Estra 5:1-17
5 Voocharela mulipa a miririmu Axeu ni mulipa a miririmu Sakariya musulwa a Itu, yaaloca mwa miririmu wa Ayuta yaale yaari o Yuta ni o Yerusalemu mu nsina na Muluku a Isarayeli, yoowo aari ni yaawo.
2 Yaari elukuluku yeeyo Soropapeli, mwaana a Saltiyeli, ni Yesuwa, mwaana a Yehosataki, yaapacenryaaya oteka wanaawiili empa ya Muluku, yeeyo yaari o Yerusalemu; nave alipa a miririmu a Muluku yaari ni yaawo nave yaanaakhaviherya.
3 Mu elukuluku yeeyo Tatenai, mulamuleli a makupa makina a muhice Eufrate,* Setarposenai ni asinthamwene aya akina yaaya waakoha: “Taani oolamulenleeni oteka empa ela ni okwaaxa ixiri saya?”*
4 Nave tho yaahaakoha: “Masina aya taavi a achu yaala analapa muteko yoola wa oteka?”
5 Nyenya Muluku aanaavareryela asitokweene a Ayuta, nave awo hiyaamaanle ophiyerya aruuheliwe Tariyu yoolokoha, nave ophiyerya owo akookinhe ekaarata vooloca sa mwaha yoola.
6 Ela ekaarata yeeyo Tatenai, mulamuleli a makupa makina a muhice Eufrate,* ni Setarposenai ni asinthamwene awe, ahooleli a makupa makina a muhice Eufrate,* yaaruminhaaya wa mwene Tariyu.
7 Awo yaamurumihela yoolokoha ni masu ala:
“Mwene Tariyu:
“Mukhaleno murecele!
8 Musuwele amwene wi noophiya o eprovinsiya ya o Yuta o empa ya Muluku mutokweene, yeeyo enuuluuliwa otekiwa ni maluku matokotoko, ni mapawa, yaawo anaheliwa muxirini. Achu annaphara muteko ni mvai woothene nave muteko onnaya vahoolo nthowa na wiilipiserya waya.
9 Voocharela naahaakoha asitokweene aya nriki: ‘Taani oolamulenleeni oteka empa ela ni okwaaxa ixiri saya?’*
10 Nohaakoha tho masina aya wi nrepe, nave wi nooleeleeni masina a alopwana yaawo anahoolela.
11 “Naakhulo anivanhaaya ti nla: ‘Hiyaano na alapeli a Muluku a wirimu ni a veelaponi, nave nnuuluula oteka empa yeeyo yaatekiwe mu iyaakha sincipale muculi, yeeyo mwene mutokweene a Aisarayeli aatenkeiye nave akwaaxa.
12 Woona wi makholo ahu yaatannya esara ya Muluku a wirimu, owo aahaaveleela mmatani mwa Napukotonosori o Kalteya, Mwene o Papulu, yoowo aanyaannye empa yeela nave aakuxa achu ekhala akapuro o Papulu.
13 Mwawiihiiha, mu eyaakha yoopacerya ya Mwene Siru o Papulu, Mwene Siru aalamulela wi etekiwe wanaawiili empa yeela ya Muluku.
14 Ohiya yeeyoru, Mwene Siru aakuxa mu empa ya muluku o Papulu, ikaruma sa ooru ni sa eparata sa mu empa ya Muluku, seiho Napukotonosori aakunxeiye mu empa ya Muluku o Yerusalemu nave akeriha mu empa ya muluku o Papulu. Ikaruma saaveleeliwa wa mulopwana awiichaniwa Sespasar,* yoowo Siru aamuthanlileiye okhala mulamuleli.
15 Siru aaloca ariki: “Okuxe ikaruma iha. Hawe, wakuhe mu empa ya Muluku o Yerusalemu, nave wi empa ya Muluku yuuluuleliwe otekiwa mu nipuro yaatekiwaayavo khalai.”
16 Voocharela, Sespasar aarwa nave apaceriha mathipelo a empa ya Muluku o Yerusalemu; nave nlelo enamutekiwa ovinyerya elukuluku yeele ophiyerya hiihaano, nyenya eyo hekwaaxiwe.’
17 “Vano, waakhanle woophwanelela amwene, opakiwe otholathola mu aliivuru a* mamwene o Papulu, wi yooniwe waakhanle wi Mwene Siru aalamulela otekiwa wanaawiili empa ya Muluku o Yerusalemu; nave amwene munrumihele yoolakelela anyu vooloca sa mwaha yoola.”
Inoota
^ Naari: “ekhopela ekina ya muhice.”
^ Naari: “othomeela.”
^ Naari: “ekhopela ekina ya muhice.”
^ Naari: “ekhopela ekina ya muhice.”
^ Naari: “othomeela.”
^ Naari: “aarikivu a.”
