Estra 9:1-15
9 Simanle weereya ichu seiha, asitokweene yaarwa wa miyo eloca eriki: “Nloko na Aisarayeli, ahooleli, alipa mukucho ni Alevi hiyaawimwalannye ni maloko a ilapo soorukurerya, saweera sa Akanani, sa Ahiti, sa Aperisi, sa Ayepusi, sa Amoni, sa Amowape, sa Ayikuputu, ni sa a Amori.
2 Awo ahaakusa anamwane aasithiyana a maloko yaawo ekhala asaaraya ni asaara a anaaya, vano awo, muyareriwo waweela, ahiipwexiiherya ni achu a ilapo soorukurerya. Asitokweene ni ahooleli tatempe weerano echu yeela yoothanyeya.”
3 Vano kiiwalaaka yeeyo kaahaahula yoowara aka ni kaapha aka, kaaphola miihi aka ni ipweto saka nave kaakiraathi kiri oothanana.
4 Voocharela oothene yaale yoova* masu a Muluku a Isarayeli yaathukumana moorukurerya mwaka wa nthowa na ohiroromeleya wa achu yaale yaachinke wookapuroni. Nave miyo kaakiraathi kiri oothanana ophiyerya elukuluku ya yoovaha ya soolya sa oxekuwa.
5 Vaavaa yaaphin’yaaya elukuluku ya yoovaha ya soolya sa oxekuwa, kaavinya mmukhalelo aka wa wuuliheya muru, ni yoowara aka vamoha ni kaapha a waahuwa nave kaakokhora kitheteya mata wa Yehova Muluku aka.
6 Nave kaahi: “Khwoo Muluku aka, muru onnakuula nave koohaleela owehiha ethoi aka wa nyuwo, khwoo Muluku aka, vawi soohesa sahu sootepa waaca nave mathowa ahu ahaaceereryeya ophiyerya wirimu.
7 Ovinyerya mmahiku a makholo ahu ophiyerya olelo mathowa ahu matokweene. Nave wa nthowa na soohesa sahu, hiyaano, mamwene ahu, ni alipa a mukucho ahu ninnaveleeliwa mmatani mwa mamwene a ilapo ikina, nihooxeyaka ni nlema, okapuro, wiiyeriwa, ni wuuliheya muru, ntoko yeeren’yaaya olelo.
8 Nyenya vano, khwoo Muluku ahu, mu elukuluku yavakhaani, Yehova Muluku ahu, moonooniherya ikharari nweemereryaka wi oohalela ekophole nave munivahaka nipuro nookhapeleleya mu nipuro nanyu naweela, mweerihaka wi miitho ahu yaarye, nave wi munihakararye vakhaani mu okapuro ahu.
9 Naamwi nri akapuro, Muluku ahu hannyanyanle mu okapuro ahu. Nyenya mu osivela wawe woororomeleya wa hiyo, owo oonooniherya ikharari moorweela wa mamwene o Persiya wi anihakararye, wi yuuluuliwe otekiwa empa ya Muluku ahu nave wi anivahe nipuro nookhapeleleya* o Yuta ni o Yerusalemu.
10 “Nyenya vano khwoo Muluku ahu imanle ichu soothene seiha tiheeni nneeraahu niloce? Vawi noohiya malamulo anyu,
11 yaawo mwaanivanhaanyu moorweela wa alapeli anyu alipa a miririmu, muriki: ‘Elapo yeeyo munayaanyu okuxa eri yooripiheya wa nthowa na oriipiheya wa achu a elapo yeeyo, woona wi aasareiha saweera saya soothanyeya mu elapo yoothene.
12 Mwawiihiiha, muhaatheliheke anamwane anyu aasithiyana wa anamwane aya aasilopwana, naari oweemererya anamwane aya aasithiyana wi etheliwe ni anamwene anyu aasilopwana, nave muhirwe mwaavyeke opaka murecele ni yaawo naari sookhalano saya. Mwa yeeyo, munarwa mukhala akuru, munarwa mulya ichu saphaama sa elapo yeeyo nave munarwa mukuxa elapo yeeyo ntakhara anamwane anyu okhala wookhala.’
13 Nave imanle oniphacuwela ichu soothene seiha wa nthowa na saweera sahu soonanara ni mathowa ahu matokweene, nyuwo Muluku ahu, himunikhalinhe mwawiiwanana ni soohesa sahu, nave moheemererya wi hiyaano, nri va, nikophole.
14 Apwanne nnahaala ochekela wanaawiili malamulo anyu ni opaka malakano a othela ni achu a maloko yaawo aneerano ichu seiya soothanyeya? Apwanne himwaahaala otepa onyeenyeya ni hiyo ophiyerya munitolonxe moomalela muhimuhin’yeru muchu?
15 Khwoo Yehova Muluku a Isarayeli nyuwo muri awookololowa, woona wi nri ntoko oohalela ophiyerya olelo. Nri vamiithoni vanyu ntoko anamacheka, woona wi wa nthowa na yoocheka yeela, honaweryeya weemela vamiithoni vanyu.”
