Luka 19:1-48
19 Voocharela, Yesu aavolowa o Yeriko, nave aanavira vapooma apwahaka.
2 Aakhalawo mulopwana mmoha awiichaniwa Sakeyu; owo aari mutokweene aalipa ooliviha muxokho, nave aari ooreela.
3 Owo aanakhwela omoona yoowo eeriwa Yesu, nto haawerya omoona vanthowa na muloko wa achu, woona wi aari ookhuveya.
4 Mwawiihiiha, owo aachimakela ohoolo, awela mmwirini* wi amoone yoowo, ntakhara Yesu aahaala ovira vaavale.
5 Hiihaa, vaavaa Yesu aaphin’yeiye nipuro nenle, aaweha osulu nave alocano ariki: “Sakeyu, khuruwa mwawaakuveya, woona wi olelo kinaya okhala muleco aa owannyaa.”
6 Mwawiihiiha, owo aakhuruwa mwawaakuveya nave moohakalala, aamwaakhela yoowo ntoko muleco.
7 Achu yoonnaaya yeela, yaapacerya waapa eriki: “Mmoone, okele ohaya vaate va muchu oocheka.”
8 Nto Sakeyu aaheemela, aloca ni Apwiya ariki: “Pwiya, chiri kinamwaavaha alipa oohaawa eriyari ya muhakhu aka, nave yakhalavo echu kimwiiyenryaaka* muchu, kinammukookiherya opwaha ikwaha xexe.”
9 Mwa yeela, Yesu aalocano ariki: “Olelo, ovuluxa woovolowa mu echoko yeela, vawi ola tho ori mwaana a Aparahamu.
10 Woona wi Mwaana a muchu oorwa wi amwaavye ni omvuluxa yoole aarimenle.”
11 Ewiriyanaka ichu seiha, owo aaloca niphwanaphwaniho nikina, woona wi aanaacamela o Yerusalemu nave awo yuupuwela wi Omwene wa Muluku waahaala ophiya mwawaakuveya.
12 Mwawiihiiha owo aaloca: “Mulopwana mmoha a nihimo noovuwa, aaya elapo yoorakamela wi akhale mwene ni akooke.
13 Aawiichana akapuro awe khumi, aavaha miina* khumi, nave aaleela ariki: ‘Mumpakeke nakoso ni miina seiha ophiyerya okooka waka.’
14 Nyenya achu a elapo awe yaanamwiica nave yaahirumiha nikhuuru na anamichaka wi yaloce: ‘Hinnachuna wi mulopwana ola akhale mwene ahu.’
15 “Vaavaa aakonkeiye amanle okhala mwene,* owo aawiichana akapuro yaale aavanheiye ikhorowa,* wi asuwele mphurelo wa nakoso yaampakaaya.
16 Mwawiihiiha, oopacerya aarwa, aloca ariki: ‘Pwiya, miina anyu wohaacereryeya ikhala miina khumi.’
17 Owo aalocano ariki: ‘Phaama ene, wa kapuro aphaama! Woona wi waari oororomeleya mu ichu vakhaani, vano olamuleleke ipooma khumi.’
18 Anaawiili aarwa, aloca ariki: ‘Pwiya, miina anyu wohaacereryeya ikhala miina thanu.’
19 Yoowo aalocano ariki: ‘Weyo tho olamuleleke ipooma thanu.’
20 Nto kapuro mukina aarwa aloca ariki: ‘Pwiya, miina anyu ola, kaamanke vakuwoni nave kivitha.
21 Tiwi kanwoovaani, woona wi nyuwo mwa muchu oonanara murima; munakuxa echu weiwo mwahaakunhaanyuwo nave munahepha mummo muhanlaanyumo.’
22 Pwiyawe aamwaakhula ariki: ‘Kapuro oonanara murima, kinnoothoriha moorweela wa masu aa. Olonce wi waanasuwela wi kamuchu oonanara murima, kinakuxa echu weiwo kihikunhaakawo nave kinahepha yeeyo kihanlaaka?
23 Vano, ntakhara heeni wahaakerihaawe ekhorowa* aka o nipuro inakhapeleliwaayawo? Kikookaka, kaahaala ophwanya ni yawaaceereryavo aya.’
24 “Hiihaa, owo aaloca ni yaale yeemenle vaavale ariki: ‘Mmwaakhe miina oreiyeno nave mumvahe ole orino miina khumi.’
25 Nto awo yaaloca: ‘Pwiya, ola ookhalano miina khumi!’
26 Owo aawaakhula: ‘Kinnooleelaani wi, oothene yoole orinono, onamwaaceereryiwa, nto yoowo ohirino, ophiyerya tho yeeyo oreiyeno, onarwa aakhiwa.
27 Vano, amwiicani aka yaale yahaachuna wi kikhale mwene aya, mwaaruuhe nave nwiiphe kiwoonaka.’”
28 Yesu aamalinheiye oloca ichu seiha, aahoola, anawela ayaaka o Yerusalemu.
29 Nave aaphiyaleiye waacamela makupa o Petifaxe ni Petaniya o Mwaako wa Asitona, Yesu aahaaruma oohuserya eeli,
30 ariki: “Haweni mmucecheni ole munoonaanyu, murikimvolowaru, munahaala omphwanya mwaasaana a puuru amakeleliwe, yoowo ohintonko oweliwa ti muchu ophiyerya hiihaano. Mmutaphule nave mmuruuhe.
31 Nto akhalavo oni ookoheeni ariki: ‘Ntakhara heeni munamutaphulaanyu?’ muloce: ‘Apwiya annamuchuna.’”
32 Oohuserya ale apiili yaacimunlaaya, yaamphwanya mwaasaana a puuru, hiihaa ntoko owo aaleenleiye.
33 Nyenya emutaphulaka mwaasaana a puuru, akaneene yaahaakoha eriki: “Ntakhara heeni munamutaphulaanyu mwaasaana a puuru?”
34 Awo yaahaakhula: “Apwiya annamuchuna.”
35 Awo yaamukuxa mwaasaana a puuru nave emukeriha wa Yesu, vaculi vawe yaahaatelelavo soowara saya, nave Yesu aanwela.
36 Ayaaka ohoolo, achu yaanaatelela soowara saya muramphani.
37 Yaacamelaka mukhuruwelo wo Mwaako wa Asitona muloko woothene wa oohuserya waapacerya ohakalala ni omuthamala Muluku ni nsu noovuwa wa nthowa na sootikhiniha* soothene yoonnaaya,
38 elocaka eriki: “Ooreelihiwa ti yoowo onarwa ntoko Mwene mu nsina na Yehova! Murecele wirimu, nave ncicimiho wiirimurimu!”
39 Nto Afarisi akina yaari ni muloko yoole, yaaloca eriki: “Muhusiha, waasamele oohuseryaa.”
40 Nyenya Yesu aawaakhula ariki: “Miyo kinnooleelaani wi yaala yamaala, maluku teni ekhuweleke.”
41 Vaavaa aacamenleiye o Yerusalemu, owo aahoona epooma aninlela,
42 ariki: “Waakhanle wi weyaano, aa, weyaano, woosuwela olelo ichu inaruuha murecele . . . nto vano iri sookhuweya vamiithoni vaa.
43 Woona wi anamphiya mahiku amwiicani aa aneeraaya yoopakele mukuso, yoorice ni woowomaanya* makupa oothene.
44 Anamoopwexerya vathi, yaavohole anamwane aa, nave hehiyaru nluku vasulu va nikhwaaya, ntakhara hothokoronrye elukuluku ya weeceleliwa waa.”
45 Voocharela, aavolowa mu empa ya Muluku nave apacerya owiikarela vaate oothene yaatumiha,
46 alocaka wa yaawo ariki: “Yoorempwa: ‘Empa aka enarwa yiichaniwa empa ya mavekelo,’ nto nyuwo moopaka okhala nikhuku na ampava.”
47 Yesu aanatitelela ohusiha mu empa ya Muluku nihiku ti nihiku. Nto ahooleli a alipa a mukucho, alipa oorepa ni asitokweene a achu yaanamwaavyaavya wi emwiiphe;
48 nyenya hiyaaphwannye meerelo a omwiipha, woona wi muloko wa achu waanasiveliwa onwiriyana Yesu.
Inoota
^ Mwiri ola wiichaniwa sikomoru.
^ Naari: “kootheriwaaka omwiiyerya.”
^ Mu Ekiriki miina mmoha waari wa ikiilu 340 nave saari ikhorowa saakhwana itrakima 100.
^ Naari: “waakhela omwene.”
^ Mu Ekriki, “eparata.”
^ Mu Ekriki, “eparata.”
^ Naari: “miteko sakuru.”
^ Naari: “woothananiha.”
