Marku 8:1-38
8 Mmahiku yaale, waathukumana wanaawiili muloko* wa achu, nave hiyaarino echu ya olya. Mwawiihiiha, Yesu aahiwiichana oohuserya awe, alocano ariki:
2 “Achu ala annakimoriha ikharari, ntakhara aamaliha mahiku mararu ekhalaka ni miyo nave haano yoolya.
3 Wakhala wi kohaarowiha ehilyile,* awo anamuuwa eyaaka mphironi, nave akina a yaawo arwiile woorakamawo.”
4 Nto oohuserya awe yaamwaakhula eriki: “Otakhwani wenno, nnaya oruuha woowi ipaau sawaakhwana muloko woothene ola wa achu?”
5 Mwa yeeyo, aahaakoha: “Murino ipaau kavi?” Awo yaahi: “Thanu napiili.”
6 Owo aahaaruma achu okiraathi vachayani. Voocharela aakuxa ipaau ihe thanu napiili, avekelela, akawanya, apacerya waakawela oohuserya awe nave awo yaahaakawela achu.
7 Awo tho yaakhalano asihopa vakhaani, nave amanle oreeliha, owo aahaaleela tho wi ekawe.
8 Mwawiihiiha, awo yaalya evona, nave yaathukumanya saahalenle isareya micanka* mitokweene, sawaakhwana thanu napiili.
9 Yaale yaalyile yaari alopwana macikhwi maxexe.* Voocharela owo aahaarowiha.
10 Moohilekela owo aanwela mwaaceya ni oohuserya awe, nave aaphiya muceche wo Talmanuta.
11 Weiwo, Afarisi yaamwaacamela epacerya ovaanyihana ni yoowo, emvekaka eneneeryo ya wirimu wi emweehe.
12 Hiihaa, owo aahiicha miwiya, aloca: “Ntakhara heeni muyareriwo ola onaavyaaya eneneeryo? Chiri kinnooleelaani, hiyaavo eneneeryo enahaala ovahiwa wa muyareriwo ola.”
13 Mwa yeeyo, owo aahaahiya Afarisi, anwela mwaaceya wanaawiili alapuwela ekhopela ekina.
14 Nyenya, oohuserya yaahicuwala okuxa ipaau nave hiyaarino echu mmwaaceyani, voohikhala epaau emoha pahi.
15 Nave owo aahaalopola ariki: “Phoole, mwiikasoopeke ni yooruruvaliha* ya Afarisi ni yooruruvaliha ya Heroti.”
16 Mwawiihiiha awo yaapacerya ovaanyihana mukina ni mukhwaawe nthowa na ohikuxa ipaau.
17 Oonaka yeeyo, owo aahi wa yaawo: “Ntakhara heeni munavaanyihanaanyu nthowa na ohikuxa ipaau? Mano, hamunasuwela naari wiiwexexa? Nlelo mirima sanyu ti soowaleya mu wiiwexexa?
18 ‘Mookhalano miitho, apwanne hamunoona; mookhalano iwaru, apwanne hamuniiwa?’ Apwanne hamunuupuwela
19 vaavaa kaakawannyaaka ipaau thanu wa alopwana macikhwi mathanu,* soohalela sene mwaathukumannyaanyu saasaren’ye micanka mikavi?” Awo yaahaakhula: “Khumi napiili.”
20 “Nave vaavaa kaakawannyaaka ipaau thanu napiili wa alopwana macikhwi maxexe,* soohalela sene mwaathukumannyaanyu saasaren’ye micanka* mikavi mitokweene?” Awo yaahaakhula: “Thanu napiili.”
21 Mwa yeeyo, owo aalocano ariki: “Nlelo hamwiiwexenxe?”
22 Vano yaaphiya o Petisaita. Weiwo achu yaamuruuhela mulopwana eevaasi, enamveka Yesu wi amutannye.
23 Yesu aapharela ntata na mulipa eevaasi, amukeriha okhwipi wa epooma. Amanle otaphera mara mmiithoni mwawe, aamukuherya matata awe, amukoha ariki: “Onnoona echu?”
24 Mulopwana aavarerya mukhwipi aloca ariki: “Kinnawoona achu, nyenya anakhala ntoko miri ineeca.”
25 Wanaawiili, Yesu aaphara miitho a mulopwana, nave owo aapacerya woona phaama. Evaasi awe yammalela, nave anawerya woona mwawaakhwanela.
26 Mwawiihiiha, Yesu aamurowiha, amuleela ariki: “Ohikookele opooma.”
27 Yesu ni oohuserya awe yaacimula eyaaka miceche so Kaisareya o Filipi, nave mphironi owo aapacerya waakoha oohuserya awe, ariki: “Achu analoca wi miyo kaani?”
28 Awo yaamwaakhula: “Yohani Mpatisi, nto akina Eliya, nave tho akina, mmoha a alipa a miririmu.”
29 Nave Yesu aahaakoha ariki: “Hanka nyuwaano, munakeera wi miyo kaani?” Petru aamwaakhula: “Nyuwo mwa Kristu.”
30 Hiihaa, owo aahaalopola wi ehimuleele muchu mukina vooloca sa yoowo.
31 Nave tho, owo aapacerya waahusiha wi Mwaana a muchu onahaala ohooxiwa ichu sincipale, okhoociwa ni asitokweene, ahooleli a alipa a mukucho ni alipa oorepa, ophiyerya wiiphiwa, nave mu nihiku naneeraru aviihiwe mookhwani.
32 Chiryene, owo aalonce yeela wa oothene. Nyenya Petru aamukeriha okhwipi nave apacerya omusamela.
33 Mwawiihiiha, Yesu aarukunuwa aaweha oohuserya awe, nave amusamela Petru ariki: “Satana, vinyavo vamiithoni vaka! Nthowa nawi orino muupuwelo wa achu, ohiya wa Muluku.”
34 Yesu aahiichana muloko wa achu vamoha ni oohuserya awe, alocano: “Yoole onachuna okichara, iikhooce mukhateiye, akuxe mwiri awe wa ohooxiwavo* nave atitelele okichara.
35 Woona wi yoole onachuna ovuluxa okumi awe, onamuyeleela, nto yoole onayeleela okumi awe wanthowa naka ni wanthowa na michaka saphaama, onamvuluxa.
36 Vano, muchu onaphuramvo aakhela elapo yoothene yavathi nto ayelenle okumi awe?
37 Naari, tiheeni muchu onahaaleiye ovaha mu nipuro na okumi awe?
38 Tiwi, yoole onuuliwa muru ni miyo vamoha ni masu aka, variyari va muyareriwo yoola wooraruwa* ni woocheka, Mwaana a muchu onahaala tho wuuliwa muru ni yoowo, vaavaa oneereiye arwe mu ncicimiho na Atiithi awe, vamoha ni ankeelo aweela.”
Inoota
^ Naari: “mucici.”
^ Naari: “evoliwe.”
^ Naari: “micanka sa ohelamo yoolya.”
^ 4.000
^ Naari: “livirina.”
^ 5.000
^ 4.000
^ Naari: “micanka sa ohelamo yoolya.”
^ Moone Masu Atharihiwe.
^ Naari: “woohiroromeleya.”
