Estra 6:1-22
6 Mwawiihiiha Mwene Tariyu aalamula wi opakiwe otholathola mu aliivuru* o Papulu, mu nipuro nenlo waakhapeleliwamo muhakhu.
2 Nave yaaphwanyiwa eroolo mu empa yoolipihiwa* o Ekipatana, eprovinsiya yo Mitiya, va eroolu eyo yaarempwa ni masu ala:
3 “Mu eyaakha yoopacerya ya Mwene Siru, Mwene Siru aavaha nlamulo vooloca sa empa ya Muluku o Yerusalemu: ‘Empa enaphwanela wuuluuliwa otekiwa wi ekhale nipuro nenlo onahaala ovahiwakavo mikucho, nave wi mathipelo aya ekookiheryiwe mu nipuro yaatekiwaayavo. Eyo enaphwanela okhalano ikoovatu* makhumi mathanu nammoha* orakama waya ni ikoovatu makhumi mathanu nammoha oruku aya,
4 ixiri saya inaphwanela okhalano aliinya araru a maluku matokotoko ni liinya mmoha a ithaapwa. Muteko owo oni oliviweke ni muhakhu wa mwene.
5 Nave tho, ikaruma sa ooru ni eparata sa mu empa ya Muluku, seiho Napukotonosori aakunseiye mu empa ya Muluku o Yerusalemu nave ayano o Papulu, inahaala okookihiwa, wi saheliwe munipuroni naya mu empa ya Muluku o Yerusalemu ni okuhiwa mu empa ya Muluku.’
6 “Wa Tatenai, Mulamuleli a makupa makina a muhice Eufrate,* Setarposenai ni asinthamwene awe, alamuleli a makupa makina a muhice Eufrate,* mukhale ocai wa nipuro nenlo.
7 Muhaakanyerye muteko wa empa yeeyo ya Muluku. Mulamuleli a Ayuta ni asitokweene a Ayuta anahaala oteka wanaawiili empa ya Muluku mu nipuro yaatekiwaayavo khalai.
8 Ohiya yeeyoru, kinnavaha nlamulo vooloca sa yeeyo munaphwanelaanyu weera wi asitokweene a Ayuta ewerye oteka wanaawiili empa ya Muluku: Anamuteko anahaala oliviwaka moohihiyererya ni muhakhu wa mwene, eyo tiwi ni ikhorowa sa musokho seiho inathukumanyiwa makupa makina a muhice Eufrate,* wi alopwana awo ehihiyererye muteko.
9 Nave tho mwaavaheke moohihiyererya nihiku ti nihiku alipa a mukucho yaawo ari o Yerusalemu ichu seiho anavekaaya: Asaana a imope, ipucepuche ni asaana a ipucepuche ntakhara soovaha soopahiwa wa Muluku a wirimu, ophitaanyerya tiriku, maakha,* eviinyu ni makhurwa.
10 Mwawiihiiha, awo ananweryaka ovaha sooveleela moohihiyererya inamuhakalaliha Muluku a wirimu ni ovekelela okumi wa amwene ni wa anaaya.
11 Kinnalamulela tho wi yoole ani ahiiwelele nlamulo nenla, ehululiwe epatho ya empa awe nave ahomeleliwevo, empa awe etatusiwe okhala elatrina* ya achu oothene nthowa na ohiiwelela yoola.
12 Nave wi Muluku yoowo eerinhe wi nsina nawe nikhale weiwe amutoloxe mwene vyakala naari muloko yoowo oni ohiiwelele nlamulo nenla nave oni atoloxe empa ya Muluku yeeyo eri o Yerusalemu. Miyo Tariyu, kinnavaha nlamulo nenla. Nave nlamulo nla nihooceele waakhwaniheryiwa.”
13 Hiiha Tatenai, mulamuleli a makupa makina a muhice Eufrate,* Setarposenai ni asinthamwene aya yaaheerano soothene hiiha ntoko Mwene Tariyu aalamulenleiye.
14 Nave asitokweene a Ayuta, eceenyeren’ye ni masu a miririmu a Axeu vamoha ni a Sakariya, musulwa a Itu, yaatitelela oteka, nave muteko waanaya vahoolo. Awo yaakwaaxa oteka mwawiiwanana ni nlamulo na Muluku a Aisarayeli ni mwawiiwanana tho ni nlamulo na Siru, Tariyu ni Mwene Artaxerxe o Persiya.
15 Awo yaakwaaxa oteka empa mu nihiku naneeraru na mweeri wa Atar,* mu eyaakha yaneethanu nammoha ya olamulelo wa Mwene Tariyu.
16 Voocharela, Aisarayeli, alipa a mukucho, Alevi, ni akina yaakoonke wookapuroni yaaveleela* empa yeela ya Muluku moohakalala.
17 Vaavaa yaaveleeliwaaya* empa ya Muluku, awo yaavaha imope nsana, ipucepuche seelopwana masana meeli, asaana a ipucepuche masana maxexe, nave ntoko yoovaha ya yoocheka ntakhara Aisarayeli oothene, ipuri seelopwana khumi napiili mwawiiwanana ni waaca wa mahimo a Isarayeli.
18 Nave awo yaahaathanla alipa a mukucho ni Alevi mwawiiwanana ni makhuuru aya, wi elapeke muteko wa Muluku o Yerusalemu, mwawiiwanana ni yeeyo erempwe mu liivuru a Mose.
19 Nave yaawo yaakoonke wookapuroni yaamulya Paska mu nihiku naneekhumi naxexe na mweeri woopacerya.
20 Alipa a mukucho vamoha ni Alevi, yaahiiseeliha woona wi oothene yaakhala ooreheryeya. Alevi yaahiipha ipucepuche ntakhara mikucho sa Paska wa oothene yaale yaakoonke wookapuroni, wa anamukucho akhwaaya ni wa yaawo aneene.
21 Voocharela Aisarayeli yaawo yaakoonke wookapuroni yaahimulya Paska, vamoha ni oothene yaakoonke ni yaawo nave ehiya ichu soothanyeya sa maloko oorukurerya wi emulapeleke* Yehova, Muluku a Isarayeli.
22 Nave tho awo yaalya moohakalala Efesta ya Ipaau Soohiheliwa Yooruruvaliha, mu mahiku mathanu nameeli woona wi Yehova aahiweeriha okhala oohakalala nave aaheeriha wi mwene o Asiriya ooniherye mahala wa yaawo. Mwawiihiiha mwene aahaakhaviherya mmuteko wa oteka empa ya Muluku eeparipari, Muluku a Isarayeli.
Inoota
^ Mu Ehepiri, “empa ya soorepela.”
^ Naari: “o empa ya mwene.”
^ Echu ya ameetru 26.7. Mmoone apentisi 2.14.
^ 60.
^ Naari: “ekhopela ekina ya muhice.”
^ Naari: “ekhopela ekina ya muhice.”
^ Naari: “ekhopela ekina ya muhice.”
^ Naari: “mwiinyu.”
^ Naari akhweya: “nipuro na ikokhola; nikwatha.”
^ Naari: “ekhopela ekina ya muhice.”
^ Mmoone apentisi 2.15.
^ Naari: “yaahiinakuraara.”
^ Naari: “yiinakuraariwaaya.”
^ Mu Ehepiri, “emwaavyeke.”
