Estra 4:1-24
4 Vaavaa amwiicani a Yuta ni a Penxami yiiwalaaya wi achu yaale yaakoonke wookapuroni yaanateka empa ya Yehova Muluku a Aisarayeli,
2 mwawaakuveya yaaya wa Soropapeli ni wa ahooleli a ichoko, elocano eriki: “Muneemererye wi ntekeke ni nyuwaano; woona wi ntoko nyuwaano, nnamulapa Muluku anyu nave ninnavaha mikucho ovinyerya mmahiku a Asaratoni, mwene o Asiriya, yoowo onruuhale wenno.”
3 Mwawiihiiha, Soropapeli ni Yesuwa, ni ahooleli akina a ichoko a Aisarayeli, yaahaaleela eriki: “Nyuwaano himukhala ni hiyaano mu oteka empa yeela ya Muluku ahu, nnahaala oteka mukhatiihu empa ntakhara Yehova, Muluku a Aisarayeli, hiiha ntoko mwene Siru o Persiya onilamulenleiye.”
4 Voocharela achu oomaka moorukurerya yaanaaceecheiha mwawuuluulela* achu o Yuta nave yaaneererya waahiiha oteka.
5 Awo yaanaaliva makhwankwa anamiruku, wi yaakanyerye muteko aya variyari va mahiku a Siru, mwene o Persiya, ophiyerya olamulelo wa Tariyu, mwene o Persiya.
6 Omapacereryo wa olamulelo wa Asuwero, awo yaarepa ekaarata ewootheryaka achu yaakhala o Yuta ni o Yerusalemu.
7 Nave mmahiku a mwene Artaxerxe o Persiya, yaarempwa ekaarata ni Pislawu, Mitretati, Tapel ni asinthamwene aya akina, emurepelaka mwene Artaxerxe. Awo yaataphulela ekaarata mu elocelo ya Aramaiku,* epharihelaka marepeliwo a Aramaiku.
8 *Rehumi, muhooleli mutokweene a epooma, ni Simisai, mulipa oorepa, yaamurepela mwene Artaxerxe emusomelaka Yerusalemu, ni masu ala:
9 (Ekaarata yaari ya Rehumi, mulamuleli mutokweene, ni Simisai mulipa oorepa, ni asinthamwene aya akina; alipa oothoriha ni ahooleli, alipa oorepa, achu o Ereki, o Papulu, achu o Susa, ela tiwi achu o Elami.
10 Ni maloko makina oohalela yaawo mutokweene ni oocicimiheya Asinapari aakunxeiye akerihaka wookapuroni nave aakuha mu ipooma so Samariya ni makupa makina a muhice* Eufrate. Nave vano
11 ala masu a ekaarata yeeyo yaamurumihenlaaya)
“Wa mwene Artaxerxe, erempwe ti anamuteko anyu, achu a makupa makina a muhice Eufrate: Nave vano
12 musuwele nyuwo amwene wi Ayuta yaawo ekhumme weiwo erwaaka wenno aaphiya o Yerusalemu. Awo anuuluula oteka epooma yoomwaryeya ni yootakhala, ekwaaxaka ixiri ni orehererya mathipelo.
13 Musuwele mwene wi wakhala wi epooma ela yohuuluuliwa otekiwa nave ixiri saya sikwaaxiwa awo helivaka musokho, naari sooveleela, naari musokho wa vamphironi nave eyo enahaala weeriha oyeleela muhakhu wa mwene.
14 Woona wi nnalya maakha a vaate va amwene,* nave noona wi hiyaahaala okhala yaphaama omaala noonaka ichu sa amwene inanaraka, nohoorumihelaani nyuwo mwene michaka seiha.
15 Mwawiihiiha opakiwe otholathola mu liivuru a soorepela sa makholo anyu. Munahaala woona mu liivuru a soorepela wi epooma yeela, epooma yoomwaryeya, enatannya makacamiho a mamwene ni mu iprovinsiya, ovinyerya khalai, aakhalamo achu yaawo anatannya omwaryeya. Ti mathowa ene epooma ela yaamwaryiwaaya.
16 Nnachuna wooleelaani mwene wi, wakhala wi epooma yeela yohuuluuliwa otekiwa nave ixiri saya ikwaaxiwa, nyuwaano himuweryaka ovareryela makupa makina a muhice* Eufrate.”
17 Mwene aarumiha masu wa Rehumi mulamuleli mutokweene ni Simisai mulipa oorepa, ni asinthamwene aya akina yaawo yaakhala o Samariya ni makupa makina a muhice* Eufrate:
“Mooni!
18 Ekaarata mukirumihenlaanyu yohaalakhanyiwa mookwakwaleya* vamiithoni vaka.
19 Kaalamulela wi opakiwe otholathola nave yooniwa wi ovinyerya khalai epooma yeeyo ennaarukunuwela mamwene, nave onnatepa weereyawo omwaryeya ni waakaaha.
20 Yaakhalawo mamwene oowerya o Yerusalemu yaawo yaalamulela makupa oothene a muhice* Eufrate, yaawo yaaliviwa misokho, sooveleela, ni misokho sa vamphironi.
21 Vano mwaalamulele achu yaawo wi emaale ni muteko, wi ehuuluule oteka wanaawiili epooma eyo ophiyerya kilamulenle.
22 Mukhaleno ephoole wi muheeremoona ohiya mwaha yoola, wi sookhwela sa mwene ihinanarihiwe.”
23 Mwawiihiiha, emanle waalakhanyiwa ekaarata ya mwene Artaxerxe vamiithoni va Rehumi ni Simisai, mulipa oorepa, ni asinthamwene aya, mwawaakuveya awo yaaya wa Ayuta o Yerusalemu nave yaahaakhinyererya ohiya muteko.
24 Hiiha, muteko wa empa ya Muluku o Yerusalemu waamaala, nave waatitelela omaala ophiyerya eyaakha yanaawiili ya olamulelo wa Tariyu, mwene o Persiya.
Inoota
^ Mu Ehepiri, “yaanaceecheiha mata a.”
^ Naari akhweya: “ekaarata yaarempwe mu Aramaiku nave etaphuleliwa.”
^ Estra 4:8-6:18 aarempwe mu Aramaiku.
^ Naari: “ekhopela ekina ya muhice.”
^ Naari: “nnaakhela muhakhu vaate va amwene.”
^ Naari: “ekhopela ekina ya muhice.”
^ Naari: “ekhopela ekina ya muhice.”
^ Naari akhweya: “yootaphuleliwa ni waalakhanyiwa.”
^ Naari: “ekhopela yoothene ya muhice.”
