Malikiya, Semaya, Simeyoni,
32 Penxami, Maluki ni Semariya;
33 wa anamwane a Hasumi: Matenai, Matata, Sapati, Elifeleti, Yeremai, Manase ni Semeyi;
34 wa anamwane a Pani: Matai, Amurami, Uyeli,
35 Penaya, Petiya, Kiluhi,
36 Vaniya, Meremoti, Eliyasipi,
37 Mataniya, Matenai ni Yaasu;
38 wa anamwane a Penuwi: Simei,
39 Selemiya, Natani, Ataya,
40 Makinatepai, Sasai, Sarai,
41 Asarele, Selemiya, Semariya,
42 Salumi, Amariya, ni Yosefe;
43 nave wa anamwane a Nepo: Yeyeli, Matatiya, Sapati, Sepina, Yatai, Yoweli ni Penaya.
44 Oothene yaala yaathenle athiyana a ilapo sookhopela, nave yaahaarowiha asaaraya vamoha ni anaaya.
Inoota
^ Naari: “naakerihaka mu ipa sahu.”
^ Mu Ehepiri, “anathukumela variyari va.”
^ Naari: “nipuro na olyavo na.”
