Masiposipo 1:1-33
1 Masiposipo a Solomoni, mwaana a Tavite, mwene o Isarayeli:
2 Wi muchu ahuserye* miruku ni olaka;Wi iiwexexe masu awiixeela;
3 Wi eemererye olaka onavaha wiiwexexa,*Wookolola, othoriha waphaama,* ni ekhaikhai;*
4 Wi yaavahe miruku achu oohisuwela;Wi yaavahe amiravo masuwelelo ni mavyakelo a wuupuwela.
5 Muchu a miruku onnawiriyana nave onnahuserya sincipale;Muchu oosuwela onnaphwanya ohoolela wa miruku
6 Wi iiwexexe maphwanaphwaniho ni sooloca sootikhiniha,*Masu aalipa a miruku ni masu aya oosiphela.
7 Omoova Yehova ti mapacereryo a masuwelelo.
Pahiru alolo tanathanya miruku ni olaka.
8 Mwanaka, owiriyaneke olaka wa apapaa,Nave ohihiye ikano sa* amamaa.
9 Tiwi, iho korowa aphaama a ithutu ntakhara muru aaNave yawiireerihano ntakhara esiko aa.
10 Mwanaka, wakhala wi alipa oocheka anneererya woolekecha, ohiweemererye.
11 Wakhala wi awo aaloca: “Orwe ni hiyaano.
Nnapwaha nawiipithele achu wi niyeehe nikhami.
Niipithe naaweheryaka achu ahirino nthowa, wi nthateno.
12 Nnahaala waamirya awo eri akumi hiihaa ntoko Mahiye* aneeraaya,Anteero ene, hiihaa ntoko yaale anakhuruwela munlicini.
13 Hankooni nawaakhe muhakhu aya woothene woochuneya;Nnamusareiha mu ipa sahu ni muhakhu niwaankhaahu.
14 Onaphwanela okhala ni hiyaano,*Nave oothene nnahaala okawanaka moolikana yeeyo nnahaalaahu wiiyaka.”*
15 Mwanaka, ohaachare yaawo.
Orakamelihe inaani saa mu iphiro saya,
16 Woona wi inaani saya sinnachimakela weera soonanara;Awo annaakuva wi yayeehe nikhami.
17 Mweeparipari, honaphuriha echu oreya mulapa aniiha palame ene awoonaka.
18 Ti nthowa nene awo aniipithaaya wi eyeehe nikhami;Anniipitha wi emalihe okumi wa akina.
19 Iha iphiro sa achu yaale aniiya ichu sa akina wi ereele.
Nave ela enahaala oweeriha tho oyeleela okumi aya.
20 Miruku seeparipari sinnakhuwela muramphani.
Iho sinnatitelela ovuwiha nsu naya mmapuro awaaciwamo.
21 Iho sinnakhuwela muxerexere* wa iphiro sawaaciwamo.
Va milako sa epooma, iho sinnaloca siriki:
22 “Ophiyerya liini nyuwo oohisuwela muneeraanyu mutitelele osivelaka ohisuwela wanyu?
Ophiyerya liini nyuwo oonyemula muneeraanyu muhakalaleke ni onyemula wanyu?
Nave ophiyerya liini nyuwo alolo muneeraanyu mwiiceke masuwelelo?
23 Mweemererye olaka waka.*
Hiihaa kinarwa kooyeheryaani munepa aka;Kinamoosuwelihaani masu aka.
24 Woona wi kaawiichanaani, nto mukhooca okiwiriyana,Kaahookola ntata naka, nto haavo aakipwanche.
25 Nyuwo mwaahititelela ohipwacha miruku saka sootheneNave mukhooca osamela waka.
26 Mwawiihiiha, miyaano kinamootheyaani epahu yoorweelaani;Kinamoonyemulaani yoophacuwelaani yeeyo munoovaanyu,
27 Vaavaa yeeyo munoovaanyu eneeraaya ephiye ntoko echeku yoowali,Nave epahu eneeraaya yoophacuweleeni ntoko echeku yawuupa,Vaavaa ohooxeya ni makacamiho eneeraaya yoophwanyeeni.
28 Elukuluku yeeyo, awo anankiichana, nto nkiwaakhula;Awo anamukaavya mwa mvai, nto hekiphwanya,
29 Woona wi awo yaahiica masuwelelo,Nave hiyaathanlile omoova Yehova.
30 Awo yaakhooca miruku saka;Hiyaaciciminhe osamela waka woothene.
31 Mwawiihiiha, awo anahaala ohooxeya* wa nthowa na meecelo aya,Nave awo anahaala wiipeliwa ni miruku saya.*
32 Woona wi omwareya wa oohisuwela onahaala owiipha,Nave ohuukhuwa wa alolo onahaala waatoloxa.
33 Nto yoole onakiwiriyana onahaala omaka mookhapeleleyaNave onamwiichaala ahoovakaru epahu vyakala.”
Inoota
^ Mu Ehepiri, “asuwele.”
^ Naari: “osuwelaxa.”
^ Naari: “yeeyo eri yeekhaikhai.”
^ Naari: “ohikhalano nthalu.”
^ Naari: “maphwanaphwaniho.”
^ Naari: “nlamulo na.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “Ovonye ekari aa ni hiyaano.”
^ Naari: “nnamukawanaka murupa mmohamoha.”
^ Mu Ehepiri, “va muru.”
^ Naari: “Mukookele oculi koosamelaani.”
^ Mu Ehepiri, “anahaala olya yawiima.”
^ Naari: “apalanu aya; ikano saya.”
